سۋرەتتى تۇسىرگەن – اۆتور
سونىمەن قاتار ات سپورتى كەشەنىندە ساداق اتۋ, تەڭگە ءىلۋ, اۋدارىسپاق سىندى ۇلتتىق سپورت تۇرلەرىنەن دە جارىس بولدى. وبلىستىڭ ءار وڭىرىنەن اكەلىنگەن 14 سايگ ۇلىك تورەشىلەر مەن كورەرمەندەردىڭ تاڭداۋىنا ۇسىنىلدى. قازاقتىڭ جابى تۇقىمىنان باستاپ, اقالتەكە, اعىلشىن, ورلوۆ سايگ ۇلىكتەرىنە دەيىن سىنعا ءتۇستى. باس جۇلدە وسكەمەندىك الەكساندرا پوپوۆانىڭ ارعىماعىنا بۇيىردى.
بۇل ءىس-شارادا يپپوتەراپيا باعىتىنداعى جۇمىستار دا تانىستىرىلدى. «تيتان» كەشەنىندە 2009 جىلدان بەرى ەرەكشە بالالار ءۇشىن اتپەن ساۋىقتىرۋ ساباقتارى وتكىزىلىپ كەلەدى. قازىر مۇندا 130-دان استام بالا يپپوتەراپيا قىزمەتىن الادى. اتپەن ەمدەۋ جۇيكەگە, بۇلشىق ەتكە جانە پسيحولوگيالىق جاعدايعا وڭ اسەر ەتىپ, بالالاردىڭ دەنساۋلىعىن تۇزەۋگە كومەكتەسەدى.
مەرەكەلىك ءىس-شارادا ءوڭىر ونەرپازدارى ءان مەن كۇيدەن شاشۋ شاشىپ, كيىز ۇيلەردە ۇلتتىق تاعامدار ۇسىنىلدى. قولونەر بۇيىمدارىنىڭ كورمەسى دە ۇيىمداستىرىلدى.
ءوڭىر اكىمى نۇرىمبەت ساقتاعانوۆ ات سپورتىنىڭ دامۋىنا نازار اۋدارىپ, شىعىس قازاقستان شاباندوزدارىنىڭ حالىقارالىق جارىستاردا جەتكەن جەتىستىكتەرىن ەرەكشە اتاپ ءوتتى.
وبلىس باسشىسى نۇرىمبەت ساقتاعانوۆتىڭ ايتۋىنشا, وسكەمەندەگى «تيتان» ات سپورت كلۋبىنداعى يپپوتەراپيا ءادىسى شىعىس قازاقستان وبلىسىنىڭ باسقا دا اۋداندارىندا ۇيىمداستىرىلۋعا ءتيىس. بيىل جوبانى ريددەر قالاسىندا, ۇلان اۋدانىندا جۇزەگە اسىرۋ جوسپارلانىپ وتىر.
– قازاقستان پاراليمپيادا قۇراماسىنىڭ قۇرامى جەتى ادامنان تۇرسا, ونىڭ التاۋى ءبىزدىڭ سپورتشىلارىمىز ەكەنىن ەرەكشە ماقتانىشپەن اتاپ وتكىم كەلەدى. جىلدا ولار حالىقارالىق جارىستاردا تەك ءبىرىنشى ورىنداردان كورىنەدى. ارنايى وليمپيادا باعدارلاماسىنداعى ات سپورتى ەرەكشە ماقتانىشقا لايىق. ءبىزدىڭ كوماندا لوس-اندجەلەستەگى بۇكىلالەمدىك جازعى ويىندارعا, ماسكەۋدە وتكەن حالىقارالىق جارىستارعا قاتىسىپ, ەكى التىن, بەس كۇمىس جانە ءبىر قولا مەدال جەڭىپ الدى, – دەدى وبلىس اكىمى.
2009 جىلدان باستاپ اتالعان كلۋب ەرەكشە بالالار دەنساۋلىعىن قالپىنا كەلتىرۋدىڭ جاڭا باعىتىن ءساتتى جۇزەگە اسىرىپ, يپپوتەراپيا ءادىسىن قولدانۋ ارقىلى ساۋىقتىرۋ ساباقتارىن وتكىزەتىن ادىستەمەلىك ورتالىققا اينالدى.
– بۇگىنگى سايىستىڭ ماقساتى – ادامداردىڭ اتقا دەگەن قىزىعۋشىلىعىن كورسەتۋ. ات باپتاۋداعى مادەنيەتتى قالىپتاستىرۋ, سوندىقتان تالاپتار سپورتتىق دايىندىققا ەمەس, ارعىماقتىڭ كۇتىمىنە بايلانىستى قويىلعان. جال-قۇيرىعى تارالعان, تىنىسى اشىلعان سايگ ۇلىكتەر جەڭىسكە جەتەدى, – دەدى وبلىستىق ات سپورتى فەدەراتسياسىنىڭ ديرەكتورى ەكاتەرينا رۋدەنكو.
ۇيىمداستىرۋشىلاردىڭ ايتۋىنشا, ارعىماقتاردىڭ مۇنداي كورمەسى ءداستۇرلى تۇردە ۇيىمداستىرىلىپ تۇرۋى مۇمكىن. بيىل وسكەمەن ءوڭىرىنىڭ تۇلپارى توپ جارسا, كەلەر جىلى باسقا جاقتىڭ جىلقىسى جەڭىسكە جەتۋى مۇمكىن.
وسكەمەن
