فوتو: اشىق دەرەككوز
ەكولوگيا جانە تابيعي رەسۋرستار ءمينيسترى ەرلان نىسانباەۆ اتاپ وتكەندەي, بۇگىندە رەسپۋبليكادا ماتەريالدىق-تەحنيكالىق جابدىقتار جاڭارتىلىپ, ورمان ءورت ءسوندىرۋ تەحنيكاسى ساتىپ الىنعان. سونداي-اق ءورتتى ەرتە انىقتاۋ جۇيەلەرى ەنگىزىلىپ جانە جاڭا ورمان تالىمباقتارى قۇرىلىپ, ەرەكشە قورعالاتىن تابيعي اۋماقتار كەڭەيتىلىپ, قالدىقتاردى كادەگە جاراتۋ جوبالارى جۇزەگە اسىرىلىپ جاتىر. ال سيرەك كەزدەسەتىن جانۋارلار – جولبارىستار, قۇلاندار جانە پرجەۆالسكي جىلقىلارى تابيعاتقا قايتارىلادى.
«ورمانداردى قورعاۋدى كۇشەيتۋ جانە ماتەريالدىق-تەحنيكالىق جاڭارتۋ ءۇشىن ورتالىق بيۋدجەتتەن ورتكە قارسى جانە ورمان ءورت ءسوندىرۋ تەحنيكاسىن ساتىپ الۋعا 5,4 ملرد تەڭگە باعىتتالدى, جەرگىلىكتى قۇرىلىمداردان 6,7 ملرد تەڭگە ءبولىندى. ورمان ورتتەرىن ءتيىمدى ءسوندىرۋ ءۇشىن تراكتورلار, ارنايى تەحنيكا مەن جابدىقتار ساتىپ الىنىپ جاتىر. ورمان ورتتەرىن ەرتە انىقتاۋ جۇيەسى «قازاقتەلەكوممەن» بىرلەسىپ جۇزەگە اسىرىلۋدا. «جاسىل ايماق» پەن «سەمەي ورمانى» سياقتى 24 ورمان شارۋاشىلىعى اۋماقتارىن زەرتتەۋ جۇمىستارى باستالدى», دەپ حابارلادى ۇكىمەتتىڭ ءباسپاسوز قىزمەتى.
سونىمەن قاتار 6 وڭىردە جاڭا ورمان تالىمباقتارىن قۇرۋ جۇمىستارى جۇرگىزىلەدى. جالپى بيۋدجەت 21,2 ملرد تەڭگەنى قۇرايدى, ءاربىر تالىمباققا 3,5 ملرد تەڭگەدەن قارالعان. ونىڭ قۋاتى – 6 ملن كوشەت. قۇرىلىس 2025 جىلى باستالادى. بيوالۋانتۇرلىلىكتى ساقتاۋ تۇجىرىمداماسىن ازىرلەۋ باستالعان.
«جاڭا ەرەكشە قورعالاتىن تابيعي اۋماقتار (ەقتا) – «مەركە» وڭىرلىك پاركى (86 مىڭ گا), «ارال» (471 مىڭ گا) جانە «جايىق ورمانى» (46,9 مىڭ گا) رەزەرۆاتتارى قۇرىلۋدا. ءۇش اۋماقتى – ءۇستىرت, قاراتاۋ, ىلە-بالقاش, 648 مىڭ گەكتارعا كەڭەيتۋ جوسپارلانۋدا. 6 ەقتا-دا باقىلاۋ وتكىزۋ پۋنكتەرىن اۆتوماتتاندىرۋ جانە ەلەكتروندىق تولەم جۇيەسى ەنگىزىلۋدە. ورمانشىلارعا ارنالعان ءبىلىم بەرۋ ورتالىعى اشىلادى», دەلىنگەن حابارلامادا.
«2 ملرد ءتۇپ اعاش وتىرعىزىلىپ جاتىر. 2021 جىلدان باستاپ 1,145 ملرد اعاش ەگىلدى. سونداي-اق ارال تەڭىزىنىڭ قۇرعاعان تابانىن كوگالداندىرۋ جۇمىستارى جۇرگىزىلۋدە – 1,1 ملن گەكتارعا سەكسەۋىل وتىرعىزۋ جوسپارلانعان.قاتتى تۇرمىستىق قالدىقتارعا قاتىستى ماسەلەلەردى شەشۋ ماقساتىندا 238 ملرد تەڭگەگە 94 جوبادان تۇراتىن پۋل قالىپتاستىرىلدى. زاماناۋي پوليگوندار سالۋ, قايتا وڭدەۋدى دامىتۋ جانە قالدىقتاردى بولەك جيناۋدى ەنگىزۋ نەگىزگى باعىتتار سانالادى. سيرەك كەزدەسەتىن جانۋارلاردى تابيعاتقا قايتا جىبەرۋ جۇمىستارى جالعاسۋدا. جولبارىستاردى, قۇلانداردى جانە پرجەۆالسكي جىلقىلارىن قايتا جەرسىندىرۋ باعدارلامالارى جۇزەگە اسىرىلىپ وتىر», دەلىنگەن حابارلامادا.
