بانككە وسىدان ەكى كۇن بۇرىن ءوتىنىش بەرگەن جاس مامان بۇگىن ەكى بولمەلى پاتەردىڭ قۇجاتىن قولىنا الدى. دانيار پاتەردى جاڭا سالىنىپ جاتقان ءزاۋلىم ۇيلەردىڭ بىرىنەن تاڭداعان. مۇندا قازىر ارلەۋ جۇمىستارى ءجۇرىپ جاتىر. پاتەردى باستان-اياق قۇرىلىس كومپانياسىنىڭ ءوزى سالىپ, كىرۋگە دايىن ەتىپ بەرەدى.
«قۋانىشىمدى سوزبەن ايتىپ جەتكىزۋ مۇمكىن ەمەس. وسىعان دەيىن انام ەكەۋمىز پاتەر جالداپ تۇرىپ كەلدىك. ەندى باسىمدا ءۇيىم بار. اسىرەسە انامنىڭ قۋانعانىن كورسەڭىز. بۇل – مەنىڭ جەكە ومىرىمدەگى ۇلكەن قادام, ۇمىتىلماس ساتتەردىڭ ءبىرى. ەندى كەلەشەكتىڭ قامىن جاساپ, وتباسىن قۇرۋ جاعىن ويلاستىرا بەرسەم بولادى», دەيدى جاس مامان.
«ناۋرىز جۇمىسكەر» باعدارلاماسى – جۇمىسشى ماماندارعا مەملەكەت تاراپىنان جاسالىپ جاتقان ناقتى قولداۋ, ۇلكەن قامقورلىق. باعدارلاماعا قاتىسۋشىلارعا تۇرعىن ءۇي تاڭداۋعا التى اي ۋاقىت بەرىلەدى. باستاپقى جارنانىڭ كولەمى – باسپانا باعاسىنىڭ 10%-ى. الايدا بۇل 2 ميلليون تەڭگەدەن كەم بولماۋعا ءتيىس.
باعدارلاما ىسكە قوسىلعان العاشقى ءۇش كۇننىڭ ىشىندە «وتباسى بانك» 31 ملرد تەڭگەگە 1 094 ءوتىنىش قابىلداعان. ءوتىنىش جاساعانداردىڭ ورتاشا جاس مولشەرى – 31-دە. نەسيە الۋشىلاردىڭ ەڭ جاسى – ەندى عانا ەڭبەك جولىن باستاعان 19-داعى جاستار.
«ەڭ باستىسى, باعدارلاما ناقتىلى جۇمىس ىستەيدى. ياعني جاس ماماندار ءتيىمدى باعامەن تۇرعىن ءۇي ساتىپ الا الادى. قۇرىلىس كومپانيالارى دا تۇرعىندار قوسىمشا قيىندىق كورمەيتىن, تولىق اياقتالعان پاتەرلەردى ۇسىنۋعا دايىن. مەملەكەت باسشىسى 2025 جىلدى «جۇمىسشى ماماندىقتار جىلى» دەپ جاريالاعانى بەلگىلى. وسىعان وراي ەلىمىزدە جۇمىسشىلاردىڭ ءومىر ءسۇرۋ ساپاسىن جاقسارتۋعا باعىتتالعان ناقتى شەشىمدەر قابىلدانىپ, ىسكە اسىرىلىپ جاتىر. مۇنى زاۋىت-كاسىپورىندار دا قولداپ وتىر. مەملەكەتتىك باعدارلاما جاس مامانداردىڭ باسپانالى بولۋىنا كومەكتەسەدى», دەيدى «وتباسى بانك» باسقارماسى توراعاسىنىڭ ورىنباسارى نۇرلان اقشانوۆ.
قوستاناي وبلىسى
