BBC جازعانداي, Hands Off («قولىڭدى تارت») اتتى ناۋقان ۇيىمداستىرۋشىلارى بۇل اكتسيالاردى ەلدىڭ 50 شتاتىنىڭ بارىندە 1200 جەردە وتكىزۋدى جوسپارلاعان. سەنبى كۇنى بوستون, نيۋ-يورك, چيكاگو, لوس-اندجەلەس پەن ۆاشينگتون قالالارىندا حالىق كوپتەپ جينالدى.
اقش-تىڭ ءىرى قالالارىندا تۇراتىن حالىق اراسىندا ترامپقا قارسى كوزقاراستاعى ادامدار باسىم. الايدا سوڭعى ايلاردا اشىق نارازىلىقتار سيرەك بولعان.
ترامپ يمپورتقا جوعارى كەدەندىك تاريف ەنگىزگەن سوڭ, باسقا ەلدەردە دە – اتاپ ايتقاندا, لوندون, پاريج جانە بەرليندە – وعان قارسى ىنتىماقتاستىق ميتينگىلەرى ءوتتى. ۆاشينگتوندا وتكەن ميتينگتە دەموكراتيالىق پارتيانىڭ زاڭ شىعارۋشىلارى ءسوز سويلەدى. ولار اسىرەسە ترامپقا دەمەۋشىلىك جاسايتىن باي ادامداردىڭ, سونىڭ ىشىندە يلون ماسكتىڭ ىقپالىن كوپ اتاپ ءوتتى. فلوريدادان سايلانعان كونگرەسسمەن ماكسۆەلل فروست بۇل جاعدايدى «ۇكىمەتىمىزدىڭ ميللياردەرلەرگە جۇتىلۋى» دەپ اتادى.
سەنبى كۇنى ترامپتىڭ ءوزى ەشقانداي كوپشىلىك شارالارعا قاتىسقان جوق. يمميگراتسيالىق پوليتسيا ICE-ءنىڭ مىندەتىن اتقارۋشى باسشىسى توم حوۋمان بۇل نارازىلىقتارعا قاتىستى Fox News كونسەرۆاتيۆتى ارناسىنا بەرگەن سۇحباتىندا پىكىر ءبىلدىردى.
- ولار بوس تۇرعان ءۇيدىڭ الدىندا قانشا قالاسا, سونشا نارازىلىق بىلدىرە الادى. نارازىلىق پەن ميتينگىلەر ەشتەڭە وزگەرتپەيدى. سوندىقتان ولار ءسوز بوستاندىعى قۇقىقتارىن پايدالانا بەرسىن. بىراق بۇل تۇككە تۇرمايدى, -دەدى.
