ىمداۋ ءتىلى – قوعامنىڭ تولىققاندى داۋىسى
ماڭىزدى ءارى تاريحي قادامداردىڭ ءبىرى رەتىندە ىمداۋ ءتىلىن تولىققاندى لينگۆيستيكالىق جۇيە رەتىندە تانۋ ۇسىنىلىپ وتىر. بۇل تەك فورمالدى وزگەرىس ەمەس – بۇل تەڭدىك پەن قۇرمەتتىڭ ناقتى بەلگىسى. جاڭا نورما ىمداۋ ءتىلىن ءبىلىم بەرۋ, دەنساۋلىق ساقتاۋ, سوت جۇيەسى جانە باسقا دا سالالاردا رەسمي تۇردە قولدانۋعا قۇقىقتىق نەگىز قالىپتاستىرادى. بۇل – ەستۋ جانە سويلەۋ قابىلەتى بۇزىلعان ادامدارعا قوعامدىق ومىرگە تولىققاندى قاتىسۋعا مۇمكىندىك بەرەدى. ىمداۋ ءتىلى قوسالقى قۇرال رەتىندە ەمەس, ويدى, سەزىمدى جانە قۇقىقتى ءبىلدىرۋدىڭ تەڭ مۇمكىندىگى بار ءتاسىلى رەتىندە مويىندالادى, بۇل شىنايى ينكليۋزياعا جول اشادى.
شەكتەۋسىز تاڭداۋ: وتەماقى مەحانيزمى – تەڭ قولجەتىمدىلىك جولى
زاڭ جوبالارىندا مۇگەدەكتىگى بار ادامداردىڭ تاۋارلار مەن قىزمەتتەردى تۇتىنۋ سالاسىندا مۇمكىندىكتەرىن كەڭەيتۋگە ەرەكشە ءمان بەرىلگەن. الەۋمەتتىك كودەكسكە ۇسىنىلىپ وتىرعان تۇزەتۋلەر شەڭبەرىندە ساتىپ الىنعان تاۋارلار مەن قىزمەتتەر ءۇشىن جۇمسالعان شىعىنداردى وتەۋ تەتىگىن ەنگىزۋ كوزدەلەدى. بۇل شەشىم تەك قارجىلىق جۇكتەمەنى جەڭىلدەتىپ قانا قويماي, بيۋروكراتيالىق كەدەرگىلەردى جويىپ, ءار ادامعا ءوزىنىڭ ناقتى قاجەتتىلىگىنە ساي تاڭداۋ جاساۋ مۇمكىندىگىن بەرەدى. وتەماقى تەتىگى ساپالى ءارى قولجەتىمدى تاۋارلارعا جول اشادى, كۇندەلىكتى ءومىردى جايلى ەتىپ, تاڭداۋ ەركىن ءارى سانالى بولۋىنا مۇمكىندىك بەرەدى.
ناقتى قاجەتتىلىكتەرگە ساي تۇرعىن ءۇي
تۇرعىن ءۇي زاڭناماسىنا دا ەلەۋلى وزگەرىستەر ەنگىزۋ ۇسىنىلۋدا. «تۇرعىن ءۇي قاتىناستارى تۋرالى» زاڭعا مۇگەدەكتىگى بار ادامداردى قوسا العاندا ازاماتتاردىڭ الەۋمەتتىك تۇرعىن ۇيگە قولجەتىمدىلىگىن ارتتىرۋدى كوزدەيتىن تۇزەتۋلەر ەنگىزىلەدى. ماڭىزدى قادامداردىڭ ءبىرى – قۇرىلىس كومپانيالارىنا جاڭا تۇرعىن ءۇي كەشەندەرىنەن الەۋمەتتىك تۇرعىن ءۇي ءۇشىن پاتەرلەر ءبولۋ مىندەتىن جۇكتەۋ. بۇل الەۋمەتتىك وسال توپتارعا تۇرعىن ءۇي الۋ كەزەگىن قىسقارتۋعا جانە تۇرعىن ءۇيدىڭ قولجەتىمدىلىگىن ەداۋىر ارتتىرۋعا مۇمكىندىك بەرەدى. قۇرىلىس كومپانيالارىنا ارنالعان مەملەكەتتىك جەڭىلدىكتەر بۇل ۇدەرىستى ءادىل ءارى ءتيىمدى ەتىپ, قولجەتىمدى تۇرعىن ءۇي وبەكتىلەرىنىڭ تۇراقتى اعىمىن قامتاماسىز ەتەدى.
زەينەتاقى جانە قامقورلىق: ەرەكشە جاعدايلاردى ەسكەرگەن الەۋمەتتىك قولداۋ
زەينەتاقى زاڭناماسىنا ەنگىزىلەتىن تۇزەتۋلەردىڭ ءبىرى – مۇگەدەكتىگى بار ازاماتتار ءۇشىن 53 جاستان باستاپ زەينەتكە شىعۋ قۇقىعىن بەلگىلەۋ. سونىمەن قاتار, مۇگەدەكتىگى بار بالانى تاربيەلەپ وتىرعان اتا-انالارعا قوسىمشا جەڭىلدىكتەر قاراستىرىلىپ وتىر. بۇل – كۇندەلىكتى قيىندىقتارعا تاپ بولىپ, ەرەكشە قامقورلىقتى قاجەت ەتەتىن وتباسىلار ءۇشىن ايتارلىقتاي قولداۋ. بۇل شارالار الەۋمەتتىك جاۋاپكەرشىلىك پەن مەملەكەتتىڭ ەرەكشە جاعدايدا ءومىر سۇرەتىن ازاماتتارعا دەگەن قامقورلىعىن ايقىن كورسەتەدى.
ينكليۋزيۆتى كولىك جۇيەسى
كولىك قوزعالىسى سالاسىنداعى زاڭنامالىق وزگەرىستەردىڭ قاتارىندا «ارنايى باسقارۋ جۇيەسى بار اۆتوكولىك» ۇعىمىن ەنگىزۋ بار. بۇل – مۇگەدەكتىگى بار ادامدارعا ارنالعان كولىك قۇرالدارىن ناقتى ايقىنداۋعا مۇمكىندىك بەرەدى. مۇنداي كولىكتەر مىندەتتى تۇردە تىركەلىپ, ارنايى تاڭبالارمەن بەلگىلەنۋى ءتيىس. جول قوزعالىسىنا قاتىسۋشىلار ءۇشىن اتالعان كولىكتەرگە ارنالعان قاۋىپسىزدىك شارالارىن ەنگىزۋ تەك قاۋىپسىزدىكتى قامتاماسىز ەتىپ قانا قويماي, مۇگەدەكتىگى بار ازاماتتاردىڭ قۇقىقتارىنا قۇرمەتپەن قاراۋدى دا بىلدىرەدى.
قولجەتىمدى ونەر – كەدەرگىسىز ورتا
مادەنيەت سالاسىنداعى وزگەرىستەر مۇمكىندىگى شەكتەۋلى ادامدار ءۇشىن مادەني ءىس-شارالارعا قولجەتىمدىلىكتى ارتتىرۋعا باعىتتالعان. اتاپ ايتقاندا, تەاتر قويىلىمدارى مەن باسقا دا مادەني شارالاردا ىمداۋ ءتىلىن جانە سۋبتيترلەردى قولدانۋ جوسپارلانۋدا. بۇل ەستۋ قابىلەتى بۇزىلعان ءاربىر ادامعا ەلدىڭ مادەني ومىرىنە بەلسەندى قاتىسۋعا, ەستەتيكالىق جانە زياتكەرلىك ءلاززات الۋعا تەڭ مۇمكىندىك بەرەدى.
قورىتىندى
ۇسىنىلىپ وتىرعان باستامالار – بۇل جاي عانا تەحنيكالىق تۇزەتۋلەر ەمەس, بۇل – ءار ادامعا تەڭ قۇقىق پەن مۇمكىندىك بەرەتىن ينكليۋزيۆتى قوعام قۇرۋعا باعىتتالعان سانالى قادام. بۇل وزگەرىستەر زاڭنامالىق دەڭگەيدە بەكىتىلىپ, مۇگەدەكتىگى بار ادامداردىڭ قۇقىقتارى قۇرمەتتەلەتىن جانە باعالاناتىن قوعامنىڭ نەگىزىن قالايدى. پارلامەنتتە الداعى ۋاقىتتا وتەتىن تۇزەتۋلەردى تالقىلاۋ – وسى يدەيالاردى ىسكە اسىرۋداعى ماڭىزدى كەزەڭى. بۇل – ءار جۇرەككە ءۇمىت ۇيالاتار, ادىلەت پەن تەڭدىكتى تۋ ەتكەن جاڭا ءداۋىردىڭ باستاۋى, مۇندا ءار داۋىس – قوعامنىڭ اجىراماس اۋەنى, ءار جان – وسى اۋەننىڭ ماڭىزدى ءۇنى بولماق.
ەڭلىك باينازاروۆا, الەۋمەتتىك جوبالار جانە قوعامدىق باستامالار ورتالىعىنىڭ ساراپشىسى
