فوتو: يگور بۋرگاندينوۆ
«قازپوشتانىڭ» باسقارۋشى ديرەكتورى داۋلەت بەكمانوۆ ءىس-شارانىڭ ماڭىزدىلىعىن اتاپ ءوتىپ, پوشتا قىزمەتىنىڭ جاڭا باستامالارى تۋرالى ءسوز سويلەدى.
«وتىز جىلدان استام ۋاقىت ىشىندە ءبىر ميللياردتان استام گازەت-جۋرنال جەتكىزىپ, وقىرماندارىمىزدىڭ اقپاراتتىق-تانىمدىق قاجەتتىلىگىن وتەۋگە قىزمەت ەتىپ كەلەمىز. ءبىزدىڭ پوشتاشىلار جىل سايىن مىڭداعان شاقىرىم جول ءجۇرىپ, جازىلۋشىلارعا باسىلىمداردى جەتكىزەدى. ال سۇرىپتاۋشىلاردىڭ قولىنان كۇن سايىن ونداعان مىڭ گازەت-جۋرنال وتەدى. قازىر ءبىز ەل ازاماتتارىنا قولايلى بولۋى ءۇشىن «قازپوشتانىڭ» جازىلۋ جانە جەتكىزۋ قىزمەتىن بارىنشا تسيفرلاندىرۋعا كۇش سالىپ جاتىرمىز», دەدى پوشتا ديرەكتورى.
وسى ماسەلە توڭىرەگىندە تولىعىراق ءبىلۋ ءۇشىن «قازپوشتا» كومپانياسىنىڭ مەرزىمدى ءباسپاسوزدى باسقارۋ دەپارتامەنتىنىڭ ديرەكتورى بوتاكوز ابىقانوۆانى سوزگە تارتتىق. ونىڭ ايتۋىنشا, Kazpost قوسىمشاسىن قولدانىپ, مەرزىمدى باسىلىمدارعا جازىلاتىن وقىرماندار كوبەيىپ كەلەدى.
«Kazpost قوسىمشاسى ارقىلى جازىلۋ – بارىنشا ىڭعايلى جانە جىلدام. ەندى ازاماتتارىمىز باسىلىمعا ءبىر عانا مينۋتتا جازىلا الادى. بۇل وزگەرىس جازىلۋشىلاردىڭ ۋاقىتىن ۇنەمدەيدى ءارى قىزمەت كورسەتۋ ساپاسىن ارتتىرادى. سونىمەن قاتار, ء بىز گازەت-جۋرنالدارعا دا جۇكتەرگە مورلەنەتىن شتريح كود ەنگىزۋدى جوسپارلاپ وتىرمىز. بۇل شتريح كود گازەتتىڭ قاي نۇكتەدە كەلە جاتقانىن ناقتى انىقتاۋعا مۇمكىندىك بەرەدى. ياعني جازىلۋشى تاپسىرىس بەرگەن گازەت-جۋرنالدىڭ قاي نۇكتەگە توقتاعانىن انىق ءبىلىپ وتىرادى. بۇل اشىقتىق پوشتا قىزمەتىن بارىنشا ايقىن ءارى سەنىمدى ەتەدى. سونىمەن قاتار, بۇل جاڭا جۇيە پوشتا قىزمەتكەرلەرىنىڭ جاۋاپكەرشىلىگىن ارتتىرىپ, قىزمەت كورسەتۋ ۇدەرىسىن وڭتايلاندىرادى», دەدى ب. ابىقانوۆا.
سوزىنەن اڭعارعانىمىزداي قازىر «قازپوشتا» وقىرماندارمەن بايلانىسىن ارتتىرۋعا بارىن سالىپ جاتىر. سوعان وراي وسى-كۇنى گازەت-جۋرنالعا جازىلعان العاشقى ون وقىرمانعا ارناۋلى سىيلىقتار تابىس ەتىلدى. جۇلدىزى جانعان سونداي وقىرمانداردىڭ ءبىرى – مەيىربەك مەيرامبەكوۆ. ءوزى جاس جىگىت. «ليتەر» گازەتىنىڭ تۇراقتى وقىرمانى ەكەن. ادەتتە گازەت-جۋرنال وقىرماندارى قارتايىپ بارا جاتىر دەگەن ءسوزدى ءجيى ەستيىمىز. ال بۇل كەيىپكەرىمىز باسپاسوزبەن بالا كەزىنەن دوس.
«بۇل ادەتتى مەنىڭ انام قالىپتاستىردى. ول كىسى «ايگولەك», «بالدىرعان», «اق جەلكەن» سىندى جۋرنالداردى ۇنەمى الدىرىپ وتىردى. سول سەبەپتى كۇندەلىكتى ومىردە ساراپتان وتكەن, جان-جاقتان تەكسەرىلگەن اقپاراتتاردى وقۋعا داعدىلاندىم», دەيدى ول.
سونىمەن قاتار ءبىز ودان باسىلىمعا جازىلۋ ۇدەرىسىنىڭ جەڭىلدەگەنى قانشالىقتى بايقالاتىنىن سۇراپ كوردىك.
«گازەت-جۋرنالعا جازىلۋدىڭ قارقىندى تۇردە تسيفرلانىپ كەلە جاتقانى انىق اڭعارىلادى. «قازپوشتا» بۇل تۇستا جاقسى كرەاتيۆتى باستامالار جاساۋعا تالپىنىپ جاتىر. الايدا بۇل جوبالاردىڭ وتكەنىنەن كوپشىلىك قاۋىم حابارسىز بولىپ قالادى. مەنىڭ ءوزىم بۇل ءىس-شارانىڭ وتەتىنىن جۋرناليست تانىستارىم ارقىلى ەستىپ ءبىلدىم. سول سەبەپتى «قازپوشتا» بۇگىنگىدەي يگىلىكتى جوبالارىن حالىق كوپ جۇرەتىن جەرلەردە ناسيحاتتاپ, گازەت-جۋرنال وقۋدى اشىق-جارقىن جارنامالاسا ەكەن دەگەن تىلەگىمىز بار», دەپ ۇسىنىسىن ءبىلدىردى م. مەيرامباەۆ.
جيىن سوڭىندا «قازاق گازەتتەرى» جشس باس ديرەكتورىنىڭ ورىنباسارلارى ۆيكتور پريانيكوۆ پەن قامبار احمەت, «Túrkistan» گازەتىنىڭ باس رەداكتورى باۋىرجان باباجان ۇلى باستاعان باسىلىم باسشىلارى بيىلعى جىلى ۇلكەن ەڭبەك ءسىڭىرىپ «ۇزدىك پوشتاشى», «ۇزدىك وپەراتور» جانە «ۇزدىك سۇرىپتاۋشى» نوميناتسياسىنا يە بولعان قىزمەتكەرلەرگە قۇتتىقتاۋ گراموتالارىن تابىستادى.
