جالپاق جۇرتقا ونەگە بولاتىن اكتسيا ارشالى اۋدانىندا دا جالعاسىن تاپتى. ءىس-شاراعا وبلىس اكىمى مارات احمەتجانوۆ تا قاتىسىپ, ارشالى كەنتىندەگى دەنە شىنىقتىرۋ-ساۋىقتىرۋ كەشەنىنىڭ اۋماعىنا ەلمەن بىرگە 100 تۇپتەن استام قىلقان جاپىراقتى اعاش كوشەتتەرىن وتىرعىزدى.
–ەلىمىزدە ءوتىپ جاتقان «تازا قازاقستان» ەكولوگيالىق اكتسياسى شەڭبەرىندە قىرۋار جۇمىستار اتقارىلۋدا, – دەدى وبلىس اكىمى, – بۇل – ەلىمىزدىڭ بولاشاعى مەن كەلەر ۇرپاقتىڭ ساۋلىعى ءۇشىن جاسالىپ جاتقان ماڭىزدى قادام. مەملەكەت باسشىسى قاسىم-جومارت توقاەۆ تا تاياۋدا ەكوفەستيۆالگە قاتىسىپ, حالىقتى تابيعاتتى ايالاپ, تۋعان جەردىڭ تازالىعىن ساقتاۋعا شاقىردى. «تازا قازاقستان» تەك قوقىس جيناۋ عانا ەمەس تۇپتەپ كەلگەندە ءار ادامنىڭ تۋعان جەرىنە دەگەن جاناشىرلىعى.
اۋدان تۇرعىندارى دا باعالى باستامانى ءبىراۋىزدان قولداپ, مۇنداي شارانىڭ ايرىقشا ماڭىزدى ەكەنىن ايتۋدا. ءسوز سوڭىندا «تازا قازاقستان» اكتسياسى اياسىندا 2025 جىلعا دەيىن وبلىستا ەكى مىڭ گەكتار اۋماققا 14 ميلليون ءتۇپ كوشەت ەگۋ جوسپارلانىپ وتىرعاندىعىن ايتا كەتۋ پارىز.
اقمولا وبلىسى.
