فوتو: وكق
بريفينگ پرەزيدەنتتىڭ 2024 جىلعى 2 قىركۇيەكتەگى قازاقستان حالقىنا جولداۋىندا ايتىلعان تاپسىرمالارىن ىسكە اسىرۋ جونىندەگى جۇيەلى جۇمىستىڭ جالعاسى بولىپ تابىلادى. مەملەكەت باسشىسى سپورت سالاسىنداعى زاڭنامانى جاڭارتۋ قاجەتتىلىگىن, سونداي-اق چەمپيونداردىڭ جاڭا بۋىنىن تاربيەلەۋ ءۇشىن جاعداي جاساۋعا نازار اۋدارۋ كەرەكتىگىن اتاپ وتكەن بولاتىن.
مەملەكەت باسشىسىنىڭ تاپسىرماسى بويىنشا سپورت سالاسىندا كەشەندى رەفورمالاردى جۇزەگە اسىرۋ باستالدى. مينيسترلىك «دەنە شىنىقتىرۋ جانە سپورت تۋرالى» زاڭ جوباسىن ازىرلەدى. ول 2025 جىلدىڭ 29 قاڭتارىندا ماجىلىستە ەكىنشى وقىلىمدا ماقۇلدانىپ, سەناتتىڭ قاراۋىنا جىبەرىلدى.
سپورت فەدەراتسيالارىنىڭ جۇمىستارى ءبىر جۇيەگە كەلتىرىلەدى
س.جاراسباەۆتىڭ ايتۋىنا سۇيەنسەك, قازىرگى ۋاقىتتا ەلىمىزدەگى جەرگىلىكتى, وڭىرلىك جانە رەسپۋبليكالىق سپورت فەدەراتسيالارى جەكە سۋبەكتىلەر رەتىندە ارەكەت ەتەدى جانە ءبىر-بىرىنە باعىنبايدى. بۇل جاعداي سپورتتى دامىتۋداعى تاۋەلسىز ساياسات جۇرگىزۋگە, مۇددەلەر قاقتىعىسىنا جانە جاۋاپكەرشىلىكتىڭ ب ۇلىڭعىرلىعىنا اكەپ سوعىپ جاتىر, ناتيجەسىندە سپورتتىڭ دامۋى باياۋلاپ وتىر.
«ۇسىنىلىپ وتىرعان جاڭا مودەل جەرگىلىكتى فەدەراتسيالاردىڭ اككرەديتتەلگەن رەسپۋبليكالىق (نەمەسە وڭىرلىك) سپورت فەدەراتسيالارىنا باعىنىشتى بولۋىن كوزدەيدى. بۇل وزگەرىس سپورتتى دامىتۋ سالاسىنداعى باسقارۋدى ورتالىقتاندىرۋدى, تيىمدىلىكتى ارتتىرۋدى جانە جاۋاپكەرشىلىكتى ايقىنداۋدى ماقسات ەتەدى», دەدى سپيكەر.
سپورت رەزەرۆىن دايارلاۋ ماسەلەلەرىنە ايتارلىقتاي وزگەرىستەر ەنگىزىلەدى
سپيكەردىڭ ايتۋىنشا زاڭ جوباسىنا سايكەس, سپورت رەزەرۆى تەك جوعارى جەتىستىكتەر سپورتىنىڭ تۇرلەرى بويىنشا دايارلاناتىن بولادى. سپورتشىلاردى دايارلاۋ ۋاكىلەتتى ورگان بەكىتەتىن سپورتتىق دايارلىقتىڭ ۇلتتىق ستاندارتتارىنا سايكەس قاتاڭ تۇردە جۇرگىزىلىپ, ۇلتتىق قۇرامانىڭ الەۋەتىن ارتتىرۋ جانە سپورت سالاسىنداعى جۇيەلى دامۋ ءۇشىن نەگىز بولماق.
«سونىمەن قاتار, كاسىبي سپورتتى مەملەكەتتىك بيۋدجەت قاراجاتى ەسەبىنەن قارجىلاندىرۋعا قاتىستى جاڭا ەرەجەلەر ۇسىنىلادى. زاڭ جوباسى بويىنشا, كاسىبي كلۋبتاردى ۇستاۋعا مەملەكەت تاراپىنان قارجىلاندىرۋ ليميتتەرى بەلگىلەنەتىن بولادى. بۇل شارا بيۋدجەتتىك شىعىستاردىڭ تيىمدىلىگىن ارتتىرىپ, سپورتتى دامىتۋعا بولىنگەن قاراجاتتىڭ دۇرىس پايدالانىلۋىن قامتاماسىز ەتەدى», دەدى سەرىك جاراسباەۆ.
