ولەگ دىموۆ – وردەن يەسى

كەشە استاناداعى ۇلتتىق اكادەميالىق كىتاپحانانىڭ قازاقستان حالقى اسسامبلەياسى زالىندا قحا توراعاسىنىڭ ورىنباسارى, بولگار ەتنومادەني بىرلەستىگىنىڭ جەتەكشىسى ولەگ دىموۆتى بولگاريانىڭ مەملەكەتتىك ناگراداسى – ءى دارەجەلى «سۆياتىە كيريلل ي مەفودي» وردەنى – القىزىل لەنتالى التىن ايشىقپەن سالتاناتتى ماراپاتتاۋ ءراسىمى ءوتتى.    وردەندى بولگاريا رەسپۋب­ليكا­سىنىڭ قازاقستان رەسپۋبليكاسىنداعى ەلشىسى ۆاسيل پەتكوۆ تاقتى. ناقتىراق ايتساق, «سۆياتىە كيريلل ي مەفودي» وردەنى – بولگاريا رەسپۋبليكاسىنىڭ مەملەكەتتىك ناگراداسى. بۇل وردەنمەن مادەنيەت, ونەر, ءبىلىم مەن عىلىمنىڭ دامۋىنا ۇلەس قوسقان بولگارلىق جانە شەتەلدىك ازاماتتار ماراپاتتالادى. شارا بارىسىندا «قازاقستان-بولگاريا مادەنيەت ورتالىعى» اق توراعاسى, قحا مۇشەسى, قازاقستاننىڭ ەڭبەك سىڭىرگەن قايراتكەرى ولەگ دىموۆتىڭ ومىرىنەن الىنعان بەينەبايان كورسەتىلدى. سال­تا­ناتتى جيىندى قازاقستان حالقى اس­سام­بلەياسى توراعاسىنىڭ ورىنباسارى ەرالى توعجانوۆ اشىپ, مەملەكەت باسشىسى ن.نازارباەۆتىڭ قۇتتىقتاۋ ءسوزىن وقىپ بەردى.  كوپ ۇزاماي, مادەنيەت جانە سپورت ءمينيسترى ارىستانبەك مۇحامەدي ۇلىنىڭ جۇرەكجاردى قۇتتىقتاۋى دا كەلىپ جەتتى. سونداي-اق, و.دىموۆقا پرەزيدەنتتىك سايلاۋ ناۋقانىنداعى بەلسەندىلىگى ءۇشىن «نۇر وتان» پارتياسىنىڭ اتىنان العىس حات تابىس ەتىلدى. ول – 45 جىلدان استام ءومىرىن مەملەكەتتىك قىزمەتتە, ونىڭ 14 جىلىن قازاقستان حالقى اسسامبلەياسىنىڭ حاتشىلىعىندا وتكىزگەن  قوعام قايراتكەرى. سونداي-اق, وننان استام كىتاپتىڭ, ءۇش ولەڭدەر جيناعىنىڭ اۆتورى. 2005 جىلى ولەگ دىموۆ  سو­فيا قالاسىندا (بولگاريا) ن.نازار­باەۆ­تىڭ بولگار تىلىنە اۋدارىلعان «سىن­دارلى ون جىل» كىتابىنىڭ تانىس­تى­رىلىمىن وتكىزدى. ال 2007 جىلى بولگار تىلىندە «مى نارود كازاح­ستانا» اتتى كىتابى جارىق كوردى. قىسقاسى, بۇل كەشتە تانىمال تۇلعا تۋرالى ۇلتتى ۇيىتاتىن نەبىر ۇلاعاتتى سوزدەر مەن ەستەلىكتەر ايتىلدى. سونىڭ ءبىر ايعاعى رەتىندە, زامانداس-دوسى, اقىن, قازاقستاننىڭ ەڭبەك سىڭىرگەن قايراتكەرى وتەگەن ورالباي ۇلى كەش يەسىنە ارناپ ءوز ولەڭىن وقىدى.  ءىس-شاراعا قحا مۇشەلەرى, «نۇر وتان» پارتياسىنىڭ, مينيسترلىكتەر مەن ۆەدومستۆولاردىڭ وكىلدەرى, قالالىق ەتنومادەني بىرلەستىكتەردىڭ باسشىلارى قاتىستى. راۋشان تاۋىرحانقىزى, جۋرناليست.