كەزدەسۋ بارىسىندا لوكاليزاتسيالاۋ باعدارلاماسى, سەرۆيستىك قىزمەتتى دامىتۋ, جۇمىس ورىندارىن اشۋ, قازاقستاندىق ينجەنەرلەردى وقىتۋ, سونداي-اق قازاقستاننىڭ تەحنيكا مەن قوسالقى بولشەكتەردى جەتكىزۋ بويىنشا تمد ەلدەرىنە ارنالعان ورتالىق لوگيستيكا حابىنا اينالۋ مۇمكىندىگى تالقىلاندى.
جوبا قوستاناي قالاسىنداعى لوكاليزاتسيا ورتالىعى بازاسىندا جۇزەگە اسىرىلۋدا. ونىڭ اياسىندا ءوندىرىس جانە قىزمەت كورسەتۋ سالالارىندا 350 جاڭا بىلىكتى جۇمىس ورنىن اشۋ كوزدەلگەن. ينۆەستيتسيا كولەمى شامامەن 25 ملرد تەڭگەنى قۇرايدى. قازاقستانداعى رەسمي ديستريبيۋتور Eurasia Group ءۇش سەرۆيستىك ورتالىق سالۋدى جانە دالمە-ءدال ەگىنشىلىك, GPS-ناۆيگاتسيا, فەرمەرلىك شارۋاشىلىقتار مەن سەرۆيستىك ورتالىقتاردا اۆتوماتتاندىرىلعان باسقارۋ جۇيەلەرى سياقتى وزىق تەحنولوگيالاردى ەنگىزۋدى جوسپارلاپ وتىر.
كەزدەسۋ بارىسىندا رومان سكليار جاڭا ءوندىرىستىڭ ىسكە قوسىلۋى وتاندىق ماشينا جاساۋ سالاسىنىڭ دامۋى مەن اۋىل شارۋاشىلىعى سەكتورىنا زاماناۋي تەحنولوگيالاردى ەنگىزۋدەگى ماڭىزدى قادام ەكەنىن اتاپ ءوتتى. John Deere — اۋىل شارۋاشىلىعى تەحنيكاسىن ءوندىرۋ بويىنشا الەمدىك كوشباسشى. قازاقستاندا ونىڭ ونىمدەرىن لوكاليزاتسيالاۋ سالانىڭ دامۋىنا سەرپىن بەرەتىن ماڭىزدى كەزەڭى بولادى.
John Deere برەندىمەن شىعارىلاتىن اۋىل شارۋاشىلىعى تەحنيكاسى قازاقستان نارىعىندا ءوزىن بۇرىننان سەنىمدى جاعىنان تانىتىپ ۇلگەردى جانە بىرنەشە جىل بويى وتاندىق فەرمەرلەر اراسىندا ۇلكەن سۇرانىسقا يە بولۋدا. سوڭعى جىلدارى ەلىمىزدە اگروونەركاسىپتىك كەشەندى يندۋستريالاندىرۋدا ايتارلىقتاي جەتىستىكتەرگە قول جەتكىزىلىپ, زاماناۋي وندىرىستەردى دامىتۋعا قاجەتتى جاعدايلار جاسالدى. وسىعان بايلانىستى John Deere قازاقستان نارىعىنا جاڭا مارتەبەگە يە بولدى, ءوز پوزيتسياسىن نىعايتىپ, اۋىل شارۋاشىلىعىنا ارنالعان ءتيىمدى يننوۆاتسيالىق شەشىمدەر ۇسىنىپ جاتىر.
