فوتو: اشىق دەرەككوز
العاش رەت بالانىڭ جىنىسىن ءبىلۋدىڭ ەرەكشە ءتاسىلى 2008 جىلى اقش-تا ۇيىمداستىرىلعان. لوس-اندجەلەس قالاسىندا تۇراتىن دجەننا كارۆۋنيديس ەسىمدى بلوگەر تورتتىڭ ءىشىن قىزعىلت تۇسپەن اسەمدەپ, وسىلايشا جاقىندارىنا قىز كۇتىپ وتىرعانىن جاريالاعان.
ءدال وسى كەشتەن كەيىن بۇل ءتاسىل الەۋمەتتىك جەلىلەردە بەلەڭ الىپ, قوعامدا ۆيزۋالدى شوۋعا اينالدى. ءتىپتى, كەيىنگى جىلدارى «Gender party-دىڭ» ماسشتابى ۇلكەيىپ, رەكۆيزيتتەرى دە كۇردەلەنە تۇسكەن.
الايدا, ءبىر وتباسىنىڭ باقىتتى ساتتەرىنىڭ كۋاسى بولعان مەرەكەنىڭ اينالاسىندا بىرنەشە رەزونانس تۋدىراتىن وقيعالار دا پايدا بولعان. ماسەلەن, 2017 جىلى اريزونا شتاتىندا بالانىڭ جىنىسىن انىقتاۋ ءۇشىن وتكىزىلگەن مەرەكە كەزىندە قولدانىلعان پيروتەحنيكالىق قۇرىلعى ورمان ورتىنە سەبەپ بولعان. بۇل وقيعا شامامەن 190 شارشى شاقىرىم ورماندى جەردى كۇلگە اينالدىرعان.
ءدال وسىنداي جاعداي 2019 جىلى كاليفورنيانىڭ ەلدورادو وكرۋگىندە دە قايتالانعان. جىنىستى جاريالاۋ ءۇشىن قولدانىلعان ارنايى ءتۇتىن شىعاراتىن قۇرىلعى 76 شارشى شاقىرىم جەردى جويىپ جىبەرگەن. سالدارىنان جۇزدەگەن وتباسى باسپاناسىز قالعان.
دجەننا كارۆۋنيديس ءوزىنىڭ يدەياسىنان كەيىن بولعان وسىنداي قايعىلى جاعدايلاردى كورىپ, رەنىشىن بىلدىرگەن.
«مەن تەك وتباسىلىق ءساتتى بولىسكىم كەلگەن ەدى. ال قازىر ادامدار ومىرىنە قاۋىپ ءتوندىرىپ جاتىر. ءتىپتى كەيدە جىنىسقا بايلانىستى الالاۋشىلىق كورىنىستەرگە اينالىپ كەتكەنىن كورەمىن» دەگەن ول Elle جۋرنالىنا بەرگەن سۇحباتىندا.
