فوتو: primeminister.kz
پلەنارلىق وتىرىستا ءسوز سويلەگەن عالىمجان قويشىباەۆ فورۋم ساۋدا-ەكونوميكالىق جانە ينۆەستيتسيالىق الەۋەتتى نىعايتۋ جانە تەرەڭدەتۋ, سونداي-اق وڭىرارالىق بايلانىستاردى كەڭەيتۋ جونىندەگى ۇيىمعا قاتىسۋشى ەلدەردىڭ ءوزارا ءىس-قيمىلىنىڭ ماڭىزدى قۇرالىنا اينالعانىن اتاپ ءوتتى.
«ورنىقتى دامۋ ماقساتتارىنا قول جەتكىزۋ – قازاقستان ءۇشىن ۇلتتىق باسىمدىق. استانا ەىۇ-عا اعىمداعى توراعالىق ەتۋ كەزەڭىندە ساۋدا كەدەرگىلەرىن جويۋ, لوگيستيكالىق ءوزارا بايلانىستى دامىتۋ, ستاندارتتاردى بىرىزدەندىرۋ جانە وڭىردەگى ەكونوميكالىق ينتەگراتسياعا ىقپال ەتەتىن تسيفرلىق پلاتفورمالار ازىرلەۋ ماسەلەلەرىن ىلگەرىلەتۋگە باعىتتالعان», دەپ اتاپ ءوتتى ول.
ساپار بارىسىندا تۇرىكمەنستان باسشىلىعىمەن ەكىجاقتى بىرقاتار كەزدەسۋ ءوتتى. قازاقستان دەلەگاتسياسىنىڭ باسشىسىن پرەزيدەنت س.گ. بەردىمۇحامەدوۆ قابىلدادى. مينيسترلەر كابينەتى توراعاسىنىڭ ورىنباسارى – سىرتقى ىستەر ءمينيسترى راشيد مەرەدوۆ, مينيسترلەر كابينەتى توراعاسىنىڭ ورىنباسارى نوكەرگۋلى اتاگۋلىەۆ جانە باسقا دا وكىلدەرمەن ەكىجاقتى كەلىسسوزدەر جۇرگىزىلدى.
تۇرىكمەنستان باسشىسىمەن اڭگىمە بارىسىندا عالىمجان قويشىباەۆ الداعى جوعارى دەڭگەيلى كەزدەسۋلەرگە دايىندىق بويىنشا اتقارىلىپ جاتقان ءىس-شارالار تۋرالى حاباردار ەتتى. ول مەملەكەتتەر كوشباسشىلارى اراسىنداعى بەلسەندى ساياسي ديالوگتىڭ ارقاسىندا سوڭعى ۋاقىتتا قازاق-تۇرىكمەن قارىم-قاتىناسى كوپجوسپارلى ءوزارا ءىس-قيمىلدىڭ ساپالى جاڭا دەڭگەيىنە كوتەرىلگەنىن اتاپ ءوتتى.
قازاقستاننىڭ ونەركاسىپ, ەنەرگەتيكا, كولىك جانە لوگيستيكا, اۋىل شارۋاشىلىعى جانە باسقا دا سالالارداعى بولاشاعى زور جوبالاردى ىسكە اسىرۋ ءۇشىن «جاسىل ءدالىز» اشۋعا ىقپال ەتۋگە ۇمتىلىسىنا نازار اۋدارىلدى. گاز سالاسىنداعى جوبالاردى بىرلەسىپ ىسكە اسىرۋ ەكىجاقتى ەكونوميكالىق ارىپتەستىكتى ودان ءارى دامىتۋدا بەرىك نەگىز بولا الاتىنى اتاپ ءوتىلدى.
سونىمەن قاتار فورۋم اياسىندا يران يسلام رەسپۋبليكاسىنىڭ ۆيتسە-پرەزيدەنتى حاميد پوۋر موحامماديمەن كەلىسسوزدەر جۇرگىزىلدى. تاراپتار بارلىق دەڭگەيدەگى ەكىجاقتى كەزدەسۋلەردىڭ جوعارى سەرپىنىن, كوپجاقتى فورماتتاعى ءوزارا ءىس-قيمىلدىڭ قارقىندىلىعىن, سونداي-اق ەكى ەل اراسىنداعى ساۋدا-ەكونوميكالىق ىنتىماقتاستىقتىڭ ايتارلىقتاي الەۋەتىن اتاپ ءوتتى.
