مقىا ءباسپاسوز قىزمەتىنىڭ جازۋىنشا, امەريكاداعى مەملەكەتتىك باسقارۋ سالاسىنداعى جەتەكشى كاسىبي قاۋىمداستىقتىڭ ۇيىمداستىرۋىمەن وتكەن ءىس-شارا – ادامي كاپيتالدى دامىتۋ جانە جاساندى ينتەللەكتىنى قولدانۋ سالاسىنداعى ۇزدىك تاجىريبەمەن الماسۋعا مۇمكىندىك بەردى.
پانەلدىك سەسسيادا ءسوز سويلەگەن دارحان جازىقباي پرەزيدەنت قاسىم-جومارت توقاەۆتىڭ وتاندىق مەملەكەتتىك قىزمەت جۇيەسىن جاڭعىرتۋ بويىنشا العا قويعان مىندەتتەرىنە سايكەس جۇزەگە اسىرىلعان اۋقىمدى وزگەرىستەرگە جانە باستامالارعا توقتالدى. ول مەملەكەتتىك قىزمەتتى بيۋروكراتيادان ارىلتۋ, پەرسونالدى باسقارۋدا زاماناۋي HR قۇرالدارىن ەنگىزۋ جانە مەملەكەتتىك اپپاراتتىڭ سەرۆيستىك مودەلىن قالىپتاستىرۋ باعىتىنداعى شارالاردى اتاپ ءوتتى. سونداي-اق جاڭا باسقارۋشىلىق مادەنيەتتى قالىپتاستىرۋداعى ماڭىزدى جوبالار – پرەزيدەنتتىك جاستار جانە وڭىرلىك كادر رەزەرۆتەرىن قۇرۋ تاجىريبەسىمەن ءبولىستى.
اگەنتتىك توراعاسى زامان تالاپتارىنا ساي مەملەكەتتىك اپپاراتتاعى ادام رەسۋرستارىن باسقارۋدىڭ بارلىق پروتسەسستەرى جانە مەملەكەتتىك قىزمەتكە كادرلاردى ىرىكتەۋ وتاندىق «eQyzmet» جۇيەسىندە تولىعىمەن اۆتوماتتاندىرىلعانىنا نازار اۋداردى. الداعى ۋاقىتتا جاساندى ينتەللەكت مۇمكىندىكتەرىن قولدانۋ زەردەلەنىپ جاتقاندىعى اتاپ ءوتىلدى.
قولدانىستاعى جۇيەنى ينستيتۋتسيونالدى تۇردە قايتا قاراۋدى كوزدەيتىن قر مەملەكەتتىك قىزمەتىن دامىتۋدىڭ 2024-2029 جىلدارعا ارنالعان تۇجىرىمداماسى بەكىتىلگەنى ايتىلدى. تۇجىرىمداما اياسىندا مەملەكەتتىك قىزمەتتىڭ گيبريدتى مودەلى ەنگىزىلىپ, قىزمەتشىلەردىڭ كولدەنەڭ مانساپتىق وسۋىنە جانە ەڭبەكاقى دەڭگەيىن ارتتىرۋعا مۇمكىندىك جاسالادى. جاستاردى مەملەكەتتىك قىزمەتكە تارتۋ جانە دايارلاۋ ءۇشىن ەرتە كاسىپتىك باعدارلاۋ ينستيتۋتىن قۇرۋ جوسپارلانۋدا.
«مەملەكەتتىك قىزمەتتى دامىتۋ پرەزيدەنتتىڭ «مەملەكەت ادام ءۇشىن» قاعيداتىنا نەگىزدەلگەن. قازاقستان جاھاندىق وزگەرىستەردى ەسكەرە وتىرىپ, وزىندىك پروگرەسسيۆتى دامۋ جولىن ۇستانىپ كەلەدى. ءبىز مەملەكەتتىك قىزمەتتىڭ زاماناۋي تالاپتارىن ەسكەرە وتىرىپ, يننوۆاتسيالاردى ەنگىزۋگە جانە قول جەتكىزگەن جەتىستىكتەرىمىزدى ودان ءارى جەتىلدىرۋگە مۇددەلىمىز», دەدى دارحان جازىقباي.
شەتەلدىك ارىپتەستەر قازاقستاننىڭ مەملەكەتتىك قىزمەتتى جەتىلدىرۋ, تسيفرلىق تەحنولوگيالاردى ەنگىزۋ تاجىريبەسىنە قىزىعۋشىلىق تانىتتى.
6 باعىت پەن 150 سەسسيانى قامتىعان كونفەرەنتسيادا باستى نازار تەحنولوگيالىق وزگەرىستەر مەن جاڭا تسيفرلىق قۇرالداردىڭ ۇزدىكسىز دامۋى جاعدايىندا «قوعامعا قىزمەت ەتۋ» تاسىلدەرىن قايتا قاراستىرۋ, جاساندى ينتەللەكتىنى ءتيىمدى پايدالانۋ, ونى باقىلاۋ جانە قوعام يگىلىگىنە جاراتۋ, سونداي-اق وسى سالالارداعى ىنتىماقتاستىقتى كۇشەيتۋ ماسەلەلەرىنە اۋدارىلدى.
