فوتو: اشىق دەرەككوز
ترامپ Truth Social الەۋمەتتىك جەلىسىندەگى پاراقشاسىندا 185 ەلدىڭ ءتىزىمىن جاريالادى, ولاردىڭ يمپورتتىق ونىمدەرىنە اقش اكىمشىلىگى ءوزارا نەگىزدە كەدەندىك باج سالىعىن ەنگىزەدى.
بازالىق تاريف 10% مولشەرىندە بەلگىلەنگەنىمەن, كوپتەگەن ەلدەر ءۇشىن بۇل كورسەتكىش جوعارى بولىپ شىقتى:
- قىتاي – 34%
- ەۋروپالىق وداق ەلدەرى – 20%
- شۆەيتساريا – 31%
- ۇلىبريتانيا – 10%
- يزرايل – 17%
- قازاقستان – 27%
- ۆەتنام – 46%
- كامبودجا – 49%
- لاوس – 48%
رەسەي بۇل تىزىمگە ەنبەگەن. سونىمەن قاتار, مەكسيكا, يران, كانادا جانە بەلارۋس ەلدەرىنە دە باج سالىعى ەنگىزىلمەگەن. ال ۋكراينادان كەلەتىن تاۋارلارعا 10% ساۋدا سالىعى سالىناتىنى حابارلاندى.
پوستكەڭەستىك ەلدەردىڭ كوپشىلىگىنە 10%-دىق تاريف ەنگىزىلگەن. الايدا قازاقستان (27%) مەن مولدوۆا (31%) ءۇشىن بۇل كورسەتكىش ايتارلىقتاي جوعارى. ارمەنيا, ازەربايجان, گرۋزيا, وزبەكستان, تۇركىمەنستان, قىرعىزستان جانە تاجىكستان ءۇشىن باج سالىعى 10% دەڭگەيىندە ساقتالدى.
ترامپ جەڭىل جانە جۇك كولىكتەرىنە, سونداي-اق اۆتوكولىك بولشەكتەرىنە 25%-دىق باج سالىعىن ەنگىزۋ تۋرالى بۇيرىققا قول قويدى.
اقش پرەزيدەنتى بۇل شارالاردى «ەكونوميكالىق تاۋەلسىزدىك دەكلاراتسياسى» دەپ اتاپ, 2 ءساۋىردى «امەريكا ازاتتىق كۇنى» دەپ اتادى.
«ونداعان جىلدار بويى اقش-تىڭ دوستارى مەن قارسىلاستارى ءبىزدىڭ ەكونوميكامىزدى پايدالاندى. بىراق باج سالىعىن ەنگىزۋمەن بۇل اياقتالدى. بۇل – اقش ءۇشىن جاڭا التىن عاسىردىڭ باستاۋى», دەدى ترامپ.
سونىمەن قاتار, ول باج سالىعىنىڭ مولشەرى وزگەرتىلۋى مۇمكىن ەكەنىن ەسكەرتتى. 10%-دىق بازالىق باج سالىعى – 5 ساۋىردەن باستاپ, بىرقاتار ەلدەر ءۇشىن جوعارى تاريفتەر – 9 ساۋىردەن باستاپ كۇشىنە ەنەدى.
ساراپشىلاردىڭ پىكىرىنشە, بۇل جاڭا تاريفتەر اقش-تاعى ينفلياتسيانىڭ وسۋىنە جانە تۇتىنۋ باعاسىنىڭ قىمباتتاۋىنا اكەلۋى مۇمكىن. سونداي-اق, كوپتەگەن ەلدەر اقش-تىڭ بۇل ارەكەتىنە جاۋاپ رەتىندە ءوز تاريفتەرىن ەنگىزۋى مۇمكىن, بۇل جاھاندىق ساۋدا سوعىسىنا الىپ كەلۋى ىقتيمال.
