وبلىس اكىمدىگى ۆەتەريناريا باسقارماسىنىڭ باسشىسى باقىت بەتباەۆتىڭ ايتۋىنشا, زالالسىزداندىرۋ جۇمىسى ءۇش كەزەڭگە جوسپارلانعان. وڭىردەگى 46 ەلدى مەكەن كونگو-قىرىم قىزباسىنىڭ تابيعي وشاعىندا ورنالاسقان. وسى جىلى 24392 قورا جاي (كولەمى 5,7 ملن شارشا مەتر) مەن 168 مىڭ شارشا مەتر بۋفەرلىك ايماققا, بارلىعى 580 مىڭ باس اۋىل شارۋاشىلىعى جانۋارىنا زالالسىزداندىرۋ جۇمىسى جۇرگىزىلمەك. ساۋىردە باستالعان جۇمىستىڭ ەكىنشى جانە ءۇشىنشى كەزەڭى تامىز-قىركۇيەك ايلارىندا جالعاسپاق. قولعا العان ءىستى دەر كەزىندە ىسكە اسىرۋ ءۇشىن جەتكىلىكتى كولەمدە قاجەتتى ءدارى-دارمەك ساتىپ الىنعان.
باسقارما باسشىسى كەلتىرگەن دەرەككە سەنسەك, جىل باسىنان بەرى كەنە شاققان ادامداردىڭ قان سىناماسى الىنعان. ولاردىڭ اناليز تالداۋلارىنىڭ ناتيجەسى تەرىس ناتيجە كورسەتكەن.
«زالالسىزداندىرۋ جۇمىسى ساپالى ورىندالۋى ءتيىس. بۇل جۇمىستىڭ ناتيجەسىن كۇندەلىكتى زەردەلەپ وتىرامىز», دەيدى جامبىل وبلىسىنىڭ اكىمى ەربول قاراشوكەەۆ.
15 ساۋىردەن باستاپ جاۋاپتى قىزمەتكەرلەر وقۋشىلارعا كەنەدەن ساقتانۋ جولدارىن ءتۇسىندىرۋدى قولعا الماق. سونداي-اق مال بازارلارى مەن قاساپحانالارداعى سانيتارلىق نورمانىڭ ساقتالۋى دا جاۋاپتى تۇلعالاردىڭ باقىلاۋىندا بولماق.
