فوتو: qarmaqshy-tany.kz
سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ايتۋىنشا, كەنەلەرگە قارسى باقىلاۋ ەنتومولوگيالىق ادىستەرمەن دە جۇرگىزىلمەك. ەپيدەميا ماۋسىمىنىڭ باسىندا ماماندار ادامداردان الىنعان 34 كەنە ۇلگىسىن زەرتتەگەندە, ءبىر كەنەدەن ەنتسەفاليت انتيگەنى تابىلعان.
«كەنە شاعىپ الماۋ ءۇشىن ءبىز الماتىلىقتارعا تابيعات اياسىنا شىققان كەزدە جابىق كيىنىپ, رەپەللەنتتەر قولدانىپ, سەرۋەننەن كەيىن وزدەرىن, جەكە زاتتارىن مۇقيات تەكسەرۋگە كەڭەس بەرەمىز. كەنە شاعىپ السا, ءتورت كۇننەن كەشىكتىرمەي مەديتسينالىق كومەككە جۇگىنۋ ماڭىزدى», دەيدى اسەل قالىقوۆا.
سونداي-اق, مامان قالادا قوسىمشا ۆاكتسيناتسيا, دەنساۋلىق ساقتاۋ باسقارماسىنىڭ قويماسىندا بەلگيالىق TicoVac ۆاكتسيناسىنىڭ 11 447 دوزاسى بار ەكەندىگىن ەسكە سالدى. باستاپقى كۋرس ءۇش دوزادان تۇرادى, بىراق قىستا ەگۋگە ۇلگەرمەگەندەر ءۇشىن شۇعىل سحەما قاراستىرىلعان.
حالىقتى كەنە ەنتسەفاليتىنەن قورعاۋعا باعىتتالعان كەنەگە قارسى اۋقىمدى ءىس-شارالار تۋرالى الماتى قالالىق دەزينفەكتسيا ورتالىعىنىڭ ديرەكتورى اينۇر اققوشقاروۆا بايانداي كەلە, بيىلعى وڭدەۋ جۇمىستارى ەكى ساتىدان تۇراتىنىن, كەنەگە قارسى 144 152 000 تەڭگە بولىنسە, ءبىر تۋرعا 72 ميلليون تەڭگە جۇمسالاتىنىن حابارلادى.
اينۇر اققوشقاروۆا بيىل جاڭا «تسيپەرترين» پرەپاراتى قولدانىلاتىنىن دا اتاپ ايتتى. گەكتارىنا 0,75 ليتر تۇتىنۋ نورماسىمەن 3 579,6 ليتر كولەمىندە پرەپارات ساتىپ الىندى. كەنەلەر ءبىر دارىگە ۇيرەنىپ كەتپەۋ ءۇشىن بولدىرماۋ ءۇشىن ول جىل سايىن جاڭارتىلىپ وتىرادى. مىسالى, 2023 جىلى «فاۆوريت ۆ.ك. ە.», 2024 جىلى «دەلتەكس» قولدانىلدى.
«وڭدەۋ جۇمىستارىن ارنايى دايىندىقتان وتكەن دەزينسترۋكتورلار مەن دەزينفەكتورلار جۇرگىزەدى. بارلىق ماماندار تۇراقتى نۇسقاۋلىقتان ءوتىپ, قاجەتتى اساي-مۇسەيمەن تولىق قامتاماسىز ەتىلگەن», – دەيدى ورتالىق ديرەكتورى.
قازىرگى تاڭدا الماتى قالالىق دەزينفەكتسيا ورتالىعىنىڭ قاراماعىندا ىستىق جانە سۋىق تۇمان تەرموگەنەراتورلارىمەن, گيدروپۋلتتەرمەن, «فازەندا» بۇرىككىشتەرىمەن, سونداي-اق اۆتوكولىكتەرمەن جابدىقتالعان ەكى ءموبيلدى بريگادا بار. 2025 جىلى ءۇش جاڭا جابدىق, بەس مىڭنان استام جەكە قورعانىس قۇرالدارى ساتىپ الىنعان.
الماتى
