ناۋرىز مەرەكەسى قارساڭىندا باسپانالى بولعان تۇرعىندارعا پاتەر كىلتىن باتىس قازاقستان وبلىسىنىڭ اكىمى ناريمان تورەعاليەۆ تابىس ەتتى. ءوڭىر باسشىسى قونىستوي يەلەرىن مەرەكەمەن قۇتتىقتاپ, ازاماتتاردى قولجەتىمدى باسپانامەن قامتاماسىز ەتۋ مەملەكەت باسشىسى قاسىم-جومارت توقاەۆ قويعان نەگىزگى مىندەتتىڭ ءبىرى ەكەنىن اتاپ ءوتتى.
وبلىس اكىمى ءباسپاسوز قىزمەتىنىڭ دەرەگىنشە, 2024 جىلى ورال قالاسىندا بيۋدجەت ەسەبىنەن 628 پاتەرلىك بەس كوپقاباتتى تۇرعىن ءۇي پايدالانۋعا بەرىلگەن. سونىمەن بىرگە اۋىلدىق جەرلەردە 805 تۇرعىن ءۇي ساتىپ الىنىپ, تۇرعىندارعا تابىستالعان. وعان قوسا بىلتىرعى سۋ تاسقىنىنان زارداپ شەككەندەر ءۇشىن 900 ءۇي جاڭادان سالىنىپ, 2 مىڭنان استام پاتەر ساتىپ الىپ بەرىلگەن.
ن.تورەعاليەۆ بيىل وبلىستا 19 كوپقاباتتى تۇرعىن ءۇيدىڭ قۇرىلىسى اياقتالاتىنىن, بۇل تاعى 950 وتباسىنى باسپانامەن قامتاماسىز ەتەتىنىن ايتتى. بۇدان بولەك, رەسپۋبليكالىق بيۋدجەت ەسەبىنەن الەۋمەتتىك وسال توپتاعى ازاماتتارعا 205 پاتەر ساتىپ الۋ كوزدەلىپ وتىر.
– بۇگىن «اقجايىق» شاعىن اۋدانىندا 120 پاتەرلىك جاڭا ءۇيدى پايدالانۋعا بەرىپ جاتىرمىز. بۇل ناۋرىز مەيرامى قارساڭىندا جەرلەستەرىمىز ءۇشىن ۇلكەن قۋانىش. مۇندا بارلىعى 25 كوپقاباتتى تۇرعىن ءۇي سالۋ جوسپارلانعان. قازىرگى ۋاقىتتا ونىڭ سەگىزىنىڭ قۇرىلىسى اياقتالدى. جالپى, جىل سوڭىنا دەيىن بيۋدجەت قاراجاتى ەسەبىنەن 1500-دەن استام پاتەر پايدالانۋعا بەرىلەدى. سونداي-اق ۇيلەرى قاۋىپتى دەپ تانىلعان تۇرعىندارعا 180 پاتەر ساتىپ الامىز, – دەدى ن.تورەعاليەۆ.
ورال قالاسىنىڭ كۇنباتىسىندا بوي كوتەرىپ جاتقان «اقجايىق» شاعىن اۋدانى قارقىندى دامىپ كەلەدى. مۇندا ءبىلىم بەرۋ, دەنساۋلىق ساقتاۋ, مادەنيەت, سپورت نىساندارىن سالۋ دا جوسپارلانعان. 2024 جىلدىڭ سوڭىندا 150 ورىندىق زاماناۋي وڭالتۋ ورتالىعى پايدالانۋعا بەرىلدى. بولاشاقتا دا حالىقتىڭ ءومىر ساپاسىن ارتتىرۋعا باعىتتالعان جاڭا الەۋمەتتىك ماڭىزى بار نىسانداردىڭ قۇرىلىسى قولعا الىنباق. تاياۋدا جاڭا شاعىن اۋداندى قالانىڭ وزگە بولىگىمەن جالعايتىن جاڭا اۆتوبۋس باعىتى ىسكە قوسىلدى.
باتىس قازاقستان وبلىسى
