ەكى ايعا سوزىلاتىن يگىلىكتى ىستەن ارداگەرلەر دە قالىس قالمادى. ولار قالالىق ارداگەرلەر كەڭەسىنىڭ ۇيىمداستىرۋىمەن ەسەت باتىر تۇرعىن ءۇي الابىنداعى ەسەت كوكى ۇلى ەسكەرتكىشى جانىنا بىرنەشە ءتۇپ شىرشا وتىرعىزدى. جاس كوشەتتەر مارتوك اۋدانىنداعى تالىمباقتان اكەلىندى. الماتى اۋدانى اكىمى رۇستەم وتەشوۆتىڭ حابارلاۋىنشا, جەرگىلىكتى جەردە وسىرىلگەن اعش كوشەتتەرى تەز جەرسىنەدى ءارى قۇرعاق كليماتقا وتە ءتوزىمدى. الداعى ۋاقىتتا دا سكۆەرلەر مەن ساياباقتارعا, قوعامدىق ورىندارداعى بوس الاڭقايلارعا مارتوك تالىمباعىنان ۇيەڭكى, قايىڭ, دولانا, قاراعاي, شىرشا كوشەتتەرى مەن بۇتالار اكەلىپ وتىرعىزىلادى.
مۇنىمەن ءبىر كەزدە اقتوبە قالاسىنداعى كەڭەس وداعىنىڭ باتىرى ءاليا مولداعۇلوۆا اتىنداعى اللەياعا 60 شاقتى ستۋدەنت, مەكتەپ وقۋشىلارى مەن NEET ساناتىنداعى جاستار جينالىپ, تازالىق جۇمىستارىن جۇرگىزدى, مەموريالدى كەشەن توڭىرەگىن جۋىپ, قوقىس جينادى. «جاسىل ەل» ەڭبەك وتريادتارى وبلىستىق شتابىنىڭ جانە «اتامكەن» ستۋدەنتتەر وتريادىنىڭ جەتەكشىسى نۇرجان شاڭعىتباەۆتىڭ ايتۋىنشا, ءار اپتا سايىن سەنبىلىككە قاتىسۋعا نيەتتى جاستار قاتارى تولىعىپ جاتىر. ولار باتىرلار اللەياسىنان اعايىندى جۇبانوۆتار كوشەسى مەن اىلقايىر داڭعىلىنا دەيىنگى ارالىقتى ءبىر مەزەتتە جيناپ شىقتى جانە گۇلزارلار ورنىن قوپسىتىپ, تال ەگەتىن ۇياشىقتار قازدى. «جاسىل ەل» وتريادىنىڭ جىگىتتەرى مەن قىزدارى جاز بويى ەكولوگيالىق اكتسيانى جالعاستىرىپ, ەلەك, قارعالى, سازدى وزەندەرىنىڭ جاعالاۋلارى مەن اقتوبە سۋ قويماسىنىڭ اينالاسىن تازالاماقشى.
اقتوبە وبلىسى.
