فوتو: egemen.kz/ قىرمىزى جۇماعاليقىزى
ءماجىلىستىڭ ءباسپاسوز قىزمەتىنىڭ مالىمەتىنشە ءماجىلىس وتىرىسىندا مەديتسينالىق كومەكتىڭ بىرىڭعاي پاكەتىن قۇرۋ ۇسىنىلعان. اتاپ ايتقاندا, دەنساۋلىق ساقتاۋ مينيسترلىگىنە دەنساۋلىقتى قورعاۋ مەملەكەتتىك قورى (جەدەل, شۇعىل, پاللياتيۆتىك كومەك, جۇقپالى جانە الەۋمەتتىك ماڭىزى بار اۋرۋلاردى ەمدەۋ) اياسىندا مەديتسينالىق كومەك كورسەتىلەتىن اۋرۋلاردىڭ تىزبەسىن انىقتاۋ وكىلەتتىگى بەرىلەدى.
سونداي-اق ۇكىمەت العاشقى مەديتسينالىق-سانيتارلىق كومەك اياسىنداعى قىزمەتتەردى مەديتسينالىق كومەكتىڭ كەپىلدىك بەرىلگەن كولەمى پاكەتىنەن مىندەتتى مەديتسينالىق ساقتاندىرۋ پاكەتىنە اۋىستىرۋدى ۇسىنىپ وتىر. مىسالى, مامانداردى قابىلداۋ, مەديتسينالىق وڭالتۋ, پروفيلاكتيكالىق تەكسەرۋلەر, يممۋنداۋ, رەپرودۋكتيۆتى دەنساۋلىقتى قورعاۋ شارالارى مىندەتتى مەديتسينالىق ساقتاندىرۋ اياسىندا قامتاماسىز ەتىلەدى.
بۇل ءتاسىلدى دەپۋتاتتىق كورپۋس قولدامادى. وسىعان وراي دەپۋتاتتار مەديتسينالىق كومەكتىڭ كەپىلدىك بەرىلگەن كولەمى پاكەتىندە العاشقى مەديتسينالىق-سانيتارلىق كومەكتىڭ نەگىزگى تىزبەسىن: الەۋمەتتىك ماڭىزى بار اۋرۋلاردىڭ الدىن الۋ, دياگنوستيكالاۋ جانە ەمدەۋ قىزمەتتەرىن ساقتاۋدى ۇسىندى. ياعني, تۋبەركۋلەز, ايتۆ, قاتەرلى ىسىك, سوزىلمالى ۆيرۋستى گەپاتيت, باۋىر تسيرروزى, پسيحيكالىق جانە مىنەز-ق ۇلىق بۇزىلىستارى, جەدەل ميوكارد ينفاركتىسى (العاشقى التى اي ىشىندە), ينسۋلت ء(بىر جىل ىشىندە), اۋتويممۋندىق اۋرۋلار, ەپيلەپسيا جانە باسقا دا اۋرۋلارمەن اۋىراتىن ادامدارعا تەگىن مەديتسينالىق كومەكتىڭ تولىق سپەكترىن الۋعا كەپىلدىك بەرىلەدى.
سونىمەن قاتار دەپۋتاتتاردىڭ باستاماسىمەن ازاماتتاردىڭ ساقتاندىرۋ مارتەبەسىنە قاراماستان مەديتسينالىق كومەككە قولجەتىمدىلىگىن قامتاماسىز ەتۋ ءۇشىن مەديتسينالىق كومەكتىڭ كەپىلدىك بەرىلگەن كولەم پاكەتى اياسىندا باستاپقى ەمدەۋ كەزىندەگى نەگىزگى مەديتسينالىق كومەك تە ساقتالادى. ياعني, ەمحاناعا كەلگەن ءاربىر ازاماتقا دارىگەردىڭ العاشقى كەڭەسى بەرىلەدى دەگەن ءسوز.
