بايقاۋعا الەمنىڭ 25 ەلىنەن 26 مىڭنان استام وقۋشى قاتىستى. «YURT» جوباسىن ۇسىنعان كوماندانىڭ قۇرامىندا الماتىلىق وقۋشىلار اناستاسيا تسوي, يۋليا كيم, كاميلا ەرتىسقىزى جانە ءىلياس داۋلەت بار. ولار ءبىرىنشى ورىندى يەلەندى. كوماندا يۋپيتەردىڭ وربيتاسىمەن قوزعالىپ, ونىڭ گانيمەد جانە كالليستو سەرىكتەرىنە جاقىنداي الاتىن اۆتونومدى عارىش ستانتسياسىنىڭ جوباسىن تانىستىردى.
ستانتسيا 30 مىڭعا جۋىق ادام تۇرۋعا ارنالعان, جاساندى گراۆيتاتسيا جۇيەسىمەن جانە تولىقتاي دەربەس تىرشىلىكپەن قامتاماسىز ەتۋ جۇيەسىمەن جابدىقتالعان.
ەكىنشى ورىندى تاعى ءبىر قازاقستاندىق كوماندانىڭ «يكارۋس» جوباسى يەلەندى. 45 مىڭ تۇرعىنعا ارنالعان گانيمەدتىڭ تومەنگى وربيتاسىندا ورنالاسقان عارىش ستانتسياسىن قۇراستىرۋشىلار - تابىلدى اسان, تەمىربۋلاتوۆ ارمان, ىنكاربەك سابىرجان, قۇزباكوۆا توميريس, جاپاروۆ مۇحيدين,
الىشەر باعداۋلەت, بەرىك ءۋالي, نۇرسۇلتان ايسۇلۋ, تايروۆ ارلان, باقىت اسلان. جەتەكشىلەرى — 12 سىنىپ وقۋشىسى ادىلەت ساندىقباەۆ.
«وقۋشى كەزىمدە World Space Olympiad جانە QazAstroshift سەكىلدى وليمپيادالاردى ۇيىمداستىردىم. سول بايقاۋلاردا مەن اەروكوسموس سالاسىنا شىنايى قىزىعۋشىلىق تانىتاتىن ونداعان شابىتتى جاستى كەزدەستىردىم. بۇل قاۋىمداستىق ءالى دە كەڭەيىپ, قازاقستاننىڭ عارىش سالاسىنداعى الەۋەتى ودان ءارى ارتا تۇسەتىنىنە سەنەمىن. مەكتەپتى بيىل اياقتاپ جاتقان مەن بولاشاقتان قورىقپايمىن. كەرىسىنشە, ءبىز ەندى عانا باستادىق. الدا جاڭا بەلەستەر مەن ۇلكەن جەتىستىكتەر», دەيدى ادىلەت ساندىقباەۆ.
Space Settlement Contest — مەكتەپ وقۋشىلارىنا ارنالعان حالىقارالىق جىل سايىن وتكىزىلەتىن بايقاۋ. ول وقۋشىلاردىڭ ينجەنەرلىك ويلاۋ قابىلەتىن, كرەاتيۆتىلىگىن جانە عىلىمعا ۇمتىلىسىن دامىتۋعا باعىتتالعان.
