بۇل كۇنى اۋليەاتالىق الەۋمەت ەسىمى ەلگە بەلگىلى انشىلەردىڭ ادەمى اندەرىن تىڭداپ, كۇمبىرلەگەن كۇي سارىنىنا قۇلاق ءتۇردى. قايرات رىسقۇلبەكوۆ اتىنداعى ساياباققا تىگىلگەن اقشاڭقان كۇيىز ۇيلەردىڭ ماڭى دۋمانعا بولەندى. ۇلتتىق كيىم كيگەن قىز-جىگىتتەر التىباقان تەۋىپ, مارە-سارە بولدى. سونداي-اق ۇلتتىق سپورت تۇرلەرىنەن ۇيىمداستىرىلعان تارتىستى جارىستار دا مەرەكەگە ءسان بەردى.
«كوكتەمنىڭ شۋاقتى مەيرامى بيىل قاسيەتتى رامازان ايىمەن تۇسپا-تۇس كەلىپ وتىر. ءاز-ناۋرىز – جاڭارۋ مەن جاڭعىرۋدىڭ, بەرەكە مەن بىرلىكتىڭ باستاۋى. كۇن مەن ءتۇن تەڭەسەتىن وسىناۋ مەرەكەنىڭ قازاق حالقى ءۇشىن قاي كەزدە دە ورنى بولەك.
مەملەكەت باسشىسى قاسىم-جومارت توقاەۆ جۋىردا وتكەن ۇلتتىق قۇرىلتايدا ناۋرىز مەرەكەسىنىڭ مارتەبەسىن كوتەرىپ, مازمۇنىن بايىتۋدىڭ ماڭىزى زور ەكەنىن اتاپ وتكەنى بەلگىلى. ال وتكەن جىلى پرەزيدەنتتىڭ باستاماسىمەن جىل باسىن تويلاۋدىڭ جاڭا تۇجىرىمداماسى ەنگىزىلدى. ناۋرىزنامانىڭ ونكۇندىگى بيىل دا لايىقتى جالعاسىن تاپتى. وعان ءوڭىرىمىزدىڭ بارلىق اۋداندارى مەن اۋىلدارى اتسالىستى.
ۇلتتىق سالت-ءداستۇرىمىز بەن قۇندىلىقتاردى دارىپتەۋ – بارشامىزدىڭ ورتاق مىندەتىمىز. ءاز-ناۋرىز قۇتتى بولسىن! ءاربىر وتباسىندا شاتتىق, قۋانىش بولسىن», دەدى وبلىس اكىمى ەربول قاراشوكەەۆ ءوڭىر حالقىن قۇتتىقتاپ.
بۇل كۇنى ءاز-ناۋرىز مەيرامى ءوڭىردىڭ بارلىق اۋدانى مەن اۋىلىندا ءسان-سالتاناتىمەن جالعاستى. ۇلتتىق سالت-ءداستۇر جاڭعىرعان مەرەكەدە اقىندار ايتىسى وتكىزىلىپ, قازاق كۇرەسى سەكىلدى ۇلتتىق سپورت تۇرلەرىنەن جارىستار ۇيىمداستىرىلدى.
جامبىل وبلىسى
