اكىم ءۇرتاي ۇلى اشىموۆ (اكىم تارازي) 1933 جىلى 9 قىركۇيەكتە الماتى قالاسىندا دۇنيەگە كەلگەن.
ەڭبەك جولىن 1956 جىلدان باستاعان. جامبىل وبلىسىنىڭ شۋ اۋدانىندا مۇعالىم (1956-1958), «ارا» جۋرنالىندا فەلەتونيست (1958-1959), «قازاقستان پيونەرى» گازەتىندە جاۋاپتى حاتشى (1962-1970), «قازاقفيلم» كينوستۋدياسىندا ستسەناريلىك رەداكتسيالىق القا مۇشەسى, باس رەداكتور, 1970-1971 جىلدارى «ليتەراتۋرنايا گازەتانىڭ» قازاقستان بويىنشا ءتىلشىسى, 1971-1980 جىلدارى قازاقستان كينەماتوگرافيالىق وداعى باسقارماسىنىڭ 1-حاتشىسى بولدى. 1986-1991 جىلدارى قازاقستان جازۋشىلار وداعىنىڭ حاتشىسى, 1991-1993 جىلدارى قازاقستان رەسپۋبليكاسى مادەنيەت مينيسترلىگىنىڭ كەڭەسشىسى, 1993-1995 جىلدارى «قارجى-قاراجات» جۋرنالىنىڭ باس رەداكتورى. 1995 جىلدان ت.جۇرگەنوۆ اتىنداعى ونەر اكادەمياسىنىڭ دوتسەنتى قىزمەتتەرىن اتقاردى.
2009 جىلى استاناداعى قازاق ۇلتتىق ونەر ۋنيۆەرسيتەتىنىڭ پروفەسسورى, قازاقستان جازۋشىلار وداعىنىڭ (2007) فيليال جەتەكشىسى.
اكىم تارازيدىڭ العاشقى شىعارمالار جيناعى «اقبەردىنىڭ اۋلاسى», «بۇلتقا سالعان ۇياسىن», «تاسجارعان» رومانى, «قورقاۋ جۇلدىز» رومانى, «شەر», «قيانات», «مۇستافا شوقاي», ء«تاج», «جاڭبىرلى تۇندەر» روماندارى.
قازاق كينوسىنىڭ التىن قورىنا قوسىلعان كينوتۋىندىلارى: «تۇلپاردىڭ ءىزى», «ارمان اتامان», «قاراش-قاراش», «مۇستافا شوقاي».
قازاق تەاترلارىنىڭ ساحناسىنداعى دراماتۋرگيالىق شىعارمالارى: «كۇلمەيتىن كومەديا», «جاقسى كىسى», «جولى بولعىش جىگىت», «اقىن, پەرىشتە, ماحاببات», «ىندەت», «ماحامبەت», «لاينەر», «ۇكىلى جۇلدىز», «قىز ماحابباتى» ت.ب. جازۋشىنىڭ بىرقاتار دۇنيەلەرى ورىس, قىتاي, پولياك, بولگار, اعىلشىن تىلدەرىنە اۋدارىلدى.
1994 جىلى «قۇرمەت بەلگىسى» وردەنىمەن, 1997 جىلى «قازاقستاننىڭ ەڭبەك سىڭىرگەن قايراتكەرى» مەملەكەتتىك ناگراداسىمەن ماراپاتتالدى. 1999 جىلى قازاقستاننىڭ اباي اتىنداعى مەملەكەتتىك سىيلىقتىڭ لاۋرەاتى, 2011 جىلى فرانتس كافكا اتىنداعى حالىقارالىق ادەبي سىيلىعىنىڭ لاۋرەاتى (پراگا) اتاعىنا يە بولدى, 2015 جىلى «وتان» وردەنى مەملەكەتتىك ناگراداسىن يەلەندى.
