جوعارى تەحنولوگيالىق جوبالار مەن ستارتاپتاردى دامىتۋعا ارنالعان «Farabi Hub» جاڭا عيماراتىندا وتكەن فورۋم الاڭىندا بىرلەسكەن يننوۆاتسيالىق جوبالارعا مۇددەلى بيزنەس, عىلىم جانە مەملەكەتتىك ورگانداردىڭ وكىلدەرى باس قوستى.
قالا باسشىلىعىن قازۇۋ باسقارما توراعاسى – رەكتور جانسەيىت تۇيمەباەۆ «Farabi Hub» يننوۆاتسيالىق ونىمدەر مەن جوعارى تەحنولوگيالىق جوبالار ورتالىعىن ارالاپ, قاشىقتىقتان زوندتاۋ, روبوتوتەحنيكا, سۋپەركومپيۋتەرلىك تەحنولوگيا, بيوتەحنولوگيا جانە نانوتەحنولوگيالار الاڭىنداعى زاماناۋي ازىرلەمەلەرمەن تانىستىردى.
پلەنارلىق سەسسيادا ەربولات دوساەۆ عىلىم مەن يننوۆاتسيانى ىلگەرىلەتۋ مەملەكەت باسشىسى ساياساتىنىڭ باستى باسىمدىعىنىڭ ءبىرى, دەپ اتاپ ءوتتى.
«پرەزيدەنتىمىزدىڭ يدەيالارىن جۇزەگە اسىرۋدا الماتىعا ەرەكشە ءمان بەرىلگەن. قالا – ەلىمىزدىڭ عىلىمي جانە ءبىلىم بەرۋ ورتالىعى. مۇندا قازاقستانداعى جوعارى وقۋ ورىندارىنىڭ ۇشتەن ءبىرى ورنالاسقان, 280 مىڭنان استام ستۋدەنت ءبىلىم الۋدا, 130-دان استام عىلىمي-زەرتتەۋ ورتالىعى جۇمىس ىستەيدى. بۇل ەلىمىزدەگى بارلىق عىلىمي ۇيىمداردىڭ ۇشتەن ءبىرى. سوڭعى ءۇش جىلدا عزتكج شىعىندارى ەكى ەسەدەن استام ءوسىپ, 2022 جىلعى 47 ميلليارد تەڭگەدەن بىلتىرعى جىلدىڭ قورىتىندىسى بويىنشا 95 ميلليارد تەڭگەگە جەتتى. بىلتىر مەگاپوليستە عىلىم جانە تەحنولوگيالار كەڭەسى قۇرىلدى. بۇل كەڭەس عالىمدار, بيزنەس جانە مەملەكەت اراسىنداعى ديالوگ الاڭى. باستى ماقساتى – تەحنولوگيالاردى ناقتى سەكتورعا ەنگىزۋ ماسەلەسىن شەشۋ» دەدى قالا باسشىسى.
اتاپ وتكەندەي, وڭتۇستىك استانانىڭ دامۋ باعدارلاماسى عىلىم جەتىستىكتەرى مەن تەحنولوگيا ترانسفەرتىن بەلسەندى پايدالانۋعا نەگىزدەلگەن. وسى ورايدا زەرتتەۋلەردى قارجىلاندىرۋعا جانە تەحنولوگيالاردى قالا ومىرىنە ەنگىزۋگە قاجەتتى قۇرالدار مەن مۇمكىندىكتەر بار. ەگەر جەتكىلىكتى جوبا ۇسىنىلسا, بيىل قالا دامۋىنىڭ جەتى نەگىزگى باعىتىنا سايكەس ءتۇرلى جوبالارعا 10 ميلليارد تەڭگەگە دەيىن قاراجات بولىنبەك.
الماتى قالاسى تسيفرلاندىرۋ باسقارماسىنىڭ مالىمەتىنشە, بىلتىر مەگاپوليس ەلىمىزدىڭ IT-سەكتورىنىڭ كوشباسشىسى بولىپ تانىلدى. سالاداعى قىزمەتتەردىڭ 52 پايىزى الماتىعا تيەسىلى. بىلتىر IT-نارىقتىڭ جالپى كولەمى شامامەن 3 ترلن تەڭگە بولسا, ونىڭ 1,6 ترلن تەڭگەسىن الماتى نارىعى قۇراعان.
ءوز كەزەگىندە, قازۇۋ رەكتورى جانسەيىت تۇيمەباەۆ اتاپ وتكەندەي, قازۇۋ الماتىنىڭ يننوۆاتسيالىق ەكوجۇيەسىنە كىرىگۋگە جانە عىلىمي ازىرلەمەلەردى كوممەرتسيالاندىرۋعا زور مۇمكىندىكتەرگە يە. سوندىقتان ەلىمىزدەگى جوعارى وقۋ ورىندارى اراسىندا ەڭ ءىرى تەحنوپارك, يننوۆاتسيالىق پارك جانە جاساندى ينتەللەكت ورتالىعىن سالۋ جوسپارلانىپ وتىر.
