«مەن ەشقاشان اياعىمدى شالۋعا تىرىسقان قاعازباستىلىق پەن بيۋروكراتيانى ۇمىتا المايمىن. اسكەري ونەركاسىپ سالاسىنا جاۋاپتى مەكەمەگە ءوز جوبامىزدى ۇسىنعان كەزدە ول جەردىڭ ادامدارى ماعان بىلاي دەگەن ەدى: «بالام سەندەر وتە اقىلدى جاستارسىڭدار. جاقسى وقىعاندارىڭ كورىنىپ تۇر. باستامالارىڭ دا ءتاپ-ءتاۋىر. بىراق ءبىر نارسەنى ەسكەرىڭدەرشى. شەتەلدىكتەر بۇل سالادا بىزدەن كوش ىلگەرى كەتكەن. سوندىقتان ولاردى قۋىپ جەتۋ مۇمكىن ەمەس», دەپتى سەلجۋك بايراقتار.
بيۋروكراتيالىق كەدەرگىلەرگە قاراماستان ول كومانداسىمەن بىرگە تۇركيانىڭ قورعانىس ونەركاسىبىنە ماماندانعان بايكار فيرماسىن قۇرىپ, بايراكتار اتاۋىمەن ۇشقىشسىز ۇشاقتار ويلاپ تاپتى. 2004 جىلى العاشقى جوباسىنا كىرىسكەن كەزدە كوپتەگەن قيىندىققا تاپ بولادى.
سەلجۋك بايراكتار تۇركياداعى ۋنيۆەرسيتەتتىڭ بىرىندە ەلەكترومەحانيكا ماماندىعى بويىنشا ءبىلىم العان. وقۋ بىتىرگەن جاس مامان ارمانىن جۇزەگە اسىرماق بولعاندا ءتۇرلى اكىمشىلىك كەدەرگىلەرگە ۇشىرايدى. الايدا كوزدەگەنىنەن قايتپايدى. قايسار جىگىت تۇركيانىڭ جاۋاپتى سالا ماماندارىنا قولقا سالىپ 2005 جىلى قزىنىڭ ءونىمىن ماڭىزدى ءبىر كورمەگە قاتىستىرۋعا رۇقسات الادى. ونەرتاپقىش اقش-تىڭ پەنسيلۆانيا ۋنيۆەرسيتەتىندە قوسىمشا ءبىلىم العان ەكەن. ماگيستر ديپلومىنىڭ يەسى. 2007 جىلى ەلگە ورالىپ, ۇشقىشسىز ۇشاقتار جاساۋعا ءبىرجولاتا كىرىسەدى. امەريكانىڭ جۋرناليستەرى سول تۇستا ونى «ۇشقىشسىز ۇشاق ونەركاسىبىنىڭ رۋحاني كوسەمى» دەپ اتاپتى.
«تۇركيانىڭ ۇشقىشسىز جويعىش ۇشاقتار ونەركاسىبى سەلجۋك بايراكتاردىڭ ەسىمىمەن تىعىز بايلانىستى. ول شىن مانىندە تۇرىك حالقىنىڭ الىپ كەمەڭگەرى. سەبەبى سەلجۋك تۇركيالىق جويعىش دروندار جاساپ شىعارعان العاشقى قۇراستىرۋشى-ينجەنەر. ونىڭ بۇل سالاداعى ورنى سمارتفون ويلاپ تاپقان ستيۆ دجوبسپەن بىردەي» دەپ جارىسا جازدى.
تۇركيانىڭ ماقتانىشىنا اينالعان ونەرتاپقىش 15 جىلدا ۇلكەن بيىكتەردى باعىندىردى. ۇشاقتاردىڭ سىزباسىنان باستاپ مايدا دەتالدارىنا شەيىن وزدەرى جاساي الاتىن جاعدايعا جەتتى. بايكار كومپانياسى وسى كۇندە بايراكتار تۆ-1, بايراكتار تۆ-2, اكينجي سەكىلدى ەڭ كۇشتى اسكەري جويعىش دروندار شىعارادى. جانە بۇل ۇشاقتار تۇرىكتىڭ جوعارى اسكەري ونەركاسىپ تەحنولوگياسىنىڭ اجىراماس بولشەگىنە اينالدى.
ءبىز وسى مىسال ارقىلى ايتقىمىز كەلگەنى بىزگە دە سەلجۋك بايراكتارداي وتاندىق ونەركاسىپتە توڭكەرىس جاسايتىن ازاماتتار كەرەك-اق. قۇدايعا شۇكىر قازاقتا دا ونەرتاپقىش ۇلدار بار. الايدا كوپشىلىگى شەتەل اسىپ كەتكەن. سول ەلدىڭ, سونداعى كورپوراتسيانىڭ پايداسى ءۇشىن جۇمىس ىستەپ جاتىر. سەلجۋك قيىندىقتارعا شىداماي, ۇلكەن كىسىلەرگە وكپەلەپ, باسقا ەلگە كەتىپ قالۋىنا بولار ەدى. سونداي ونەرتاپقىشتى كەز كەلگەن مەملەكەت قۇشاق جايا قارسى الىپ, بار جاعدايىن جاسايتىنى ءشۇباسىز. بىراق ول ولاي ەتە المادى. وتانىن قيىپ تاستاپ كەتپەدى. كەرىسىنشە ءبىلىمىن, تاجىريبەسىن تۇرىك ەلىنىڭ كەلەشەگىنە جۇمساپ كەلەدى. الدىنا ۇلكەن ماقساتتار قويىپ سونى ورىنداپ ءجۇر. ونىڭ بۇل شەشىمىنە وتانعا دەگەن سۇيىسپەنشىلىگى, حالقىنا دەگەن قۇرمەتى مەن پاتريوتتىق تاربيەسى تۇرتكى بولعانى انىق.
ءبىر اتتەگەن-ايى, قازاقتىڭ قانشاما ءبىلىمدى جاسى شەتەلدە الدەكىمدەردىڭ قولاستىندا جۇمىس ىستەپ ءجۇر. سولار سەلجۋكتاي ءوز وتانىندا تەر توكسە, عىلىمعا تالاي ۇلەسىن قوسقان بولار ەدى. سوندا دەيمىز -اۋ قازىرگى جاستاردىڭ بويىندا وتانعا, تۋعان جەرگە دەگەن ماحابباتتىڭ جوقتىعى ما؟! ءبىلىم قۋىپ «بولاشاقپەن» وقىپ كەلگەندەر ىشىندە سەلجۋكتاي ءبىر سالادا توڭكەرىس جاساعان ازاماتتار نەگە وسى بىزدە جوق؟!
بىلە بىلسەك مەملەكەتتىڭ بايلىعى جەرىنىڭ استىنداعى, ۇستىندەگى قازىناسى ەمەس, ونىڭ بايلىعى – حالقى. ياعني ءبىرىنشى كەزەكتە ۇنەمى ادام كاپيتالى تۇرادى. سول ءۇشىن مەملەكەت جاستاردىڭ ءبىلىم الۋىنا, جاقسى ماماندىق يگەرىپ شىعۋىنا بار مۇمكىندىكتەردى جاساپ جاتىر. الايدا وقىعان اقىلدى جاستارىمىز شەتەلگە كەتىپ قالۋدا. سول جاقتا عىلىممەن اينالىسىپ, جاڭالىقتار اشۋعا اتسالىسادى. ءاربىر جاس وسىلاي ەلدەن جىراقتاي بەرسە, وتاندىق عىلىمدى كىم دامىتادى؟ قازىردىڭ وزىندە كەيبىر سالادا ءىزىمىزدى باسار شاكىرت جوق دەپ ۇلكەن عالىم اعالارىمىز جىلاپ وتىر.
سول ءۇشىن قادىرلى جاستار, كىشكەنە پاتريوت بولايىق دەگىمىز كەلەدى. ەلدەن بەزەتىندەي سونشا نە قيىندىق تۋدى ەكەن. كەزىندە حالىقتىڭ قامىن جەپ, ءولىمنىڭ وزىنەن تايسالماعان الاش قايراتكەرلەرىنەن ونەگە الساق يگى. ءبىزدىڭ ايتپاق بولعان نەگىزگى ويىمىز وسى ەدى...
شىمكەنت
