جاڭا كاسىپورىن وڭىردەگى ەڭ ءىرى وندىرىستىك نىسانداردىڭ ءبىرى بولماق. جالپى ينۆەستيتسيا كولەمى – 70 ميلليارد تەڭگە, بۇل قارجىنىڭ بارلىعى كومپانيانىڭ جەكە كاپيتالى ەسەبىنەن قۇيىلعان. زاۋىت جوبالىق قۋاتىنا شىققان سوڭ ەۋرازيا مەن تمد نارىعىنا ساپالى ءونىم جەتكىزۋدى قولعا الادى. زاۋىت ارقىلى قازاقستان بيۋدجەتىنە جىل سايىن شامامەن 25 ميلليارد تەڭگە سالىق تۇسەدى دەپ كۇتىلۋدە.
قازىرگى تاڭدا زاۋىتتا 130 قىزمەتكەر جۇمىس ىستەيدى. الداعى ۋاقىتتا كاسىپورىن كەڭەيگەن سايىن جۇمىس ورىندارىنىڭ سانى ارتادى.
«بۇل زاۋىت – ءبىز ءۇشىن ماڭىزدى قادام. قازاقستان – زور الەۋەتكە يە بولاشاعى بار نارىق. ءبىز بۇل سەرىكتەستىكتىڭ تابىستى بولاتىنىنا سەنىمدىمىز», دەدى «KT&G Kazakhstan» جشس باس ديرەكتورى پاك حيون ۋك.
زاۋىتتاعى ءوندىرىس پروتسەسى تولىقتاي اۆتوماتتاندىرىلعان جانە حالىقارالىق ساپا ستاندارتتارىنا تولىق سايكەس كەلەدى. شيكىزاتتى ساتىپ الۋدان باستاپ, دايىن ءونىمدى وراۋعا دەيىنگى بارلىق كەزەڭدە قاتاڭ باقىلاۋ جۇيەسى جۇمىس ىستەيدى.
الماتى وبلىسىنىڭ اكىمى مارات سۇلتانعازيەۆ بۇل جوبانىڭ ءوڭىر ءۇشىن ماڭىزدىلىعىن ەرەكشە اتاپ ءوتتى.
«KT&G زاۋىتىنىڭ اشىلۋى – جاڭا ءوندىرىستى ىسكە قوسۋ عانا ەمەس. بۇل – قازاقستان مەن كورەيا اراسىنداعى 33 جىلدىق سەرىكتەستىكتىڭ ناتيجەسى جانە الماتى وبلىسىنىڭ ينۆەستيتسيالىق تارتىمدىلىعىنىڭ جارقىن دالەلى. ءبىز حالىقارالىق سەرىكتەستىك ءۇشىن بارلىق جاعدايدى جاساپ, ءبىزدىڭ ءوڭىردى تاڭدايتىن كومپانيالاردى ءاردايىم قولدايمىز», دەدى ءوڭىر باسشىسى.
زاۋىتتىڭ اشىلۋ راسىمىنە 100-دەن استام قۇرمەتتى قوناق قاتىستى. ولاردىڭ اراسىندا كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجو تە-يك پەن KT&G كورپوراتسياسىنىڭ باس ديرەكتورى پان كيونگمان بولدى. قوناقتار ءۇشىن قازاق-كورەي مادەني باعدارلاماسى ۇيىمداستىرىلىپ, ءوندىرىس تسەحتارىنا ەكسكۋرسيا وتكىزىلدى.
جاڭا زاۋىتتىڭ ىسكە قوسىلۋىمەن KT&G ەۋرازيا نارىعىنداعى ءوز پوزيتسياسىن كۇشەيتىپ, قازاقستان ەكونوميكاسىنا قوماقتى ۇلەس قوسۋدا – جۇمىس ورىندارىن اشىپ, ەكسپورتتى قولداپ, جەرگىلىكتى ءوندىرىستى دامىتۋعا اتسالىسۋدا.
الماتى وبلىسى
