سۋرەتتەردى تۇسىرگەن – اقادىل رىسماحان
قورشاعان ورتانى قورعاۋ, ەكولوگيالىق مادەنيەتتى قالىپتاستىرۋ ماقساتىندا قولعا الىنعان اكتسيا اياسىندا «بايتەرەك» شاعىن اۋدانىنداعى №3 مەكتەپ-ليتسەي ماڭىنا 150 كوشەت وتىرعىزىلدى. «TazaLike» اكتسياسى سودان سوڭ ەلىمىزدەگى ەڭ ءىرى شاعىن اۋدان ساناتىنا ەنگەن « ۇلى دالا» ىقشام اۋدانىندا جالعاستى. رەسمي دەرەككە سۇيەنسەك, « ۇلى دالا» شاعىن اۋدانىندا 500 دانا كوشەت ەگىلدى.
«TazaLike» اكتسياسى ودان ءارى «تازا قالا» ءىس-شاراسىنا ۇلاستى. تاراز, جاڭاتاس, قاراتاۋ, شۋ قالالارىنىڭ تۇرعىندارى بۇل كۇنى كۇل-قوقىستاردى شىعارىپ, ارىق-اتىزدار مەن ارنالاردى قوقىستان تازارتتى.
وبلىس اكىمدىگى ءباسپاسوز قىزمەتى كەلتىرگەن دەرەككە جۇگىنسەك, «TazaLike» اكتسياسى 20 ساۋىرگە دەيىن جالعاسادى. وعان ءوڭىردىڭ بارلىق اۋدانى ۇلەس قوسادى. ءوڭىر باسشىسىنىڭ ورىنباسارى قاناتبەك مادىبەكتىڭ ايتۋىنشا, «تازا قازاقستان» ەكولوگيالىق اكتسياسى اياسىندا بيىلعى جىلى دا اۋقىمدى جۇمىس اتقارىلادى. وڭىردە كوگالداندىرۋ جۇمىسىنا 1,2 ملرد تەڭگە قارجى قاراستىرىلعان.
«وبلىس ورتالىعى تاراز قالاسىندا «Jambyl Cement» كومپانياسىنىڭ ىقپال ەتۋىمەن 3,6 مىڭ, «تاراز مەتاللۋرگيالىق زاۋىتى» ۇجىمىنىڭ قولداۋىمەن 10 مىڭ كوشەت وتىرعىزۋ جوسپارلانعان», دەيدى ق. مادىبەك.
سارىسۋ اۋدانى اۋماعىندا ورنالاسقان «Qazaq soda» كومپانياسىنىڭ وكىلدەرى 27 مىڭ كوشەت وتىرعىزۋدى مەجە تۇتىپ وتىر. جەرگىلىكتى اكىمدىكتىڭ ىقپال ەتۋىمەن باستالعان باستاما اياسىندا ۇجىم ەكومادەنيەتتى قالىپتاستىرۋعا, ساقتاۋعا بارىنشا ۇلەس قوسپاقشى. جالپى, ەكولوگيالىق اكتسياعا ۇلەس قوسۋعا بەكىنگەن بىرقاتار كومپانيا مەن زاۋىت وكىلدەرىنىڭ كوپ كۇتتىرمەي, ىسكە قىزۋ كىرىسىپ جاتقانى كوڭىل قۋانتادى.
ناۋرىزنامانىڭ تازارۋ كۇنى اياسىندا دا بىرقاتار جۇمىس اتقارىلدى. ساياباقتار مەن كوشەلەردە تازارتۋ جۇمىسى جۇرگىزىلدى. وبلىستىق جاستار رەسۋرستىق ورتالىعىنىڭ ىقپال ەتۋىمەن, «جاسىل ەل» ەرىكتىلەرىنەن جاساقتالعان جاستار وبلىس ورتالىعىنداعى «دەنساۋلىق» ساياباعىنداعى ارىق-اتىزدى, كۇرە جول بويىنداعى كۇل-قوقىستى تازالادى.
وڭىردەگى كوگالداندىرۋ جۇمىسى ىلكى ساتكە دە توقتاماق ەمەس. بيىل تاراز قالاسى مەن اۋدانداردا 195 مىڭ كوشەت وتىرعىزۋ جوسپارلانعان ەكەن. سونداي-اق ەگىلگەن كوشەتتەردى تسيفرلاندىرۋ جۇمىسى دا جوسپارعا ساي جۇزەگە اسىرىلىپ جاتىر.
«جالپى العاندا بۇگىنگى كۇنگە دەيىن «بولاشاقتى بىرگە وتىرعىزامىز» اكتسياسىن وتكىزىپ ۇلگەردىك. ناتيجەسىندە, 28,9 مىڭ كوشەت ەگىلدى. وعان 381 مەكتەپتىڭ 47,8 مىڭ ءبىلىم الۋشىسى اتسالىستى. قولعا الىنعان «ۇلگىلى اۋىل», «ۇلگىلى اۋلا» بايقاۋلارى ارقىلى ءوڭىر تۇرعىندارىنىڭ قورشاعان ورتاعا قامقورلىقپەن قاراۋىنا دەن قويۋ جوسپارىمىزدا بار», دەيدى ق.مادىبەك.
جاقىندا جوسپارعا سايكەس تاراز قالاسىنداعى «اۋليەاتا» اۋدانىندا «تازا اۋلا – تازا قالا» اكتسياسى وتكىزىلدى, ءوڭىردىڭ بىرقاتار اۋدانىندا «تازا اۋلا» ءىس-شاراسى ۇيىمداستىرىلدى. ناتيجەسىندە, ۇزدىكتەر انىقتالىپ, ماراپاتتالدى.
جالپى العاندا, وڭىردە «تازا قازاقستان» ەكولوگيالىق اكتسياسى اياسىندا بىرقاتار اۋقىمدى ءىس-شارا وتكىزۋ كوزدەلگەن. سانيتارلىق تازالىق, اباتتاندىرۋ, كوگالداندىرۋ جۇمىسىنا 8,3 ملرد تەڭگە سوماسىندا قاراجات قاراستىرىلعان. بولىنگەن قارجى ەسەبىنەن تاريحي-مادەني ەسكەرتكىشتەردىڭ توڭىرەگىن, ساياباق پەن سكۆەر اۋماعىنا تازالىق جۇمىسىن جۇرگىزۋگە, اباتتاندىرۋ جۇمىسىن ىسكە اسىرۋعا باسىمدىق بەرىلمەك.
ء«وڭىردىڭ «جاسىل بەلدەۋ» جوسپارىنا سايكەس اتقارىلاتىن جۇمىس از ەمەس. بيىل 195 مىڭ جاسىل جەلەك وتىرعىزىلادى. سونداي-اق ەگىلەتىن كوشەتتەردى كۇتىپ ۇستاۋ, ولاردى سۋارۋ جۇيەسىمەن قامتاماسىز ەتۋ, قورشاۋ ورناتۋ جۇمىستارى دا باستى نازاردا بولادى.
ءوڭىردىڭ ەلدى مەكەندەرىندەگى جاسىل جەلەكتى كۇتىپ-ۇستاۋ, قورعاۋ قاعيدالارىنا سايكەس, تاراز قالاسىنداعى اعاشتاردى تسيفرلاندىرۋ ماقساتىندا 40 ملن تەڭگە قارالىپ, 48,6 گەكتار اۋماقتاعى 30 018 دانا تال-داراق ەسەپكە الىندى», دەيدى ق.مادىبەك.
جامبىل وبلىسى
