قۇرلىق اسكەرلەرىنىڭ باس قولباسشىسى گەنەرال-مايور مەرەكە كوشەكباەۆ قورعانىس ۆەدومستۆوسىنىڭ باسشىسىنا جەكە قۇرام مەن تەحنيكانىڭ دايىندىعى تۋرالى باياندادى.
«بولەك جاتتىعۋلار اياقتالۋعا جاقىن. 25 ساۋىردەن باستاپ شەرۋگە قاتىسۋشىلار جاۋىنگەرلىك تەحنيكا مەن اۆياتسيا قاتىساتىن بىرلەسكەن جاتتىعۋلارعا كىرىسەدى. ال 3 جانە 5 مامىرداعى نەگىزگى دايىندىق قازاق ەلى الاڭىندا وتەدى», دەدى گەنەرال-مايور مەرەكە كوشەكباەۆ.
قورعانىس ءمينيسترى جەكە قۇرام مەن مەحانيكالاندىرىلعان لەكتەردىڭ پارادتىق ەسەپتوپتارىنىڭ ءوتۋىن قاداعالادى.
قورعانىس ۆەدومستۆوسىنىڭ باسشىسى اسكەري شەرۋگە قاتىسۋشىلارعا العىسىن ءبىلدىردى.
«بۇگىن سىزدەر ەلىمىزدىڭ قارۋلى كۇشتەرى ءۇشىن ماڭىزدى شاراعا قاتىسۋعا دايىندالىپ جاتىرسىزدار. اسكەري شەرۋ جاي عانا كورىنىس ەمەس, ونىڭ ءرولى قازاقستان ارمياسىنىڭ جاۋىنگەرلىك داستۇرلەرى مەن ەلىمىزدىڭ مادەني مۇراسىن ساقتاۋدا جاتىر. قازاقستاندا اكەلەرى مەن اتالارى مايدانعا كەتپەگەن بىردە-ءبىر وتباسى جوق. سىزدەردىڭ بۇگىنگى ەڭبەكتەرىڭىز – حح عاسىرداعى ەڭ قاندى سوعىستا ەرلىكپەن قازا تاپقان اتا-بابالارىمىزعا دەگەن قۇرمەت», دەدى گەنەرال-پولكوۆنيك رۋسلان جاقسىلىقوۆ اسكەري قىزمەتشىلەرگە سويلەگەن سوزىندە.
ول سونداي-اق لاۋازىمدى تۇلعالاردىڭ نازارىن سانيتارلىق-ەپيدەميولوگيالىق نورمالاردى, تۇرعىلىقتى جەرلەردە بەلگىلەنگەن جىلۋ رەجيمىن ساقتاۋ, جەكە قۇرام ءۇشىن جوعارى كالوريالى تولىق تاماقتانۋدى قامتاماسىز ەتۋ جانە دالا لاگەرىندە ءتارتىپتىڭ جوعارى دەڭگەيىن ساقتاۋ قاجەتتىلىگىنە اۋداردى.
جەڭىستىڭ 80 جىلدىعىنا ارنالعان اسكەر پاراد 7 مامىردا استانانىڭ باستى الاڭىندا وتەدى. وعان 4 مىڭنان استام اسكەري قىزمەتشى, 300-دەن اسا قارۋ-جاراق پەن اسكەري تەحنيكا, ونىڭ ىشىندە سوعىس كەزىندەگى اسكەري تەحنيكانىڭ ۇلگىلەرى مەن مايداندىق, ارميالىق جانە اسكەري-كولىكتىك اۆياتسياسىنىڭ 60-تان استام اۋە كەمەسى قاتىسادى.
