فوتو: ءماجىلىس
قاراقات جاقسىلىققىزىنىڭ ايتۋىنشا, دەپۋتاتتار اۋىل تۇرعىندارىمەن كەزدەسۋلەردە مەحانيزاتورلار, اگرونومدار, ساۋىنشىلار, ۆەتەرينارلار جەتىسپەۋشىلىگى تۋرالى شاعىمداردى ەستيدى ەكەن.
«سالادا 60 مىڭنان استام مامان جەتىسپەيدى. ءاربىر ءۇشىنشى فەرما كادر تاپشىلىعىن باستان وتكەرىپ وتىر, اسىرەسە سولتۇستىك قازاقستان, اقتوبە, جامبىل, الماتى وبلىستارى. جاستار اۋىلدان كەتىپ جاتىر», دەدى دەپۋتات.
ق.ابدەننىڭ پىكىرىنشە, بۇگىندە جاستاردى وقىتىپ قانا قويماي, ولار وزدەرىنىڭ قابىلەتتەرىن تۋعان جەرىندە ىسكە اسىرۋى ءۇشىن جاعداي جاسالۋى قاجەت.
«مامانداردى دايارلاۋدىڭ نەگىزى «قاي جەردە تۋعان - سول جەردە پايدا بولدى», قاعيداتى بولۋى ءتيىس. شەشىم – مەكتەپتەردە اگروكاسىپتىك ءبىلىم بەرۋ ەنگىزىلىپ, 7-11 سىنىپتار ارالىعىندا وقۋشىلار مەحانيكالاندىرۋ, اگرونوميا, ۆەتەريناريا, مال شارۋاشىلىعى جانە اگروبيزنەس نەگىزدەرىن ۇيرەنۋى قاجەت», دەدى ءماجىلىس دەپۋتاتى.
دەپۋتاتتىڭ ايتۋىنشا, مەكتەپتەردە اگروپروفيلدى وقىتۋ ناتيجەلى بولار ەدى. ەرتە كاسىپتىك باعدار ارقىلى وقۋشىلار سۇرانىسقا يە ماماندىقتارعا يە بولادى. تەوريا جەرگىلىكتى اۋىل شارۋاشىلىعى كاسىپورىندارىندا پراكتيكامەن بەكىتىلەدى. سول اۋىل جەرگىلىكتى شارۋاشىلىقتىڭ ەرەكشەلىكتەرىن بىلەتىن مامانداردى الادى.
ماجىلىسمەننىڭ ايتۋىنشا كوپ ەلدەردە اۋىل شارۋاشىلىعى ءۇشىن كادرلار دايارلاۋ – مەكتەپتەن باستالادى.
«گەرمانيادا وقۋشىلار اۋىل شارۋاشىلىعى كاسىپورىندارىندا تاجىريبەدەن وتەدى, ال مەملەكەت ولاردىڭ وقۋىن سۋبسيديالايدى. كانادادا اگرومەكتەپتەر زاماناۋي تەحنولوگيالارعا باسىمدىق بەرە وقىتىپ, كادرلار تاپشىلىعىن ەداۋىر ازايتىپ وتىر. اۆستراليادا اۋىل شارۋاشىلىعىن جۇرگىزۋ ءۇشىن جەڭىلدەتىلگەن نەسيەلەر-گرانتتار ارقىلى مەكتەپ تۇلەكتەرىنە قولداۋ كورسەتەتىن ء«وز وڭىرىڭدە وقى جانە جۇمىس ىستە» باعدارلاماسى ەنگىزىلگەن», دەدى دەپۋتات ق.ابدەن.
دەپۋتاتتىڭ كوزقاراسىنشا, اتالعان حالىقارالىق تاجىريبە, ياعني, ورتا مەكتەپتەردە كادرلاردى جۇيەلى دايارلاۋ – اۋىل شارۋاشىلىعىن دامىتۋدىڭ جالعىز ءتيىمدى جولى. سول ورايدا, ۇكىمەتكە ۇسىنىستارىن ايتتى.
«1. ءبىلىم مينيسترلىگى – اۋىلدىق مەكتەپتەردە اگروپروفيلدى وقىتۋدىڭ مەملەكەتتىك باعدارلاماسىن ازىرلەسىن.
- اۋىل شارۋاشىلىعى مينيسترلىگى – مەكتەپتەردىڭ ءدۋالدى وقىتۋ ءۇشىن اۋىل شارۋاشىلىعى كاسىپورىندارىنا قولجەتىمدىلىگىن قامتاماسىز ەتسىن.
- ەڭبەك جانە حالىقتى الەۋمەتتىك قورعاۋ مينيسترلىگى – اوك-دە جۇمىس ىستەۋگە دايىن تۇلەكتەر ءۇشىن جەڭىلدىكتەر مەن گرانتتار جۇيەسىن ەنگىزسىن.
- ۇلتتىق ەكونوميكا مينيسترلىگى – بۇل باعدارلامانى اۋىلدى دامىتۋ جونىندەگى ۇلتتىق جوبالارعا ەنگىزسىن», دەپ ساۋالىن اياقتادى دەپۋتات.
قاراقات ابدەن «اۋىل» فراكتسياسى اتىنان ۇكىمەتتى ماسەلەنى شەشۋدى كەيىنگە قالدىرماي, قىسقا مەرزىمدە مەكتەپتەردە اگروونەركاسىپتىك ءبىلىم بەرۋدى ەنگىزۋ جونىندە ناقتى شارالار ۇسىنۋعا شاقىردى.
