«لازگي. جان مەن ماحاببات ءبيى» بالەتى بي ءتىلى ارقىلى وتكەندى ءھام بۇگىن مەن بولاشاقتى بايلانىستىرىپ, كورەرمەندى ۋاقىتقا ساياحات جاساۋعا جەتەلەيدى. ءبىرىنشى اكتىدە ءىس-ارەكەت جىبەك جولى ايماعىندا ءوربىپ, مۇندا جولاۋشىلار السىرەگەن ايەلدى كەزدەستىرەدى. جاداپ-جۇدەگەن ايەلگە مۋزىكا جان ءبىتىرىپ, وعان جاڭا ءومىر سىيلايدى. كەرۋەن باسى بەيتانىس ايەلگە عاشىق بولىپ, ولاردىڭ ماحاببات حيكاياسى عالامات اڭىزعا اينالادى. ەكىنشى بولىمدە وقيعا قازىرگى كەزەڭدەگى مۋزەيدە جالعاسادى, وندا ماحاببات ەسىمدى بويجەتكەن تاريحي كەيىپكەرلەردىڭ بىرىنەن ءوزىن كورەدى. باقسى ونىڭ وتكەنمەن بايلانىسىن جانداندىرادى, وسىلايشا جادىگەرلەرگە جان ءبىتىپ, ەستەتيكاعا تولى اسەم كورىنىس ءداستۇر مەن بۇگىنگى زاماننىڭ بىرلىگىن بەينەلەيدى. ءۇشىنشى اكتىدە بالەت الەمنىڭ قارقىندى دامۋى تاقىرىبىن قوزعاپ, وتكەن شاق, قازىرگى كەز بەن بولاشاقتىڭ بيدە توعىسۋى مادەني مۇرانى ساقتاۋ تۋرالى ويعا جەتەلەيدى. فينالدا جان مەن ماحاببات اراعا ۋاقىت سالىپ بىرىگەدى, بۇل – رۋحاني نەگىز بەن ماحابباتتىڭ ماڭگىلىك بايلانىسىن بىلدىرەدى, ال ءبيدىڭ ءوزى وزبەكستاننىڭ باي مادەنيەتىنىڭ كورىنىسىنە اينالادى.
«وزبەكستان ۇلتتىق بالەتىنىڭ «استانا وپەراداعى» گاسترولى – ەكى ەل اراسىنداعى مادەني ىنتىماقتاستىق اياسىنداعى ماڭىزدى وقيعا. وسىناۋ تاماشا شىعارماشىلىق ۇجىمدى ساحنامىزدا قارسى العانىمىزعا قۋانىشتىمىز. «لازگي. جان مەن ماحاببات ءبيى» قويىلىمى دۇنيەجۇزى بويىنشا كورەرمەندەردىڭ سۇيىسپەنشىلىگىن جاۋلاپ ۇلگەردى, وسى رەتتە ءبىزدىڭ كورەرمەندەرىمىز ءۇشىن دە بۇل سپەكتاكلدى تاماشالاۋ ۇلكەن قۋانىش. مادەني ىنتىماقتاستىعىمىز كەلەشەكتە دە جالعاسىن تاۋىپ, قازاقستان مەن وزبەكستاننىڭ ايتۋلى تەاترلىق جوبالارىمەن قۋانتادى دەگەن ۇمىتتەمىن», دەپ اتاپ ءوتتى «استانا وپەرا» ديرەكتسياسى.
تانىمال نەمىس حورەوگرافى ءارى بالەتمەيستەر راۋل رايموندو رەبەك جاساعان بۇل سپەكتاكل يۋنەسكو الەمنىڭ ماتەريالدىق ەمەس مادەني مۇراسىنىڭ بولىگى رەتىندە تانىعان لازگي كونە حالىق بيىنە ارنالعان. سونداي-اق قويىلىممەن ايگىلى سۋرەتشىلەردىڭ حالىقارالىق توبىنىڭ باسقا دا مۇشەلەرى جۇمىس ىستەدى. مۋزىكالىق سۇيەمەلدەۋدى كومپوزيتور دەۆيدسون دجاكونەللو جازدى, ال كەرەمەت دەكوراتسيالار مەن جارىق ەففەكتىلەرىن جاپوندىق كوپقىرلى سۋرەتشى يوكو سەياما قۇراستىردى. ليبرەتتو مەن حورەوگرافيا اۆتورى – بەلگىلى ساحنا شەبەرى, بەرلين مەملەكەتتىك وپەراسىنىڭ جانە ەسسەندەگى االتو تەاترىنىڭ بۇرىنعى ءسوليسى, «Prix de Lausanne» سىندى كوپتەگەن حالىقارالىق ماراپاتتىڭ يەگەرى راۋل رايموندو رەبەك. ءار جىلدارى ول الەمدىك بالەتتىڭ اڭىزعا اينالعان تۇلعالارى – موريس بەجار, رۋدولف نۋريەۆ, ۋيليام فورسايتپەن بىرلەسىپ جۇمىس ىستەدى.
2021 جىلى تاشكەنتتەگى پرەمەراسىنان باستاپ وزبەكستان ۇلتتىق بالەتىنىڭ سپەكتاكلى ءتۇرلى ەلدەردەگى كورەرمەندەردىڭ جۇرەگىن جاۋلادى. ونىڭ العاشقى حالىقارالىق پرەمەراسى «Dubai Opera» ساحناسىندا ءوتتى, ودان كەيىن قويىلىم تۇركيا (ىستانبۇل, بۋرسا), گەرمانيا (دورتمۋند), فرانتسيا (پاريج) جانە رەسەيدە (سانكت-پەتەربۋرگ, ماسكەۋ) تانىستىرىلدى. 2024 جىلى سپەكتاكل بەيجىڭ, باكۋ جانە لوندوندا زور جەتىستىكپەن ءوتتى.
