فوتو: Facebook/askhat.aimagambetov
اسحات ايماعامبەتوۆ قازىرگى تاڭدا كەز كەلگەن ءبىلىم بەرۋ باعىتىنا, سونىڭ ىشىندە قازاق فيلولوگياسى, ەتنوگرافيا, مۋزىكا سياقتى سالالارعا ءتۇسۋ ءۇشىن دە اعىلشىن تىلىنەن ەمتيحان تاپسىرۋ مىندەتتى ەكەنىن اتاپ ءوتتى. ونىڭ ايتۋىنشا, بۇل تالاپ كەزىندە ورىندى بولعانىمەن, بۇگىندە تەحنولوگيالىق دامۋ جاعدايىندا بۇل كەدەرگىنى قايتا قاراستىرۋ ماڭىزدى.
«ارينە, عىلىممەن اينالىسۋ ءۇشىن اعىلشىن ءتىلىن ءبىلۋ ماڭىزدى. سەبەبى كۇن سايىن جاريالانىپ جاتقان عىلىمي جاڭالىقتاردىڭ كوپشىلىگى – اعىلشىن تىلىندە. ولاردى وقۋ, ءتۇسىنۋ, پايدالانۋ — ءار زەرتتەۋشىگە قاجەت. سوندىقتان بۇل تالاپ كەزىندە زامانعا ساي, ورىندى شەشىم بولدى. اشىعىن ايتقاندا, بۇل تالاپتى كەزىندە مينيستر بولعاندا قولداعان دا, بەكىتكەن دە ءوزىم بولاتىنمىن. الايدا قازىر جاعداي وزگەردى», دەدى دەپۋتات.
دەپۋتات ەلىمىزدىڭ بەس جىل ىشىندە جاساندى ينتەللەكت داۋىرىنە قادام باسقانىن, سونداي-اق تەحنولوگيالىق رەۆوليۋتسيا ورىن العانىن تىلگە تيەك ەتتى.
«قازىر ChatGPT, Gemini سياقتى قۇرالداردىڭ كومەگىمەن كەز كەلگەن اعىلشىن ءماتىنىن ساناۋلى سەكۋندتا, ساپالى تۇردە قازاق نەمەسە ورىس تىلىنە اۋدارۋعا بولادى. ءيا, اعىلشىن ءتىلى عىلىم ءۇشىن ءالى دە قاجەت. قاجەت بولادى دا. بىراق قازىرگى تەحنولوگيالاردىڭ ارقاسىندا بۇل تالاپ ماگيستراتۋراعا تۇسۋگە كەدەرگى بولماۋى ءتيىس. ويتكەنى ەندى وسى تەحنولوگيالارمەن, جاستار عىلىمي جۇمىسىن باستاي الادى. ونىڭ ۇستىنە, شىنى كەرەك, ايتىلعان تالاپ ستۋدەنتتەردىڭ تىلدىك دەڭگەيىن ايتارلىقتاي كوتەرە العان جوق», دەدى ا.ايماعامبەتوۆ.
دەپۋتاتتىن پىكىرىنشە, ەڭ قيىنى – قازاق ادەبيەتى مەن ونەرىن زەرتتەگىسى كەلەتىن جاستار اعىلشىن ەمتيحانىنان وتە الماعانى ءۇشىن ماگيستراتۋرا مەن دوكتورانتۋراعا تۇسە الماي ءجۇر. بۇل رەتتە ول اعىلشىن ءتىلىن قولداي وتىرىپ, تالاپتاردى وزگەرتۋ قاجەتتىگىن ايتتى.
وسىعان بايلانىستى دەپۋتات بىرنەشە ناقتى ۇسىنىس جاسادى:
- اعىلشىن ءتىلىن مەكتەپتەن باستاپ ساپالى تۇردە وقىتۋدى كۇشەيتۋ;
- قازاق جانە ورىس تىلدەرىندە وقىتىلاتىن باعىتتاردا اعىلشىن تىلىنەن ەمتيحاندى وقۋ اياقتالعان سوڭ تاپسىرۋدى قاراستىرۋ;
- اعىلشىن تىلىندە وقىتاتىن جانە قوسديپلومدى باعدارلامالار ءۇشىن بۇل تالاپتى كەرىسىنشە كۇشەيتۋ;
- عىلىمي ماقالالاردى حالىقارالىق بازالاردا جاريالاۋ تالابىن ماماندىقتىڭ ەرەكشەلىگىنە قاراي سارالاۋ. قازاق فيلولوگياسى, مۋزىكا سياقتى باعىتتاردا بالاما جولدار ۇسىنۋ.
«باستىسى – ديسسەرتاتسيانىڭ ساپاسى مەن عىلىمي ورتاعا قوسقان ناقتى ۇلەسى ماڭىزدى. ونى كونفەرەنتسيالاردا تالقىلاۋ مەن عىلىمي جۇمىستىڭ ناقتى پايداسى كەرەك. جالپى, بۇل تالاپتاردى ۋنيۆەرسيتەتتەردىڭ اكادەميالىق ەركىندىگى اياسىندا رەتتەگەن دۇرىس دەپ ەسەپتەيمىز», دەدى اسحات ايماعامبەتوۆ.
دەپۋتاتتىڭ ايتۋىنشا, بۇل وزگەرىستەر ءبىلىم بەرۋدى ادىلەتتى, قولجەتىمدى جانە زامان تالابىنا ساي ەتۋگە باعىتتالعان.
