كىتاپ ليتۆا تىلىندە جارىق كوردى.
قازاقستان رەسپۋبليكاسىنىڭ ليتۆا رەسپۋبليكاسىنداعى توتەنشە جانە وكىلەتتى ەلشىسى تيمۋر ورازاەۆ كىتاپتىڭ تانىستىرىلىمىنا قاتىستى.
كىتاپحانا ديرەكتورى ەميليا بانيونيتە «مامليۋك» كىتابى تەك ليتۆادا عانا ەمەس, بۇكىل بالتىق وڭىرىندە قازاق مادەنيەتىنىڭ «تارتىلىس ورتالىعى» بولىپ قالا بەرەتىن اباي قۇنانباي ۇلى اتىنداعى وقۋ زالىنىڭ مارجانى بولاتىنىن اتاپ ءوتتى.
جينالعاندارعا اۆتور دا بەينە حابارلاما ارقىلى قوسىلىپ, جىلى لەبىزىن ءبىلدىردى.
ە.تۇرسىنوۆ شاراعا قاتىسۋشىلاردىڭ بارلىعىنا ءوز شىعارماشىلىعىنا كوڭىل ءبولىپ وتىرعانى ءۇشىن العىس ايتىپ, كىتاپتىڭ ليتۆالىق وقىرماندى تاباتىنىنا سەنىم ءبىلدىردى. ول ءۇشىن بۇل زەرتتەۋلەر مەن سۇلتان بەيبارىستىڭ ىزىمەن شىعىسقا ساياحات جاساۋ قىزىقتى پروتسەسس بولدى.
ليتۆانىڭ ەستونيا, تۇركيا, ءازىربايجان, وزبەكستان جانە فينلياندياداعى كوپجىلدىق ەلشىسى گالينا كوبەتسكايتە ءوز كەزىندە جۋرناليست جانە اۋدارماشى لاۋازىمىنان باستاپ, ادەبي اۋدارمالار ارقىلى حالىقتار ىنتىماقتاستىعىنا كومەكتەسۋ قانشالىقتى ماڭىزدى دەگەن قورىتىندىعا كەلگەنىن ايتىپ بەردى.
كىتاپ قازاقستاننىڭ ليتۆاداعى ەلشىلىگىنىڭ قامقورلىعىمەن دەمەۋشىلىك قاراجاتقا باسىلىپ شىقتى. ەلشىلىك قازاقستاننىڭ ليتۆاداعى قۇرمەتتى كونسۋلدارىنا, جەرگىلىكتى قازاق دياسپوراسىنا, ليتۆالىق كومپانيالارعا جانە «Žara» باسپا ۇيىنە كومەك كورسەتكەنى ءۇشىن العىس بىلدىرەدى. ۆيلنيۋس ۋنيۆەرسيتەتىنىڭ دوتسەنتى انتاناس سمەتونەگە اۋدارما جۇمىسى ءۇشىن ەرەكشە ريزاشىلىق ءبىلدىرىلدى.
ءىس-شاراعا قاتىسۋشىلار قازاقستاندىق كوركەم ادەبيەتپەن تانىسۋ ليتۆالىق وقىرمانداردىڭ ەلىمىزدىڭ تاريحى مەن تۇركى مۇراسى تۋرالى بىلىمدەرىن كەڭىنەن تانىمال «Born Bold» لوگىن اقتايتىن ءىرى تاريحي تۇلعالار مىسالىندا كەڭەيتۋگە ىقپال ەتەتىنىنە سەنىم ءبىلدىردى. ليتۆا تىلىندەگى «مامليۋك» كىتابى كەلەر جىلدىڭ باسىندا جىل سايىنعى «Vilnius Book Fair» كىتاپ جارمەڭكەسىندە ۇسىنىلادى.
ءىس-شاراعا ليتۆا سەيمىنىڭ دەپۋتاتتارى, شەتەلدىك ەلشىلەر, مەملەكەتتىك ورگانداردىڭ, اكادەميالىق, قوعامدىق جانە بيزنەس توپتاردىڭ, سونداي-اق ليتۆا باق وكىلدەرى قاتىستى.
