فرانتسيا ازاماتى ابدۋللاح سەكيمي – بىرنەشە ءتىلدى ەركىن مەڭگەرگەن جان-جاقتى تۇلعا. ۇلتى اراب بولسا دا, ول فرانتسۋز, اعىلشىن, يسپان, اراب جانە قازاق تىلدەرىندە ەركىن سويلەي الادى. قازاق تىلىنە دەگەن قىزىعۋشىلىعىنىڭ ارقاسىندا ول 2022 جىلى فرانتسيادان قازاقستانعا كوشىپ كەلىپ, بۇگىندە استانادا تۇرىپ جاتىر.
ابدۋللاحتىڭ قازاق ءتىلىن مەڭگەرۋىنە سپورت, ناقتىراق ايتقاندا دزيۋدو سەبەپ بولعان. قازاق دزيۋدوشىسى ەلدوس سمەتوۆكە ءتانتى بولعان ول, سپورتشى جايلى اقپاراتتى قازاق تىلىندە ىزدەۋ كەزىندە بۇل ءتىلدى ۇيرەنۋگە شەشىم قابىلداعان.
«ەلدوس سمەتوۆتىڭ بارلىق جەكپە-جەگىن YouTube ارقىلى قاراپ, ونىڭ قازاقستان ازاماتى ەكەنىن ءبىلدىم. وسىدان كەيىن ەل تۋرالى كوبىرەك اقپارات ىزدەي باستادىم. قازاق ءتىلىنىڭ كوركەمدىگىن العاش رەت «جاۋجۇرەك مىڭ بالا», «توميريس», « ۇلى دالا زارى» فيلمدەرىن كورگەندە سەزىندىم. بۇل ءتىلدىڭ اۋەزدىلىگى مەنى باۋراپ الدى» دەيدى ول.
ابدۋللاح قازاق ءتىلىن سەگىز ايدا ۇيرەنىپ شىققان. بۇل جولدا وعان كوپتەگەن ادامدار قولداۋ كورسەتىپ, موتيۆاتسيا بەرىپ وتىرعان. باستاپقىدا ءتىل ۇيرەنۋ قيىنعا سوققان, سەبەبى وقۋ قۇرالدارىنىڭ باسىم بولىگى ورىس تىلىندە بولعان جانە قازاقشا ساپالى كونتەنتتىڭ تاپشىلىعى بايقالعان.
ءتىلدى مەڭگەرۋدىڭ باستى ءتاسىلى – تىڭداۋ, سويلەسۋ جانە سوزدىك قوردى ارتتىرۋ دەپ سانايدى. قازىرگى تاڭدا ول قازاق, اعىلشىن, فرانتسۋز, اراب تىلدەرىنەن شەتەلدىكتەرگە ساباق بەرەدى. ونىڭ شاكىرتتەرى اراسىندا ءارتۇرلى ەلدىڭ وكىلدەرى بار.
ابدۋللاح ءوز سوزىندە قازاقستاندا تۇراتىن وزگە ەتنوس وكىلدەرىنىڭ ءوزارا بىرلىگى جاراسقان, تاتۋ ەكەنىن اتاپ ءوتتى.
«قازاقستاندا تۇراتىن فرانتسۋز ازاماتى رەتىندە مەن ەل ىشىندەگى ەتنوسارالىق تاتۋلىق پەن بىرلىكتى ساقتاۋدىڭ ماڭىزىن جوعارى باعالايمىن. قازاق ءتىلىن ۇيرەنۋ ارقىلى مەن وسى حالىقتىڭ مادەنيەتى مەن رۋحىن جاقسىراق تۇسىنە باستادىم», دەيدى ابدۋللاح.
ابدۋللاح ەتنوسارالىق قاتىناستاردىڭ جاقسى ەكەنىن اتاپ وتسە دە, وزگە ۇلت وكىلدەرىنىڭ قازاقشا ەمەس, كوبىنە ورىسشا سويلەسۋىنە تاڭدانىسىن ءبىلدىردى.
«فرانتسيادا تۇراتىن بولساڭىز, فرانتسۋز تىلىندە سويلەۋگە مىندەتتىسىز. ال قازاقستاندا نەگە ورىسشا؟ بۇل – قازاق حالقىنىڭ كەڭپەيىلدىلىگى مەن مەيىرىمدىلىگىنىڭ كورىنىسى. بىراق ءاربىر ازامات قازاق ءتىلىن مەڭگەرۋگە ۇمتىلۋى كەرەك. قازاق ءتىلىن ءبىلۋ – وسى ەلگە دەگەن قۇرمەتتىڭ بەلگىسى», دەيدى ول.
ابدۋللاح قازاق ءتىلىن مەڭگەرۋ ارقىلى كوپتەگەن ەسىكتەردىڭ اشىلعانىن ايتتى.
«قازاقستاندا ءوز كاسىبىمدى اشتىم. جۋرناليستەر سۇحبات الادى, پودكاستقا شاقىرادى. سونداي-اق فرانتسۋزشا بىلگىم كەلەدى, وقىعىم كەلەدى دەگەن وتىنىشپەن كەلەتىن ادامدار وتە كوپ. قازاق ءتىلىن بىلگەنىمنىڭ ارقاسىندا كوپتەگەن تانىمال ساياساتكارلەرمەن سپورتشىلارمەن كەزدەسىپ, تانىستىم. جالپى, قازاق ءتىلىن ءبىلۋدىڭ مەن ءۇشىن جاعىمدى ىقپالى كوپ بولدى», دەيدى كەيىپكەرىمىز.
ابدۋللاح قازاقستان حالقىن ەرەكشە جاقسى كورەتىنىن ايتىپ, مۇندا قالۋعا نيەتتى ەكەنىن ءبىلدىردى. قازاقتاردىڭ قوناقجايلىلىعى مەن رۋحاني جاقىندىعى ونى باۋراپ العان. ول بولاشاقتا مۇسىلمان وتباسىن قۇرۋدى جوسپارلاپ وتىر جانە قازاق كونتەنتىن دامىتۋ باعىتىندا جوبالارمەن اينالىسۋدى كوزدەيدى.
