بۇل جوبا «جولاۋشىلار تاسىمالى» اكتسيونەرلىك قوعامىمەن جاسالعان كەلىسىمشارت نەگىزىندە جۇزەگە اسىرىلىپ جاتىر. كەلىسىمگە سايكەس, 2030 جىلعا دەيىن جالپى سانى 557 ۆاگون شىعارىلادى. ونىڭ ىشىندە كۋپە, پلاتسكارت, مۇمكىندىگى شەكتەۋلى جاندارعا ارنالعان ارنايى ۆاگوندار مەن گەنەراتورلىق ۆاگوندار بار.
قازىرگى ۋاقىتتا زاۋىتتا 400-دەن استام قىزمەتكەر جۇمىس ىستەيدى جانە تولىق وندىرىستىك تسيكل جولعا قويىلعان. اتاپ ايتقاندا, مۇندا:
-
ۆاگون كورپۋستارىن دانەكەرلەۋ جانە سىرلاۋ;
-
ەلەكتر جابدىقتارىن قۇراستىرۋ;
-
ارباشىقتاردى جاساۋ جانە ورناتۋ;
-
ىشكى جابدىقتاردى ورناتۋ;
-
ۆاگونداردى پايدالانۋعا بەرمەس بۇرىن ستاتيكالىق جانە ديناميكالىق سىناقتار جۇرگىزىلەدى.
سوڭعى ەكى جىلدا زاۋىت اۋقىمدى جاڭعىرتۋدان ءوتىپ, زاماناۋي تەحنولوگيالار ەنگىزىلدى. بۇل جەرگىلىكتى مامانداردى وقىتىپ, ءوندىرىستىڭ جوعارى دەڭگەيدە وتاندىق بولۋىن قامتاماسىز ەتۋگە مۇمكىندىك بەردى.
ايتا كەتەيىك, Stadler كومپانياسىنىڭ ۆاگوندارى — 40 ۇيىقتايتىن ورىنمەن جابدىقتالعان جايلى كۋپەلىك ۆاگوندار. ولار زاماناۋي كونديتسيونەر جۇيەسىمەن, بەينەباقىلاۋمەن, ەلەكترلىك جىلىتۋ قۇرىلعىسىمەن جانە اۆتوماتتى ءورت ءسوندىرۋ جۇيەسىمەن جابدىقتالادى. ءار كۋپەدە جولاۋشىلارعا ارنالعان ەلەكتر روزەتكالارى مەن USB-ۇياشىقتار ورناتىلادى.
جاڭا ۆاگونداردىڭ ماڭىزدى ەرەكشەلىگى — ولاردىڭ سىرتقى ديزاينى قازاقستاننىڭ مەملەكەتتىك تۋىنىڭ تۇستەرىمەن — كوگىلدىر, سارى جانە اق رەڭدەرمەن بەزەندىرىلەتىن بولادى. بۇل ۇلتتىق بولمىس پەن ەلىمىزدىڭ رامىزدەرىن ايشىقتايدى. سونىمەن قاتار, ۆاگوندار قازاقستاننىڭ كليماتتىق جاعدايى مەن قالالار اراسىنداعى ۇزاق قاشىقتىقتارعا بەيىمدەلىپ جاسالادى.
كەلىسىمشارت شارتتارىنا سايكەس, بيىلعى جىلدىڭ وزىندە العاشقى 51 ۆاگون «جولاۋشىلار تاسىمالى» اق-عا تاپسىرىلماق. بۇدان بولەك, زاۋىت شىعارىلعان ۆاگوندارعا 20 جىل بويى تەحنيكالىق قىزمەت كورسەتەدى. بۇل ولاردىڭ ۇزدىكسىز جۇمىس ىستەۋىن جانە ۇزاق قىزمەت ەتۋىن قامتاماسىز ەتەدى.
