بوريس پاۆلوۆيچ ىرگەسىن قالاعان «التىنسارين» شارۋاشىلىعى بۇگىندە 120 مىڭ گەكتار القاپقا ءداندى, مايلى داقىل ەگىپ, 5 مىڭنان استام مال وسىرەدى. الپاۋىت سەرىكتەستىكتە 700-دەن استام ادام ەڭبەك ەتىپ جاتىر.
«شارۋاشىلىقتا جۇمىس ىستەيتىن 730 ادامنىڭ ارقايسىسىنىڭ وتباسى, بالا-شاعاسى بار. وسىنىڭ ءبارىن ەسكەرسەك, 4 مىڭعا جۋىق ادامنىڭ تاعدىرى ءبىزدىڭ سەرىكتەستىكپەن ساباقتاس دەپ ايتۋعا بولادى. مەن سول ادامداردىڭ ەڭبەگىن اقتاپ, تۇرمىسىنىڭ ءتۇزۋ بولۋىن ويلاۋىم كەرەك», دەيدى شارۋاشىلىق باسشىسى.
«التىنسارين» سەرىكتەستىگى كوپ جىلدان بەرى اۋىل تۇرعىندارىنىڭ ءال-اۋقاتىن ارتتىرۋعا دا ەرەن كۇش جۇمساپ, اياداي عانا اۋىلدىڭ بەرەكەلى تىرشىلىگىنە ۇيىتقى بولىپ كەلەدى. اتالعان سەرىكتەستىك ءوز جۇمىسكەرلەرىنىڭ جىل سايىنعى جەمشوپ, وتىن-سۋىن تەگىن ءتۇسىرىپ بەرەدى. اۋىلداعى تۇرعىن ءۇي ماسەلەسى دە وڭ شەشىم تاۋىپ, جىلىنا كەم دەگەندە بىرنەشە جاس وتباسىنا باسپانا بەرىلەدى. التىنسارين اۋىلىندا وتكەن جىلى بوي كوتەرگەن 6 ءۇيدىڭ ارقايسىسى 25 ملن تەڭگە تۇرادى. ارقايسىسىنىڭ اۋدانى 124 شارشى مەتر بولاتىن جاڭا ءۇيدىڭ بىرىندە نايل مەن ليانا بايازيتوۆتەر تۇرىپ جاتىر. جاس وتباسى ەكى بالا تاربيەلەپ وتىر. نايل «التىنسارين» سەرىكتەستىگىنە قاراستى 1-بريگادانىڭ مەحانيزاتورى بولىپ جۇمىس ىستەيدى. ليانا – گەوگرافيا ءپانىنىڭ مۇعالىمى.
«تۇرمىسىمىز جاقسى. وتكەن جىلى سەرىكتەستىك باسشىسى تەگىن باسپانا بەردى. ءۇش بولمەلى كەڭ ءۇيىمىز – وسى. گاز, سۋ كەلىپ تۇر», دەيدى ليانا.
مەكتەبى جوق اۋىلدىڭ كەلەشەگى بولمايدى. سوندىقتان بوريس كنيازەۆ الدىمەن مەكتەپ پەن بالاباقشانى قولعا الدى. كەڭەس ۋاقىتى كەزىنەن جۇدەپ تۇرعان مەكتەپتى, «قارلىعاش» بالاباقشاسىن كۇردەلى جوندەۋدەن وتكىزدى. اۋىل كلۋبىن دا قايتا جاڭعىرتىپ, جاستاردىڭ رۋحاني ورتالىعىن اشتى. كلۋبقا ارنايى مامانداردى شاقىرتىپ, كوركەمونەرپازدار ءانسامبلىنىڭ, ءتۇرلى باعىتتاعى سپورت ۇيىرمەلەرىنىڭ ىسكە قوسىلۋىنا مۇرىندىق بولدى.
التىنسارين اۋىلىنىڭ بۇگىنگى كەلبەتىن كورگەن ادام قالاعا بەرگىسىز ەكەن دەپ تاڭداي قاعاتىنى انىق. جازدا ءتۇپ-ءتۇزۋ تال-تەرەگى, اسەم گۇلزارلارى ەرەكشە كوز تارتاتىن اۋىل ورتالىعىندا بىرنەشە سۋبۇرقاق اتقىلاپ تۇرادى. جازعى دەمالىسقا شىققان بالالاردىڭ اۋىلدىڭ قاق ورتاسىنداعى باسسەينگە ءتۇسىپ, جاسىل گازون توسەلگەن ستاديوندا دوپ قۋىپ جۇرگەنى. شارۋاشىلىق ءوز قارجىسىنا ەڭسەلى سپورت كەشەنىن دە سالىپ قويعان.
«شارۋاشىلىقتىڭ نەگىزگى مىندەتى – ەگىن ەگۋ, استىق ءوندىرۋ. دەگەنمەن حالىقتىڭ الەۋمەتتىك جاعدايىنا دا جاۋاپتى ەكەنىمىزدى ۇمىتپاۋىمىز كەرەك. سپورت كەشەنىنە شارۋاشىلىق 100 ميلليون تەڭگەگە جۋىق قارجى جۇمسادى. بۇل از قاراجات پا؟ ەسەسىنە قازىر كەشەن اۋىلداستاردىڭ يگىلىگىنە, جاستاردىڭ, بالالاردىڭ سۇيىكتى ورنىنا اينالدى. ىشىندە سەبەزگى دەيسىز بە, ترەناجەر دەيسىز بە – سپورتقا كەرەكتىڭ ءبارى بار. ۆولەيبول, باسكەتبول, كۇرەس زالدارىندا جارىس قىزىپ جاتادى. ءتىپتى كوماندالارعا بۇرىن سىرتقا شىعا قويمايتىن ءۇي شارۋاسىنداعى ايەلدەردى دە قوسىپ العان. قىزىقتىڭ ءبارى سوندا», دەيدى بوريس پاۆلوۆيچ.
باسقاسىن ايتپاعاندا, التىنسارين اۋىلىندا كونە ماشينا-تراكتورلاردىڭ مۋزەيى بار. وتكەن عاسىردىڭ ورتاسىندا قۇرىلعان التىنسارين اتىنداعى كەڭشار, ودان بەرگى ۋاقىتتا شارۋاشىلىق پايدالانعان تەحنيكانىڭ نەشە ءتۇرىن وسى مۋزەيدەن تاباسىز. مۋزەيدە ەگىنشىلىك تاريحىنا قاتىستى 50 شاقتى ەسكى تەحنيكا تۇر. جادىگەر تەحنيكالاردىڭ ەڭ كونەسى – استىقتى وڭىردە ەكىنشى دۇنيەجۇزىلىك سوعىستان بۇرىنعى كەزەڭدە جۇرگەن ماشينالار. سونىمەن قاتار قامىستى ءوڭىرىنىڭ قيلى تاريحىنا, سوعىس, تىڭ كوتەرۋ, تاۋەلسىزدىكتىڭ باستاۋ كەزەڭدەرىنە قاتىستى, جەرگىلىكتى ءار الۋان ۇلتتىڭ ءداستۇر-سالتى, ەڭبەك مايتالماندارى, اۋىلى ۇلگى تۇتقان ادامدار تۋرالى دەرەكتەر مول. مۋزەي جادىگەرلەرىنىڭ ءبارى تەك وسى اۋىلدان جينالعان.
بوريس كنيازەۆتىڭ ءوڭىر رۋحانياتىنىڭ جاناشىرى ەكەنىن دە ايتپاي كەتۋگە بولماس. كاسىپكەر ۇلى اعارتۋشى ىبىراي التىنسارين تورعايدا اشقان تۇڭعىش مەكتەپتىڭ 150 جىلدىق مەرەكەسىنە وراي ءبىلىم ۇياسىنا 2 ميلليون تەڭگە تۇراتىن تەلەسكوپ سىيلادى.
«شارۋاشىلىقتى قايتا تىركەتكەندە اتاۋىن وزگەرتپەي, سول كۇيدە قالدىردىم. التىنسارين اتىندا اۋدان, مەكتەپ, ينستيتۋت, كوشە تاعى باسقالارى بولعان سوڭ, «التىنسارينو» دەپ اتاعاندى ءجون كوردىم. مەن ىبىراي ەسىمىن ەرەكشە قۇرمەتتەيمىن. ءالتىنساريننىڭ حالقى ءۇشىن ىستەگەن ەڭبەگىنىڭ بارلىعىنا قانىقتىم, قايران قالدىم. ىبىراي 19-20 جاسىندا مەكتەپ اشىپ, الفاۆيت ءتىزىپ, كىتاپ جازدى. بۇل ونىڭ جاسى ءۇشىن وتە ۇلكەن ءىس ەدى. ىبىراي اعارتۋشىنىڭ وسىدان ءبىر جارىم عاسىر بۇرىن باستاعان ءىسى بۇگىن دە ماڭىزىن جويعان جوق. ءالتىنساريننىڭ كورگەن بەينەتى دە از بولماعان. ول تەك قازاق بالالارىن عانا ەمەس, ورىس بالالارى ءۇشىن دە مەكتەپ اشتى. ۇلى ادامدار بارلىعىنا ورتاق بولادى», دەيدى بوريس پاۆلوۆيچ.
قوستاناي وبلىسى
