فوتو: اشىق دەرەككوز
«اۋىل» پارتياسىنىڭ فراكتسياسى پارلامەنتتەگى جۇمىسىنىڭ العاشقى كۇندەرىنەن باستاپ اۋىل شارۋاشىلىعى تاۋارىن وندىرۋشىلەردىڭ سالىقتىق جاعدايىن جاقسارتۋدى جۇيەلى تۇردە كوتەرىپ كەلگەن. فراكتسيانىڭ بەلسەندى ۇسىنىستارى ۇكىمەت تاراپىنان ەسكەرىلىپ, ءتيىمدى ديالوگ ورناعانى اتاپ ءوتىلدى.
«بۇگىندە فراكتسيامىز ۇسىنعان ۇسىنىستاردىڭ ەداۋىر بولىگى ەسكەرىلىپ, ۇكىمەتپەن ورناعان ءوزارا ءتيىمدى, ءارى سىندارلى ارەكەتتەستىك ءۇشىن ريزاشىلىعىمىزدى بىلدىرەمىز», دەدى دەپۋتات.
دەگەنمەن, فراكتسيا ماڭىزدى ءبىر ماسەلەگە ەرەكشە نازار اۋدارۋدى ۇسىندى. اتاپ ايتقاندا, ۇكىمەتتىڭ اۋىل شارۋاشىلىعى ونىمدەرىنە نولدىك مولشەرلەمە بويىنشا ققس ەنگىزۋ باستاماسىنا قاتىستى بيزنەس وكىلدەرى الاڭداۋشىلىق ءبىلدىرىپ وتىر.
ء«بىز اگرارلىق بيزنەس سۋبەكتىلەرىمەن جان-جاقتى ساراپتامالىق جۇمىس جۇرگىزدىك. كاسىپكەرلەر تاراپىنان كوپتەگەن ءوتىنىش كەلىپ ءتۇستى. ولار نولدىك ققس مولشەرلەمەسى اگرارشىلار ءۇشىن قوسىمشا قيىندىقتار تۋعىزاتىنىن, بۇل شارا شىن مانىندە سالىقتىق جۇكتەمەنى ارتتىراتىنىن جەتكىزدى», دەدى قاراقات ابدەن.
ونىڭ ايتۋىنشا, ققس-تان تولىق بوساتۋ مەن نولدىك مولشەرلەمە – ەكى ءتۇرلى سالىقتىق رەجيم, ءارى ولاردىڭ سالدارى دا مۇلدە بولەك. نولدىك مولشەرلەمە جاعدايىندا اۋىل شارۋاشىلىعى تاۋارىن وندىرۋشىلەر كىرىستەگى ققس-تى قايتارىپ الۋ مۇمكىندىگىنەن ايىرىلادى. بۇل اسىرەسە ءوندىرىس شىعىنى جوعارى ءارى ماۋسىمدىق سيپاتتاعى سالا ءۇشىن وتە سەزىمتال ماسەلە.
فراكتسيا ۇسىنعان بالاما شەشىم
«اۋىل» پارتياسى فراكتسياسى ققس مولشەرلەمەسىن 16% دەڭگەيىندە ساقتاپ, سونىمەن قاتار سالىقتىق ەسەپتەن شىعارۋ ۇلەسىن بۇرىنعى 70%-دان 80%-عا دەيىن ارتتىرۋدى ۇسىندى.
«بۇل – سالىقتىق جۇكتەمەنى جەڭىلدەتۋدىڭ ناقتى مەحانيزمى. ءبىر جاعىنان فيسكالدىق ءتارتىپ بۇزىلمايدى, ەكىنشى جاعىنان اۋىلداعى كاسىپكەرلەردىڭ قارجىلىق تۇراقتىلىعى ساقتالادى. ەڭ باستىسى بۇل سالادا ينۆەستيتسيالىق موتيۆاتسيا جوعالمايدى», دەدى دەپۋتات.
سونىمەن قاتار, قاراقات ابدەن اگرارلىق سالا سۋبەكتىلەرىنە سالىقتىق رەجيمدى ءوز ەركىمەن تاڭداۋعا مۇمكىندىك بەرىلۋى ءتيىس ەكەنىن اتاپ ءوتتى. ول ۇكىمەتتىڭ ارنايى سالىق رەجيمىن ەنگىزىپ, اۋىل كاسىپكەرلەرى ءۇشىن جەڭىلدىكتى شارتتار جاساعانىنا ريزاشىلىق ءبىلدىردى. بۇل نورمالار اۋىلداعى شاعىن جانە ورتا بيزنەستىڭ تۇراقتىلىعى مەن دامۋىنا ەلەۋلى قولداۋ بولاتىنىن دا اتاپ ءوتتى.
«اۋىل» پارتياسى زاڭ جوباسىنىڭ ەكىنشى وقىلىمىندا بەلسەندى قاتىسىپ, اگروونەركاسىپتىك كەشەن مۇددەسىنە ساي تەتىكتەردى قۇقىقتىق ءارى ەكونوميكالىق تۇرعىدان جەتىلدىرۋ ءۇشىن ناتيجەلى جۇمىس جۇرگىزۋگە دايىن ەكەندىگىن مالىمدەدى.
ء«بىزدىڭ باستى ماقساتىمىز — اۋىل شارۋاشىلىعى تاۋارىن وندىرۋشىلەردىڭ مۇددەسىن ەسكەرەتىن, سونىمەن بىرگە ۇلتتىق ەكونوميكانىڭ ۇزاق مەرزىمدى باسىمدىقتارىنا ساي كەلەتىن تەڭگەرىمدى سالىقتىق رەجيم قالىپتاستىرۋ», دەدى قاراقات ابدەن.
قاراقات ابدەن ءسوز سوڭىندا اگرارلىق سەكتوردىڭ ەل دامۋىنداعى ورنى ەرەكشە ەكەنىن اتاپ ءوتىپ, فراكتسيا اتىنان سالىق كودەكسىنىڭ ءبىرىنشى وقىلىمىن قولداۋعا شاقىردى.
«ۇسىنىلىپ وتىرعان زاڭ جوباسى – ستراتەگيالىق ماڭىزدى قۇجات. سوندىقتان ءبىز, «اۋىل» فراكتسياسى, ونى قولدايمىز جانە ارىپتەستەرىمىزدى دە بىرلىك پەن ىنتىماقتاستىق تانىتۋعا شاقىرامىز», دەدى ول.
