ونىڭ ايتۋىنشا, مەملەكەت باسشىسى حالىققا جولداۋىندا فارماتسەۆتيكا سالاسىن دامىتۋدى ستراتەگيالىق باعىت رەتىندە ايقىنداپ, ۇكىمەتكە وتاندىق ءوندىرىستىڭ ۇلەسىن 50 پايىزعا جەتكىزۋ مىندەتىن ناقتى قويعانىمەن, بۇل تاپسىرمانىڭ ورىندالۋ بارىسى كوڭىل كونشىتپەيدى.
«جالپى قازاقستاندا 97 فارماتسەۆتيكالىق ءوندىرۋشى جۇمىس ىستەيدى, ونىڭ 34-ءى دارىلىك زاتتاردى شىعارۋعا جانە 63-ءى مەديتسينالىق ماقساتتاعى بۇيىمدار وندىرىسىنە ماماندانعان. پارلامەنت ماجىلىسىنە وتاندىق فارماتسەۆتيكالىق تاۋار وندىرۋشىلەر توبى (بۇدان ءارى – كومپانيالار) جۇگىندى. ولار مينيسترلىك پەن كوميتەت تاراپىنان فارماتسەۆتيكا ونەركاسىبى سالاسىنداعى بيۋروكراتيالىق قيىندىقتارعا تاپ بولىپ وتىر. كومپانيالار دارىلىك زاتتاردى شىعارىپ, ولاردى ەمدەۋ مەكەمەلەرىنە جەتكىزۋمەن اينالىسادى. ولار ءۇشىن تۋىنداپ وتىرعان پروبلەمالاردىڭ نەگىزگى سەبەبى – وندىرىلگەن دارىلىك زاتتاردىڭ ساۋدالىق اتاۋىنا شەكتى باعالاردى بەكىتۋ تۋرالى مينيسترلىكتىڭ №№ 77, 88 جانە 96 بۇيرىقتار تىزبەسىنە ەنگىزىلۋ پروتسەسىنىڭ نەگىزسىز, ۇزاق ۋاقىتقا سوزىلۋى», دەدى دەپۋتات.
قايرات بالابيەۆتىڭ پىكىرىنشە, مۇنداي كىدىرىستەر تەك ءوندىرىستى تەجەپ قويماي, جاڭا دارىلىك زاتتاردىڭ ەمدەۋ مەكەمەلەرىنە ۋاقىتىندا جەتپەۋىنە, ال بۇل ءوز كەزەگىندە حالىق دەنساۋلىعىنا قاۋىپ توندىرۋىنە الىپ كەلىپ وتىر.
«مينيسترلىكتىڭ جوعارىدا اتالعان بۇيرىقتاردى بەكىتۋ ءتارتىبىن ساقتاماۋى «سك فارماتسيا» جشس-ءنىڭ بىرىڭعاي ديستريبيۋتورىنا مەديتسينالىق بۇيىمداردى ۋاقتىلى شىعارۋعا جانە جەتكىزۋگە كەدەرگى كەلتىرەدى. وسىعان بايلانىستى ينۆەستيتسيالىق جوبالاردى ىسكە قوسۋ مەرزىمى 1 جىلدان باستاپ 9 جىلدى قۇرايدى. مۇنداي قيىندىقتار ولاردىڭ قالىپتى قىزمەتىن دامىتۋعا, سونداي-اق ينۆەستيتسيالىق جوبالاردى ىسكە اسىرۋعا جانە جاڭعىرتۋعا كەدەرگى كەلتىرەدى. كومپانيالار شىعارىلاتىن ءونىم تىزبەسىنىڭ ءتيىستى بۇيرىقتارعا ەنگىزىلۋىنىڭ نەگىزسىز كەشىكتىرىلۋىنە بايلانىستى مينيسترلىك پەن كوميتەتكە بىرنەشە رەت جۇگىنگەن. مينيسترلىكتىڭ دەرەكتەرى بويىنشا, شىعارىلاتىن ونىمگە قاتىستى بارلىق ماسەلەلەر وتاندىق تاۋار وندىرۋشىلەردى قولداۋ بويىنشا قاجەتتى شارالار قابىلداۋ ءۇشىن كوميتەتكە ۋاقتىلى تاپسىرىلادى», دەدى ق.بالابيەۆ.
ونىڭ مالىمەتىنشە, 2022 جىلدان باستاپ قازىرگى ۋاقىتقا دەيىن كوميتەت نەگىزسىز سەبەپتەرمەن مينيسترلىكتىڭ بۇيرىقتارىنا كومپانيالار شىعاراتىن ونىمدەردىڭ تىزبەسىن ەنگىزۋ پروتسەسىن ۇزاققا سوزىپ كەلەدى. باسقا دا وتاندىق فارماتسەۆتيكالىق وندىرۋشىلەر ءدال وسىنداي جاعدايدا. وسىنىڭ سالدارىنان تەراپيانى تۇبەگەيلى وزگەرتەتىن جانە سىرقاتى جازىلمايتىن اۋرۋلاردى ەمدەيتىن جاڭا پرەپاراتتار قازاقستاندىقتارعا كىدىرىپ, وتە كەش جەتەدى.
«ەگەر مينيسترلىك پەن كوميتەتتىڭ وتاندىق وندىرۋشىگە دەگەن قاتىناسى وسىنداي بولعاندا, وندىرىلەتىن ءونىمدى ۆەدومستۆولىق بۇيرىقتارعا ەنگىزۋ پروتسەسى 3 جىلدان 5 جىلعا دەيىن كەشىكتىرىلسە, وندا فارماتسەۆتيكالىق يندۋستريانى مەملەكەتتىك قولداۋ تۋرالى ءسوز قوزعاۋعا دا قاجەتى جوق. وسىعان بايلانىستى, ەلدەگى مەنشىكتى فارماتسەۆتيكالىق ءوندىرىستىڭ ۇلەسى 10 %-دان اسپاي, بۇرىنعى دەڭگەيدە قالىپ وتىر. سونىمەن قاتار, جاساندى تۇردە جاسالعان بيۋروكراتيالىق قيىندىقتار فارماتسەۆتيكا ونەركاسىبىنىڭ قالىپتى جاعدايدا دامۋىنا كەدەرگى كەلتىرىپ قانا قويماي, سونىمەن قاتار جۇمىس ورىندارىنىڭ قىسقارۋ قاۋپىن تۋدىرادى جانە جيىنتىعىندا بانكروتتىققا جانە وندىرىستەردىڭ جابىلۋىنا اكەلەتىنى ءسوزسىز», دەدى دەپۋتات.
ساۋال سوڭىندا قايرات بالابيەۆ ۇكىمەتتەن دارىلىك زاتتار مەن مەديتسينالىق بۇيىمداردى №77, 88 جانە 96 بۇيرىقتاردىڭ تىزبەسىنە ەنگىزۋ پروتسەسىن جەڭىلدەتۋدى جانە دەنساۋلىق ساقتاۋ مينيسترلىگىنە اتالعان بۇيرىقتاردى شۇعىل قايتا قاراۋدى تاپسىرعان ءجون ەكەنىن اتاپ ءوتتى.
«فارماتسەۆتيكا يندۋسترياسى ۇلتتىق ەكونوميكا قۇرىلىمىنداعى نەگىزگى سالانىڭ ءبىرى بولىپ تابىلادى جانە ءتيىمدى مەملەكەتتىك قولداۋ جاسالعان كەزدە يمپورتقا تاۋەلدىلىكتى ازايتۋعا, سونداي-اق ىشكى نارىقتاعى ءدارى-دارمەك باعاسىن تۇراقتاندىرۋعا مۇمكىندىك بەرەدى. سونىمەن, فارماتسەۆتيكا سالاسىندا بارلىق قاجەتتى شەشىمدەردىڭ جەدەل قابىلدانۋى, ال سالانى دامىتۋ ءۇشىن قاجەتتى شارالار كىدىرىسسىز ىسكە اسىرىلۋى ءۇشىن ءتيىستى شارالار قابىلداپ, قولايلى جاعدايلار جاساۋ قاجەت», دەپ تۇيىندەدى دەپۋتات.
