وسىعان دەيىن سۋ رەسۋرستارى جانە يرريگاتسيا مينيسترلىگى قىتايلىق ارىپتەستەرىمەن ءتيىستى كەلىسىمگە قول جەتكىزگەن بولاتىن. العاشقى توپتا 30 مامان. ودان ءارى 25 ادامنان جاساقتالاتىن تاعى 3 توپ قىتايدا وقيدى. كورشى ەلدەگى ەكى اپتالىق بىلىكتىلىكتى ارتتىرۋ كۋرستارىنان جالپى سانى 105 سۋ مامانى وتەدى.
ايتا كەتۋ كەرەك, وقۋ كۋرسىن قىتاي تارابى ءوز ەسەبىنەن ۇيىمداستىردى جانە ءىس-شاراعا مەملەكەتتىك بيۋدجەتتەن قاراجات بولىنگەن جوق.
«مينيسترلىكتىڭ باستاماسىمەن جۇزدەن استام قازاقستاندىق مامان وزدەرىنىڭ بىلىمدەرى مەن كاسىبي داعدىلارىن شىڭداۋ مۇمكىندىگىنە يە بولدى. قىتاي سۋ شارۋاشىلىعى سالاسىندا وزىق تەحنولوگيالارعا يە, سوندىقتان وسى ەلدىڭ تاجىريبەسىن زەردەلەۋ ەلىمىزدىڭ سۋ سالاسىن دامىتۋعا كومەكتەسەدى. سونىمەن قاتار, ءبىزدىڭ مينيسترلىك باسقا مەملەكەتتەرمەن دە وسىنداي كۋرستاردى ۇيىمداستىرۋ بويىنشا بەلسەندى كەلىسسوز جۇرگىزىپ جاتىر. وسىعان دەيىن بىرنەشە سۋ مامانى فرانتسيا مەن جاپونيادا ءبىلىم الىپ كەلدى», دەدى سۋ رەسۋرستارى جانە يرريگاتسيا ۆيتسە-ءمينيسترى نۇرلان الدامجاروۆ.
ناۋرىز ايىندا العاش رەت قازاقستان مەن قىتايدىڭ سۋ ۆەدومستۆولارى سۋ رەسۋرستارى سالاسىندا ءوزارا تۇسىنىستىك پەن ىنتىماقتاستىق تۋرالى مەموراندۋمعا قول قويعان ەدى. قۇجات سۋ رەسۋرستارىن ۇتىمدى جانە ورنىقتى پايدالانۋ, زاماناۋي تەحنولوگيالاردى ەنگىزۋ, بالامالى سۋ كوزدەرىن ءبولۋ جانە يگەرۋ, سونداي-اق تاجىريبە الماسۋ جانە بىرلەسىپ مامان دايارلاۋ سالاسىندا ەكىجاقتى ىنتىماقتاستىقتى نىعايتۋدى كوزدەيدى.
