بۇعان دەيىن قازاق مەكتەبىنىڭ وقۋشىلارى توزىعى شىققان بالاباقشا عيماراتىندا وقىپ كەلگەن. ول ماسەلە وسىدان ءتورت جىل بۇرىن “Egemen Qazaqstan“ گازەتىندە كوتەرىلىپ, جاڭا مەكتەپ قۇرىلىسىنىڭ جۇمىستارى دەرەۋ قولعا الىنعان.
كەنتتە بۇگىندە 4207 ادام تۇرادى, تۋريزم مەن ينجەنەرلىك ينفراقۇرىلىم دامىپ كەلەدى. بۇگىن مۇندا جالپى اۋدانى 10775 شارشى مەتر مەملەكەتتىك تىلدە ءبىلىم بەرەتىن 200 وقۋشىعا ارنالعان №1 جاڭا بۇقتىرما ورتا مەكتەبى اشىلدى.
- مەملەكەت باسشىسى ءبىلىم دەڭگەيى بۇكىل ەل بويىنشا تەڭ بولۋى ءتيىس ەكەنىن ايتقان. ال بۇل جاڭا, زاماناۋي مەكتەپ – ۇرپاقتى تاربيەلەۋ مەن ساپالى ءبىلىم بەرۋ جولىنداعى ۇلكەن قادام. وسى ءبىلىم وشاعىندا ەلىمىزدىڭ بولاشاعىن قالىپتاستىراتىن سانالى, ءبىلىمدى دە بىلىكتى ازاماتتار تۇلەپ ۇشاتىنىنا سەنىمدىمىز, – دەدى نۇرىمبەت ساقتاعانوۆ.
وبلىس اكىمىنىڭ ايتۋىنشا, وقۋ جاعدايىن جاقسارتۋ جانە وقۋ ورىندارىنىڭ تاپشىلىعىن ازايتۋ ماقساتىندا وتكەن جىلى وبلىستا 10 جاڭا مەكتەپ سالىنعان. ولاردىڭ جەتەۋى پايدالانۋعا بەرىلدى, ەكەۋى تارباعاتاي اۋدانىندا وففشورلىق كەلىسىم-شارتتار بويىنشا سالىندى. بيىل تاعى 13 مەكتەپ سالۋ جوسپارلانىپ وتىر.
بۇگىنگى تاڭدا جاڭا بۇقتىرمادا 114 وقۋشى ءبىلىم الىپ جاتىر. مەكتەپكە دەيىنگى مەكەمەلەردە 129 بالا بولسا, ولاردىڭ 33-ءى بيىل 1-سىنىپقا بارادى.
باسا ايتا كەتەرلىگى, مەكتەپ ۇستازدارى مەن وقۋشىلارى «Egemen Qazaqstan» گازەتىنە ريزاشىلىقتارىن ءبىلدىردى.
شىعىس قازاقستان وبلىسى,
التاي اۋدانى
