«قاشار كەنى» اق-عا قاراستى جىلۋ ورتالىعى كاسىپورىننىڭ ءوندىرىس الاڭىمەن بىرگە, بۇكىل ەلدى مەكەنگە جىلۋ, ىستىق سۋ بەرەدى. بۇعان دەيىن تەحنولوگيا مۇمكىندىگى بولماعان سوڭ, كەنت تۇرعىندارى جازدا ىستىق سۋسىز قالاتىن. كۇردەلى جوندەۋ جۇمىسى اياسىندا ورتالىقتىڭ ەنەرگەتيكالىق قوندىرعىلارى تولىقتاي جاڭارتىلىپ, جىلۋ ماۋسىمىنان تىس ۋاقىتتا دا ىستىق سۋ تاراتۋ ماسەلەسى شەشىمىن تاۋىپ وتىر.
«بيىل ءبىرىنشى رەت كۇن جىلىعان سوڭ دا ىستىق سۋ توقتاعان جوق. سوعان ءبارىمىز قۋانىپ جاتىرمىز. جىلدا جىلۋ ماۋسىمى باستالعانشا, ەلەكتر سۋ جىلىتقىشتارىن پايدالاناتىنبىز. ونىڭ دا قولايسىز تۇستارى كوپ, مۇنداي قۇرىلعىلار ورىن الادى ءارى ەلەكتر ەنەرگياسىن شىعىندايدى. ەندى, مىنە, شۇمەكتى اشساڭىز بولدى, ىستىق سۋ اعادى», دەيدى قاشار كەنتىنىڭ تۇرعىنى الەنا پونومارەۆا.
جىلۋ ورتالىعىن قايتا جاڭعىرتۋ جوباسى اياسىندا اۋقىمدى جۇمىس اتقارىلدى. ورتالىق باستىعى الەكساندر پەترۋشكوۆ-تىڭ ايتۋىنشا, اۋەلى قاشار كەنتىنىڭ گاز تاراتۋ پۋنكتىنەن جىلۋ ورتالىعىنا دەيىن جەراستى گاز قۇبىرى سالىنعان.
«ودان كەيىن گازدى رەتتەۋ پۋنكتى ورناتىلدى. كومىر قازاندىقتارى گاز قازاندىقتارىنا اۋىستىرىلدى. گاز شىعاراتىن جاڭا قۇبىرلار سالىندى. جىلۋ ورتالىعىنىڭ گازعا اۋىستىرىلۋىنىڭ پايداسى كوپ. بىرىنشىدەن, ەلدى مەكەننىڭ اۋاسى تازارادى. گاز – وتىننىڭ ەڭ قاۋىپسىز ءتۇرى, كومىرگە قاراعاندا, قۇرامىندا زياندى زاتتار از. ەكىنشىدەن, تۇرعىن ۇيلەر مەن كاسىپورىن عيماراتتارىندا جىل بويى جىلى سۋ ۇزىلمەيتىن بولادى. ۇشىنشىدەن, گازبەن جاناتىن قازاندىقتاردىڭ اۆتوماتتى باسقارۋ جۇيەسى بار. بۇل دا وسىنداعى مامانداردىڭ جۇمىسىن ەداۋىر جەڭىلدەتەدى», دەيدى ا.پەترۋشكوۆ.
قوستاناي وبلىسى
