الماتى وبلىسىنىڭ ارحيتەكتۋرا جانە قالا قۇرىلىسى باسقارماسىنىڭ مالىمەتىنشە, بۇگىنگى تاڭدا وڭىردە جالپى سانى 677 ساياجاي ءماسسيۆى تىركەلگەن.
ساياجاي القاپتارىنىڭ ەڭ كوبى قاراساي اۋدانىندا – 203, تالعار اۋدانىندا – 151, ەڭبەكشىقازاق اۋدانىندا – 135, ىلە اۋدانىندا – 118, جامبىل اۋدانىندا – 21, قوناەۆ قالاسىندا – 9 جانە جاڭادان قۇرىلعان الاتاۋ قالاسىندا – 40.
وبلىس اكىمدىگىنىڭ تاپسىرماسىنا سايكەس, 2023 جىلى الماتى وبلىسى بويىنشا 367 ساياجاي ءماسسيۆىن ەلدى مەكەندەرگە قوسۋ ءۇشىن قالا قۇرىلىسى قۇجاتتاماسى ازىرلەنىپ, بەكىتىلدى. بۇل – ءوڭىر تاريحىنداعى ساياجاي ماسەلەسىن كەشەندى تۇردە شەشۋگە ارنالعان العاشقى ءارى ماڭىزدى قادامداردىڭ ءبىرى.
سونىڭ ناتيجەسىندە ىلە اۋدانىندا 88 ساياجاي ءماسسيۆى 8 اۋىلدىڭ قۇرامىنا ەنگىزىلدى. اتاپ ايتقاندا, كازتسيك, كوكقاينار, جاپەك باتىر, كوسوزەن, بايسەركە, قويانقۇس, كومسومول, جاناتالاپ اۋىلدارىنا تيەسىلى ساياجايلار ەندى زاڭدى تۇردە ەلدى مەكەندەر شەكاراسىنا كىردى. بۇل وزگەرىستەردىڭ بارلىعى ىلە اۋداندىق ءماسليحاتىنىڭ 2023 جىلعى 29 جەلتوقسانداعى شەشىمدەرىمەن بەكىتىلدى.
سونداي-اق قاراساي اۋدانىندا 6 ەلدى مەكەننىڭ اۋماعىنا 102 ساياجاي ءماسسيۆى ەنگىزىلدى. ونىڭ ىشىندە قاسكەلەڭ قالاسىنا – 44, قىرعاۋىلدى اۋىلىنا – 21, المالىباق اۋىلىنا – 26, قوشمامبەت, ەلتاي جانە دولان اۋىلدارىنا – 11 ساياجاي ءماسسيۆى قوسىلدى.
باس جوسپارلار 2024 جىلدىڭ اقپان ايىندا اۋداندىق ءماسليحات شەشىمدەرىمەن بەكىتىلدى.
تالعار اۋدانىندا 6 ەلدى مەكەن بويىنشا 93 ساياجاي ءماسسيۆى ەلدى مەكەن قۇرامىنا ەنگىزىلدى. بۇل اۋىلداردىڭ قاتارىندا كەندالا, اقتاس, بەساعاش, تۇزدىباستاۋ, بايبۇلاق جانە قىزىلتۋ بار. بارلىق جوسپارلار 2024 جىلدىڭ 26 قاڭتارىندا تالعار اۋداندىق ءماسليحاتى شەشىمىمەن بەكىتىلدى.
ەڭبەكشىقازاق اۋدانىندا بايتەرەك اۋىلى مەن ەسىك قالاسىنا تيەسىلى 35 ساياجاي ءماسسيۆى ەلدى مەكەندەردىڭ شەكاراسىنا ەنگىزىلدى. قۇجاتتار 2023 جىلدىڭ جەلتوقسانىندا بەكىتىلگەن.
سونداي-اق قوناەۆ قالاسىنا – 9, الاتاۋ قالاسىنا – 40 ساياجاي ءماسسيۆى قوسىلدى. قالالاردىڭ باس جوسپارلارى قر ۇكىمەتىنىڭ قاۋلىسىمەن 2023 جانە 2024 جىلدارى بەكىتىلدى.
بىلتىرعى جىلى وبلىس بويىنشا 51 ەلدى مەكەنگە قاتىستى جاڭا قالا قۇرىلىسى قۇجاتتاماسى ازىرلەنىپ, مەملەكەتتىك ساراپتامادان وتۋدە. ناتيجەسىندە, شامامەن 15 383 جەر تەلىمى ەلدى مەكەندەردىڭ شەكاراسىنا رەسمي تۇردە ەنگىزىلمەك. ونىڭ ىشىندە ىلە اۋدانىندا – 30 ساياجاي ءماسسيۆى, تالعار اۋدانىندا – 19, قاراساي اۋدانىندا – 27.
2025 جىلى قاراساي اۋدانىنىڭ تۇرار, كولدى, بەكبولات, جانە ەڭبەكشىقازاق اۋدانىنداعى ازات اۋىلدارىنا قاتىستى 23 ساياجاي ءماسسيۆىن زاڭداستىرۋ بويىنشا قۇجاتتار دايىندالىپ جاتىر. بۇل جەرلەردىڭ جالپى اۋدانى – 123,04 گەكتار.
قازىرگى ۋاقىتتا جەرگىلىكتى اتقارۋشى ورگاندار قازاقستان رەسپۋبليكاسىنىڭ جەر كودەكسىنىڭ 108-بابىنىڭ 1-تارماعىنا سايكەس, بەكىتىلگەن باس جوسپارلار نەگىزىندە ەلدى مەكەندەردىڭ شەكارالارىن ناقتىلاۋ جۇمىستارىن جۇرگىزۋدە.
سونىمەن قاتار, الماتى وبلىسى اكىمىنىڭ 2024 جىلعى 19 ناۋرىزداعى №18-ون/ق وكىمىمەن, ساياجاي ماسسيۆتەرى بويىنشا وزەكتى ماسەلەلەردى انىقتاپ, شەشۋ جولدارىن ازىرلەۋ ءۇشىن ارنايى جۇمىس توبى قۇرىلعان. بۇل توپتىڭ جۇمىسى كەزەڭ-كەزەڭىمەن جۇزەگە اسىپ, تۇرعىنداردىڭ كوپ جىلدان بەرى كوتەرىپ جۇرگەن ماسەلەلەرىنە ناقتى جاۋاپتار بەرىلۋدە.
الماتى وبلىسى
