«تازا قازاقستان» رەسپۋبليكالىق ەكولوگيالىق اكتسياسىنىڭ ءبىر باعىتى «جاسىل ايماق» ءىس-شاراسىنىڭ ماقساتى – قورشاعان ورتا مەن تۇرعىندار ءۇشىن قولايلى جاعدايلاردى قامتاماسىز ەتۋ, ازاماتتىق جاۋاپكەرشىلىكتى ارتتىرۋ, ەكولوگيالىق سانا مەن ەكولوگيالىق مادەنيەتتى قالىپتاستىرۋ. كەگەن ورمان شارۋاشىلىعى مەملەكەتتىك مەكەمەسى مەملەكەت باسشىسى قاسىم-جومارت توقاەۆتىڭ باستاماسىمەن 2024 جىلدان باستاپ وسى اكتسياعا بەلسەنە قاتىسىپ كەلەدى.
«بۇگىن كەگەن ورمان شارۋاشىلىعى مەملەكەتتىك مەكەمەسىنىڭ جالاڭاش ورمانشىلىعىندا وسى وڭىرگە بەيىمدەلگەن ورمانشىلار, مەكتەپ وقۋشىلارى, كوللەدج ستۋدەنتتەرى, اۋىل تۇرعىندارىنىڭ قاتىسۋىمەن شرەنك شىرشاسى مەن بوز ارشا ەگىلدى. تەك وتىرعىزىپ قانا قويماي, ءبىز ارى قاراي دا كۇتىپ, باپتاۋ جۇمىستارىن جۇرگىزەمىز», دەيدى الماتى وبلىسى تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى قانات نۇسىپباەۆ.
«كەگەن ورمان شارۋاشىلىعى» كوممۋنالدىق مەملەكەتتىك مەكەمەسىنىڭ ۇيىمداستىرۋىمەن جالاڭاش ورمان شارۋاشىلىعىندا شرەنك شىرشاسىنىڭ 10 مىڭ كوشەتى, 1000 دانا قاراعاي, 200 دانا بوز ارشا اعاشىنىڭ كوشەتى ەگىلدى.
«تازا قازاقستان» اكتسياسى ءبىزدىڭ مەكەمەنىڭ جۇمىس باعىتىمەن ۇندەس. سوندىقتان العاشقى كۇننەن باستاپ, حالىق اراسىنداعى ەكولوگيالىق مادەنيەتتىڭ دەڭگەيىن ارتتىرۋ, ازاماتتاردى قورشاعان ورتانى قورعاۋ ماسەلەلەرىنە بەلسەندى تارتۋ باعىتىنداعى جۇمىستارعا اتسالىسىپ كەلەمىز. بۇعان دەيىن جالاڭاش اۋىلىنداعى «تازا قازاقستان» ەكولوگيالىق اكتسياسى بويىنشا س.بەيسەمبەت ۇلى اتىنداعى مەكتەپ وقۋشىلارىنىڭ قاتىسۋىمەن تۇقىمداردى كونتەينەرلەرگە وتىرعىزۋ ارقىلى كوشەت ءوسىرۋ شاراسى وتكىزىلىپ, «تابيعاتتى ايالاۋ - بولاشاققا جاساعان قامقورلىق» اتتى تاقىرىپپەن قۇستار ۇياسى ءىلىندى. كوگالداندىرۋ پلانتاتسياسىنا 10 000 شرەنك شىرشاسىنىڭ كوشەتى, 1000 قاراعاي, 200 بوز ارشا وتىرعىزىلدى. الداعى ۋاقىتتا «بۇلاق كورسەڭ كوزىن اش», «تۇقىم جيناۋ», «تۇقىمدى سەبۋ, ءوسىرۋ» اكتسيالارى جۇزەگە اسپاق. سونىمەن قاتار جالاڭاش اۋىلىنداعى تۇقىمباقتا ءوسىرىلىپ جاتقان ەكپە كوشەتتەردى كۇتىپ باپتاۋ اكتسيالارىن وتكىزەمىز دەگەن جوسپارىمىز بار», دەيدى «كەگەن ورمان شارۋاشىلىعى» كوممۋنالدىق مەملەكەتتىك مەكەمەسىنىڭ ديرەكتورى ايبولات سولتانعازيەۆ.
مەكەمە ديرەكتورىنىڭ ايتۋىنشا جالاڭاش اۋىلىنداعى تۇقىمباق اعاش تۇقىمدارىن دايىنداۋ, ءوسىرۋ باعىتىندا جۇمىس ىستەيتىن ەلىمىزدەگى ەڭ ءىرى تۇقىمباقتاردىڭ ءبىرى. مۇندا وسىرىلگەن اعاش كوشەتتەرى بۇگىندە اۋدان, وبلىس كولەمىندەگى سۇرانىستى قامتاماسىز ەتىپ وتىر.
مەملەكەت باسشىسى قاسىم-جومارت توقاەۆتىڭ 2020 جىلعى 1 كىركۇيەكتەگى جولداۋىندا ايتىلعان مەملەكەتتىك ورمان قورىنا 2 ميلليارد اعاش وتىرعىزۋ تاپسىرماسىن ورىنداۋ ماقساتىندا مەكەمەنىڭ بازالىق جانە ۋاقىتشا تۇقىمباعىنان باقاناس, نارىنقول, كەگەن اۋداندارىنا وتىرعىزۋ ءۇشىن 325,5 مىڭ شرەنك شىرشاسىنىڭ 4 جىلدىق ەكپە كوشەتتەرى بەرىلگەن.
«تازا قازاقستان» ەكولوگيالىق اكتسياسى, جالپىحالىقتىق اعاش ەگۋ كۇنىنە اۋدان, وبلىس كولەمىنە 1000 ءتۇپ توڭ توپىراعىمەن ءار ءتۇرلى توپتاعى اعاشپەن قامتاماسىز ەتكەن. بۇل اعاشتاردىڭ باسىم بولىگى بۇگىن كەگەن اۋدانىندا وتكەن «بۇكىلقازاقستاندىق اعاش ەگۋ كۇنى» اكتسياسىندا ەگىلدى.
كەگەن ورمان شارۋاشىلىعى مەملەكەتتىك مەكەمەسى 2025 جىلى ورماندى مولىقتىرۋ بويىنشا تاۋلى ايماققا 20 گەكتار جەرگە 80,0 مىڭ دانا, 22 گا جەرگە تولىقتىرۋ جۇمىستارىنا 25,0 مىڭ دانا شرەنك شىرشاسىنىڭ كوشەتىن وتىرعىزۋدى جوسپارلاپ وتىر. كوگالداندىرۋ پلانتاتسياسىنا 3,0 گا جەرگە 30,0 مىڭ دانا شرەنك شىرشاسىنىڭ كوشەتتەرى وتىرعىزىلىپ, 0,6 گا جەرگە تۇقىمى سەبىلمەكشى. قازىرگى كەزدە 3,0 گەكتار جەردە 2 ملن 970 مىڭ 600 ەكپە كوشەتتەرى كۇتىپ باپتالۋدا.
