توقىما قالدىقتارىن جيناپ, سۇرىپتاپ, قايتا وڭدەۋدى قاراستىراتىن FABRIKA جوباسىنىڭ ءبىر ايدىڭ عانا ىشىندەگى ناتيجەسى جامان ەمەس. قازىرگى تاڭدا قالادا 18 ارناۋلى كونتەينەر ورناتىلسا, الداعى كۇندەرى تاعى 22 كونتەينەر ورناتۋ جوسپارلانعان. بولاشاقتا جوبا الماتىنىڭ باسقا اۋداندارىن دا قامتۋى ءتيىس.
باستاما قولعا الىنعان كۇننەن باستاپ 20 000 كيلوگرامنان استام ەسكى كيىم-كەشەك جينالسا, ەندى ول سۇرىپتالىپ, قالا اۋماعىندا قايتا وڭدەلەدى. بۇل ماتەريالداردان ونەركاسىپتە قولدانىلاتىن قايتا وڭدەلگەن تالشىق پەن مايلىق شۇبەرەكتەرى جاسالادى. سونىمەن قاتار, جينالعان كيىمنىڭ شامامەن 13%-ى قايىرىمدىلىق ۇيىمدارىنا بەرىلمەك, سەبەبى ولار ءالى دە پايدالانۋعا جارامدى.
ەكولوگيالىق باعالاۋلارعا سەنسەك, قازىردىڭ وزىندە جينالعان توقىما قالدىقتارىن كادەگە اسىرۋ 74 000 كيلوگرامنان استام CO₂ ەكۆيۆالەنتىنىڭ اۋاعا تارالۋىنا جول بەرمەسە – وسى مولشەردەگى كومىرقىشقىل گازىن 3 730-دان استام اعاش ءبىر جىلدا سىڭىرە الادى ەكەن.
وسىناۋ اۋقىمداعى العاشقى باستاما FABRIQA جوباسى الماتى قالاسىنىڭ ەكولوگيا جانە قورشاعان ورتا باسقارماسىنىڭ قولداۋىمەن جۇزەگە اسىرىلا باستادى. جوبا ەكولوگيالىق تۇراقتى شەشىمدەردىڭ ءتيىمدى ءارى الەۋمەتتىك ماڭىزى بار ەكەنىن كورسەتىپ وتىر. ماقساتى – اي سايىن 120 000 كيلوگرامعا دەيىن توقىما قالدىقتارىن جيناپ, ولاردىڭ پوليگونعا تاستالۋىن ازايتۋ جانە قالا تۇرعىندارىن سانالى تۇتىنۋ مەن قايتا وڭدەۋ مادەنيەتىنە تارتۋ.
