وقيعا بىلاي ءوربىپتى. قالالىق اۋرۋحانانىڭ ماڭىنداعى قاراۋسىز قالعان ەكى قاباتتى عيماراتتان ءورت شىققان. عيماراتتىڭ ىشىندەگى كەپكەن اعاش, قاۋساعان جيھاز, ولىقاۋ جانىپ, توڭىرەكتى قويۋ ءتۇتىن باسقان ەكەن. تەرەزەلەرىنىڭ ءبارى تەمىر تورمەن تۇمشالاي جابىلعان. ءورت شىققان جەردەگى تەرەزەدە تەمىر تور جوق ەكەن.
عيماراتتىڭ جانىنان ءوتىپ بارا جاتقان يۆانعا الدەبىر بالالار جۇگىرىپ كەلىپ, ءورت ىشىندە ەكى دوسىنىڭ قالىپ قويعانىن ايتادى. جاس جىگىت ويلانباستان كومەك كورسەتۋگە ۇمتىلعان. جارتىلاي بىقسىپ جانىپ جاتقان ءزىلماۋىر ديۆاندى سۇيەمقارىس جىلجىتقانىمەن, ودان ءارى جول اشۋعا قاۋمەتى جەتپەپتى. توڭىرەگىنە كوز سالسا, ابىروي بولعاندا ەكى پوليتسيا قىزمەتكەرى ءوتىپ بارا جاتىر ەكەن. جان ۇشىرىپ سولارعا جەتكەن. ءمان-جايدى تۇسىندىرگەن. از ۋاقىتتىڭ ىشىندە بالالاردى اجال اۋزىنان قۇتقارعان. يۆان ءميزيننىڭ ءوزىن ءورت شارپىعانىمەن ومىرىنە قاۋىپ جوق, ەسەسىنە جاس جىگىتتىڭ كوزسىز ەرلىگى باتىلدىق پەن ادامگەرشىلىكتىڭ جارقىن ۇلگىسى.
