فوتو: اشىق دەرەككوزدەن
«بيىل 21 ساۋىردە قحپ فراكتسياسىنىڭ باستاماسىمەن ۇيىمداستىرىلعان ۇكىمەت ساعاتىندا وسى تاقىرىپقا تاعى جان-جاقتى توقتالىپ, قوعام مەن مەملەكەتتىك ورگانداردىڭ نازارىن اۋدارتتىق. بۇگىندە ماسەلەنىڭ بار ەكەنى مويىندالعانىمەن, ۇكىمەت ونى شەشۋگە قاۋقارسىز. بۇعان دەيىن قابىلدانعان شارالار ماسەلەنى شەشۋگە دە, ءتىپتى ونى ازايتۋعا دا اسەر ەتپەدى», دەدى م.ماگەرراموۆ.
ماجىلىسمەننىڭ سوزىنشە, قحپ فراكتسياسى اتالعان ماسەلەنى شەشۋدىڭ ەڭ ءتيىمدى ءارى جەدەل جولى – اليمەنتتىك قور قۇرۋ دەپ ەسەپتەيدى. بۇل قور بيۋدجەتكە اۋىرتپالىق تۇسىرمەيدى, سەبەبى ونىڭ قاراجاتى سالىقتىق ەمەس تۇسىمدەر ەسەبىنەن تولتىرىلادى. سونىمەن قاتار, اليمەنتتىك قور بورىشكەرلەردى ماسىلدىققا يتەرمەلەمەيدى, ويتكەنى قوردان جۇمسالعان قاراجات كەيىننەن رەگرەستىك تارتىپپەن بورىشكەردەن ءوندىرىپ الىنادى.
ء«بىز ۇكىمەتتىڭ وزىنە بۇل سۇراقتى قويۋ كەرەك دەپ سانايمىز: ول بورىشكەرلەردىڭ ماسىل بولۋىنان قورقا ما, الدە اليمەنت الماي وتىرعان بالالاردىڭ مۇقتاجدىعىنان با؟ ازىرگە ۇكىمەت اليمەنتتىك قور قۇرۋعا قارسى بولىپ, بورىشكەرلەردىڭ جاعدايىن كوبىرەك ويلاپ, بالالاردىڭ قاجەتتىلىكتەرىن ەلەۋسىز قالدىرىپ وتىر», دەدى دەپۋتات.
م.ماگەرراموۆتىڭ ايتۋىنشا مەملەكەت جىل سايىن اليمەنتكە قاتىستى داۋلى ىستەر بويىنشا جەكە سوت ورىنداۋشىلارىنا (جسو) جۇزدەگەن ميلليون تەڭگە تولەپ كەلەدى.
ء«بىز بۇل قاراجاتتى ناتيجەسىزدىككە ەمەس, ناقتى ناتيجەگە – بالالاردىڭ قاجەتىنە باعىتتاۋدى ۇسىنامىز. بيۋدجەت قاراجاتىن اليمەنتتىك قور ارقىلى تىكەلەي بالالاردىڭ قاجەتتىلىكتەرىنە جۇمساۋ – الدەقايدا ءتيىمدى ءتاسىل بولار ەدى», دەدى ماجىلىسمەن.
دەپۋتاتتىڭ سوزىنشە اليمەنتكە مۇقتاجداردىڭ اراسىندا مۇگەدەكتىگى بار بالالار دا از ەمەس.
«مۇنداي بالالاردى تاعدىردىڭ تالكەگىنە تاستاماي, جالعىز ءوزى باعىپ-قاعىپ وتىرعان اتا-انانىڭ جۇمىس ىستەۋىنە دە, تولىققاندى تابىس تابۋىنا دا دەنساۋلىعىنا بايلانىستى شەكتەۋلەر بار. سونىمەن قاتار, مۇنداي بالالارعا ءجيى مەديتسينالىق تەكسەرىستەر, وڭالتۋ شارالارى مەن ەم-دوم قاجەت بولعاندىقتان, شىعىندارى دا كوپ. وسى ساناتتاعى اتا-انالار – ەڭ الدىمەن مەملەكەتتىك قولداۋعا ءزارۋ. ەگەر ەكىنشى اتا-اناسى كومەكتەسپەسە, مەملەكەت قول ۇشىن سوزۋى ءتيىس», دەدى قحپ دەپۋتاتى.
وسىلاردى ايتا كەلە, «قازاقستان حالىق پارتياسى» دەپۋتاتتارى اتىنان كەلەسى تالاپتاردى ايتتى:
«اليمەنتتىك قوردىڭ پيلوتتىق جوباسىن ازىرلەپ, ونى جەدەل ىسكە قوسۋ. بۇل جوبا – اليمەنت ءوندىرۋ تۋرالى اتقارۋشىلىق قۇجاتتارى بار, بىراق اليمەنت المايتىن مۇگەدەك بالالاردىڭ قاجەتتىلىگىن وتەۋگە باعىتتالۋى ءتيىس.
اليمەنتتىك قور قاراجاتىنان جۇمسالعان شىعىندى ءوندىرىپ الۋ مەحانيزمىن ايىپپۇلدار مەن ءوسىمپۇلداردى ەسكەرە وتىرىپ ازىرلەۋ», دەپ تۇيىندەدى دەپۋتات ماگەررام ماگەرراموۆ.
