كومپانيا 2018 جىلدان بەرى «جاسىل ەكونوميكا» تالاپتارىنا ساي ەكولوگيالىق باعدارلاما ازىرلەپ, ونى كەزەڭ-كەزەڭىمەن جۇزەگە اسىرىپ كەلەدى. وسى جولى كەنىشتىڭ دايىن ونىمدەردى ساقتايتىن قويماسى مەن رۋدنىي قالاسىنىڭ ارالىعىنا 1000 ءتۇپ كوشەت ەگىلدى.
«تال ەگىپ, كوشەت وتىرعىزۋ ءبىرازدان بەرى قالىپتاسقان داستۇرىمىزگە اينالدى. مۇنداي اكتسيالار جىل سايىن ۇيىمداستىرىلادى. وتكەن جىلى 17 مىڭنان اسا, بيىل 14 مىڭ اعاش وتىرعىزدىق. بۇگىن تاعى 1 مىڭ كوشەت ەكتىك. قورشاعان ورتانى كوگالداندىرۋ «ERG» كومپانياسىنىڭ ۇزاقمەرزىمدى ەكولوگيالىق ستراتەگياسىنا نەگىزدەلگەن», دەيدى سسكوب باس ەكولوگى اناتولي دۆورنيچەنكو.
سەنبىلىككە قاتىسقان كوللەدج ستۋدەنتتەرىنىڭ دەنى وقۋىن تامامداعان سوڭ, اتالعان كەنىشكە جۇمىسقا ورنالاسپاق. بىرلەستىك ەكولوگتەرى, مەردىگەر مەكەمەلەردىڭ قىزمەتكەرلەرى, ەرىكتى ستۋدەنتتەر بار شارۋانى ءبىر ساعاتقا جەتەر-جەتپەس ۋاقىتتا تىندىرىپ تاستادى.
ء«بىز كاسىپورىن ايماعىن جىل سايىن كوگالداندىرىپ وتىرامىز. ەكوجۇيەنى, اۋانىڭ تازالىعىن جاقسارتۋعا تىرىسامىز. ونەركاسىپتىڭ قورشاعان ورتاعا كەرى اسەر ەتەتىنىن جوققا شىعارۋعا بولمايدى. الايدا بۇل اسەردى ازايتۋ, اۋا قۇرامىنداعى زياندى ەلەمەنتتەردى جويۋ باعىتىندا كەشەندى ءىس-شارالار اتقارىلادى. اينالانى كوگالداندىرۋ – سول كوپ ءادىستىڭ ءبىرى عانا», دەيدى كاسىپورىننىڭ ەكولوگيا جونىندەگى ساراپشىسى يگور گونتارەنكو.
جاس تال تامىرى تەرەڭگە بويلاپ, جاپىراعى جايقالعانشا كاسىپورىن ەكولوگتەرىنىڭ كۇتىمىندە بولادى. ەكولوگ-مامانداردىڭ ايتۋىنشا, وتكەن جىلى وتىرعىزىلعان 17 مىڭ كوشەتتىڭ 80%-دان استامى تامىر جايىپ ۇلگەرگەن. قۋراپ قالعان اعاشتاردىڭ ورنىنا بيىل جاڭا كوشەتتەر ەگىلگەن.
قوستاناي وبلىسى
