فوتو: اقوردا
قاسىم-جومارت توقاەۆقا جەدەلدىكتى قامتاماسىز ەتۋ ءۇشىن بىرىڭعاي اۋماقتىق ورگان قۇرىلعانى جانە باسقارۋدىڭ ارتىق تارماقتارى قىسقارتىلعانى تۋرالى باياندالدى. كوماندالىق باسقارۋ جاڭعىرتىلدى, ۆەدومستۆو جۇمىسىنا تسيفرلىق تەحنولوگيالار ەنگىزىلدى. اتاپ ايتقاندا, درونداردىڭ كومەگىمەن ونلاين بەينەباقىلاۋ جۇرگىزۋدى جانە ۆەدومستۆوارالىق سەرۆيستەرمەن ينتەگراتسيانى زور جەتىستىك دەۋگە بولادى. اتالعان جاڭاشىلدىقتاردى قولدانۋ ارقىلى وقىس وقيعالاردىڭ سانى – 2,8 پايىزعا, كىسى ءولىمى – 10,2 پايىزعا, جاراقات العانداردىڭ سانى 8,1 پايىزعا ازايدى.
مينيستر شىڭعىس ءارىنوۆ جۇزەگە اسىرىلعان ينفراقۇرىلىمدىق جوبالار تۋرالى, سونىڭ ىشىندە استانا قالاسىندا ءورت ءسوندىرۋ دەپوسى مەن اتىراۋدا قۇتقارۋ بەكەتى سالىنعانىن ايتتى. بىلتىر 14 جاڭا ءورت ءسوندىرۋ دەپوسى پايدالانۋعا بەرىلگەن.
شىڭعىس ءارىنوۆ قۇتقارۋشىلاردىڭ جاڭا كيىم ۇلگىسى بەكىتىلگەنىن, ماتەريالدىق-تەحنيكالىق بازانى جاڭعىرتۋ جۇمىستارى جالعاسىپ جاتقانىن, اۋە كەمەلەرى ساتىپ الىنعانىن جەتكىزدى. ەلدى مەكەندەردەگى قاۋىپسىزدىكتى قامتاماسىز ەتۋ ءۇشىن «اۋىل قۇتقارۋشىلارى» ۆەدومستۆولىق باعدارلاماسى قولعا الىندى.
ىقتيمال تابيعي اپاتتارعا دايىندىقتى پىسىقتاۋ ءۇشىن الماتىدا «الاتاۋ» جەدەل ماقساتتاعى وڭتۇستىك بازاسى قۇرىلدى. ازاماتتاردى ۋاقىتشا ورنالاستىرۋعا ارنالعان ءۇش ورىن بەلگىلەندى. كاسپي تەڭىزىنىڭ قازاقستاندىق سەكتورىندا «تەڭىز جاساعى» بولىمشەسى ىسكە قوسىلدى. بۇل قۇرىلىم وقىس وقيعاعا تاپ بولعان ادامدار مەن كەمەلەردى قۇتقارۋعا ماماندانعان. توتەنشە جاعداي ايماعىنا گۋمانيتارلىق جۇكتى تاسىمالداۋمەن اينالىساتىن «ايبات» ارناۋلى ماقساتتاعى جاساعى قۇرىلدى. بارلىق وڭىردە اۋە قۇرىلىمدارىن جاساقتاۋ جۇمىستارى جالعاسۋدا.
مەملەكەت باسشىسىنا سۋ تاسقىنى جونىندە اقپارات بەرىلدى. ءمينيستردىڭ ايتۋىنشا, رەسپۋبليكا اۋماعىنداعى جاعداي تۇراقتى. قاۋىپ تونگەن جاعدايدا تۇرعىنداردى ەۆاكۋاتسيالاۋ ءۇشىن كۇشتەر مەن تەحنيكالار ساقاداي ساي. سەگىز وڭىردەگى جاعداي باقىلاۋدا. رەسەي جانە قىرعىزستانمەن تۇراقتى تۇردە اقپارات الماسۋ جۇمىستارى جۇرگىزىلىپ جاتىر.
پرەزيدەنت سۋ تاسقىنىنا قارسى شارالارعا باسا نازار اۋدارۋ, الدىن الا ەسكەرتۋ جۇيەسىن جاڭعىرتۋ جانە توتەنشە جاعدايدىڭ سالدارىن جويۋ بويىنشا بۇعان دەيىن بەرىلگەن تاپسىرمالاردىڭ ورىندالۋىن جالعاستىرۋ جونىندە مىندەت جۇكتەدى.
