فوتو: ۇكىمەتتىڭ ءباسپاسوز قىزمەتى
وتىرىسقا مەملەكەتتىك ورگانداردىڭ وكىلدەرى مەن «اتامەكەن» ۇلتتىق كاسىپكەرلەر پالاتاسىنىڭ مۇشەلەرى قاتىستى. ولار قازىرگى رەتتەۋ ورتاسىنىڭ جاي-كۇيى مەن بيزنەس سالاسىنداعى نەگىزگى ماسەلەلەردى تالقىلادى.
كەزدەسۋ بارىسىندا بىرقاتار ماڭىزدى باعىتتار بويىنشا رەتتەۋشىلىك اسەرگە جۇرگىزىلگەن تالداۋدىڭ ناتيجەلەرى قارالدى. نەگىزگى ماسەلەلەردىڭ ءبىرى جەڭىل ونەركاسىپ تاۋارلارىنىڭ تاڭبالانۋىن جانە قاداعالانۋىن ەنگىزۋ, سونداي-اق جوعارى ۆولتتى جابدىقتارعا قويىلاتىن قاۋىپسىزدىك تالاپتارىن بەلگىلەۋ بولدى. زياتكەرلىك مەنشىك قۇقىقتارىنىڭ وبەكتىلەرىن پايدالانۋدى باقىلاۋ, سونداي-اق جوعارى ۆولتتى جابدىقتىڭ بەلگىلەنگەن ستاندارتتارعا سايكەستىگىن مىندەتتى تۇردە راستاۋ ماسەلەلەرى تالقىلاندى.
تالقىلاۋدىڭ ماڭىزدى بولىگى كاسىپكەرلىك قىزمەتتە ادام قۇقىقتارىنىڭ ساقتالۋىن قامتاماسىز ەتۋ بويىنشا جۇمىس توبىنىڭ ۇسىنىمدارى بولدى.
مەملەكەتتىك رەتتەۋشى ورگاندار مەن كوميسسيا مۇشەلەرى ۇسىنعان تۇجىرىمدار نەگىزىندە رەتتەۋشىلىك اسەرگە جۇرگىزىلگەن تالداۋدىڭ ناتيجەلەرى قارالىپ, ماقۇلداندى.
سەرىك جۇمانعارين بيزنەس-قاۋىمداستىقتىڭ حاباردار بولۋ دەڭگەيىن ارتتىرۋ ماقساتىندا مەملەكەتتىك رەتتەۋشى ورگاندارعا ەنگىزىلىپ جاتقان رەتتەۋ قۇرالدارى بويىنشا ءتۇسىندىرۋ جۇمىستارىن جۇرگىزۋدى تاپسىردى.
بۇدان بولەك, وتىرىستا بيزنەستىڭ وزەكتى ماسەلەلەرىن شەشۋ ءۇشىن ۇلتتىق ەكونوميكا ۆيتسە-ءمينيسترى توراعالىق ەتەتىن ءارى «اتامەكەن» ۇكپ تەڭ توراعالىعىمەن جۇمىس توبىن قۇرۋ ۇسىنىلدى. بۇل جۇمىس توبى ەكى اپتادا ءبىر رەت تۇراقتى تۇردە باس قوسىپ, ءار سالا بويىنشا كاسىپكەرلەر تاپ بولاتىن ماسەلەلەرگە نازار اۋداراتىن بولادى.
