سالتاناتتى ءىس-شاراعا قىرعىز رەسپۋبليكاسىنىڭ الماتىداعى باس كونسۋلى جەنيشبەك اسانكۋلوۆ تا قاتىسىپ, باۋىرلاس ەلدەر باسشىلارى قاسىم-جومارت توقاەۆ پەن سادىر جاپاروۆتىڭ ءار سالادا ىنتىماقتاستىقتى ارتتىرۋ ساياساتىنىڭ جەمىستى جۇرگىزىلىپ جاتقانىن اتاپ ءوتتى.
«ەجەلدەن ەنشىسى بولىنبەگەن ەكى ەلدىڭ باق سالاسىنداعى بايلانىسى وتە ماڭىزدى. جاھاندانعان داۋىردە ەڭ جاقىن باۋىر ءارى كورشى ەلمەن اسىرەسە, اقپارات سالاسىنداعى بىرلىك, تۇسىنىستىك پەن قولداۋدى ارتتىرۋ زامان تالابى. ءبىر-بىرىمىزدەن ۇيرەنەتىن ءارى ءبىر-بىرىمىزگە ۇيرەتەتىن دۇنيەلەر كوپ», دەدى «Alatau-Aqparat» مەدياحولدينگىنىڭ باس ديرەكتورى ەرجان قالىمباي ۇلى.
ءوز كەزەگىندە قىرعىز ۇلتتىق “كابار” اقپاراتتىق اگەنتتىگىنىڭ ديرەكتورى مەدەربەك شەرمەتاليەۆ الدا بىرلەسە اتقارار ماڭىزدى جوبالاردى جاساۋ كەرەكتىگىنە توقتالدى.
مەموراندۋمدا باۋىرلاس ەلدەردىڭ اقپارات سالاسىنىڭ ىنتىماقتاستىعى مەن ارىپتەستىگىن ارتتىرۋ كوزدەلگەن. سونداي-اق قۇجاتتا تاراپتاردىڭ ءوزارا اقپارات پەن تاجىريبە الماسۋ, بىرلەسە ورتاق جوبالار جاساۋ, سونىمەن قاتار, ەكى ەلدىڭ باق وكىلدەرىنە ارناپ دوڭگەلەك ۇستەلدەر, كونفەرەنتسيالار ت.ب. ءىس-شارالاردى ۇيىمداستىرۋ قاراستىرىلعان.
«كابار» اقپاراتتىق اگەنتتىگى 1937 جىلى قۇرىلعان. قىرعىزستان عانا ەمەس, ورتالىق ازيا بويىنشا قىرعىز, ورىس, اعىلشىن, اراب, تۇرىك جانە قىتاي تىلدەرىندە اقپارات تاراتادى.
2020 جىلى قۇرىلعان «Alatau-Aqparat» مەدياحولدينگىنىڭ قۇرامىنا 1936 جىلدان شىعىپ كەلە جاتقان «ۆەچەرني الماتى», 1988 جىلدان شىعىپ كەلە جاتقان «الماتى اقشامى» گازەتتەرى مەن aqshamnews.kz, vecher.kz جانە alnews.kz اقپاراتىق رەسۋرستارى كىرەدى.
