باسپاناعا بەرىلەتىن سۋبسيديانى قايتا قاراۋ ۇسىنىلدى

ساۋالدا 2023 جىلى قابىلدانعان, جۇمىس بەرۋشىلەردىڭ اۋىلدىق جەردە قىزمەتكەرلەرىنە تۇرعىن ءۇي سالۋ شىعىندارىن سۋبسيديالاۋ باعدارلاماسىنىڭ كەمشىن تۇستارى ايتىلدى. مەملەكەت تاراپىنان تۇرعىن ءۇي قۇرىلىسىنىڭ 50 پايىزىن وتەۋ قاراستىرىلعانىمەن, بۇل باستامانىڭ جۇزەگە اسۋىندا بىرقاتار قيىندىقتار تۋىنداپ وتىرعانى بەلگىلى بولدى.

اتاپ ايتقاندا, قازىرگى تالاپتارعا سايكەس, اۋداندىق جانە وبلىستىق ورتالىقتاردا, سونداي-اق اگلومەراتسيا قۇرامىنا كىرەتىن ەلدى مەكەندەردە سالىنعان ۇيلەر بۇل باعدارلاما اياسىندا سۋبسيديالانبايدى. دەگەنمەن, باتىس قازاقستان وبلىسىنداعى كەيبىر اۋدانداردا فەرمەرلىك شارۋاشىلىقتار رەسمي تۇردە اۋدان ورتالىعىنا قاراعانىمەن, شىن مانىندە اۋىلدىق جەردە ورنالاسقان. بۇل جاعداي ولاردىڭ باعدارلاماعا قاتىسۋىنا كەدەرگى كەلتىرىپ وتىر.

سونىمەن قاتار, دەپۋتات سۋبسيديا كولەمىنىڭ ناقتى شىعىندارعا ساي كەلمەيتىنىن اتاپ ءوتتى. قولدانىستاعى تارتىپكە سايكەس, ءاربىر تۇرعىن ۇيگە بەرىلەتىن سۋبسيديا 5 ملن تەڭگەدەن اسپايدى. الايدا, 2023 جىلى باتىس قازاقستان وبلىسىندا 1 شارشى مەتر تۇرعىن ءۇيدىڭ ورتاشا قۇنى 284 136 تەڭگە بولسا, الداعى جىلدارى بۇل كورسەتكىش 340 مىڭ تەڭگەگە جەتۋى مۇمكىن. وسىعان بايلانىستى, 100 شارشى مەترلىك تۇرعىن ءۇيدىڭ قۇنى 34 ملن تەڭگەدەن اسىپ جىعىلۋى ىقتيمال.

 «قاعازدا بار, ومىردە جوق» دەگەن مىسال – ءدال وسى جاعدايعا ءتان. ەگەر بۇل ماسەلە تۇبەگەيلى شەشىلمەسە, اۋىل – جايلى مەكەن ەمەس, بوساپ بارا جاتقان كەڭىستىككە اينالادى», دەيدى دەپۋتات.

وسى رەتتە دەپۋتات سۋبسيديالاۋ تالاپتارىن قايتا قاراۋدى ۇسىندى. اتاپ ايتقاندا:

• وڭىرلىك ەرەكشەلىكتەر مەن قۇرىلىس شىعىندارىنىڭ ءوسۋىن ەسكەرە وتىرىپ, سۋبسيديا مولشەرىن ارتتىرۋ;
• رەسمي تۇردە اۋدان ورتالىعىنا جاتاتىن, بىراق ءىس جۇزىندە اۋىلدىق سيپاتتاعى ەلدى مەكەندەردى باعدارلاماعا قوسۋ;
• وڭىرلەردەگى ينفراقۇرىلىم مەن شىعىنداردى ەسكەرە وتىرىپ, سارالانعان قولداۋ جۇيەسىن ەنگىزۋ.

دەپۋتاتتىڭ پىكىرىنشە, بۇل شارالار باعدارلامانىڭ تيىمدىلىگىن ارتتىرىپ, اۋىلدىق وڭىرلەردىڭ دامۋىنا سەرپىن بەرمەك.