41 جانە 25 پايىز كورسەتكىشىمەن الماتى مەن استانا بوس جۇمىس ورنىنىڭ سانى بويىنشا كوشباسشىلىق پوزيتسيانى جالعاستىرىپ كەلەدى. جۇمىس بەرۋشىنىڭ بەلسەندىلىگى جوعارى وڭىرلەردىڭ قاتارىنا قاراعاندى, شىمكەنت جانە قوستاناي كىردى. باسقا دا قالالاردا بوس ورىندار سانى ايتارلىقتاي ارتتى. ۇسىنىس استانادا 34%-عا جەتتى, شىمكەنتتە – 26%, قوستانايدا – 22%, الماتىدا – 17% ءوسىم بايقالدى. بوس ورىندار سانى اقتوبەدە 14%-عا, اتىراۋ مەن ورالدا 7%-عا, پاۆلودار مەن وسكەمەندە 6%-عا ءبىرشاما ۇلعايدى.
جۇمىسشىلاردىڭ جارتىسى الاتىن جالاقى دەڭگەيىن كورسەتەتىندىكتەن, مەدياندى جالاقى ورتاشا جالاقىعا قاراعاندا ەڭبەكتى تولەۋدىڭ وبەكتيۆتى كورسەتكىشى بولىپ سانالادى. وسى ۋاقىتتا ەلىمىز بويىنشا ۇسىنىلىپ وتىرعان مەدياندى جالاقى 308 088 تەڭگەنى قۇرادى, ياعني وتكەن جىلمەن سالىستىرعاندا 12%-عا كوتەرىلگەن. مەنەدجمەنت, ماركەتينگ, ستراتەگيا, ينۆەستيتسيا جانە كونسالتينگ سالالارىندا جالاقى ەداۋىر جوعارى. بارلىق سالالاردا ۇسىنىلعان ورتاشا جالاقىنىڭ ءوسۋى بايقالادى.
سونداي-اق ءبىرىنشى توقساندا HeadHunter پلاتفورماسىندا 900 مىڭنان استام (وتكەن جىلمەن سالىستىرعاندا 62%-عا كوپ) تۇيىندەمە جاريالانعان. تۇيىندەمەلەر اسىرەسە جۇمىسشى مامان مەن كولىك سالاسى قىزمەتكەرلەرىنەن كوپتەپ تۇسۋدە, بۇل وسى سالالارداعى جۇمىس ورىندارىنا سۇرانىس ارتقانىن كورسەتەدى.
